Ձեր վստահելի աղբյուրը

«Մեր պայքարը քաղաքական չէ, իշխանափոխության պայքար չէ, ազգային պայքար է: Ազգային պայքար մեկ էլ մղել ենք 200 տարի, 1000 տարի առաջ»,- ԱԺ դիմաց հանրահավաքում ասաց «Հայրենիքի փրկության շարժման» կողմից վարչապետի պաշտոնում առաջադրված Վազգեն Մանուկյանը:

Նա ընդգծեց՝ նույնն է, օտարի միջոցով կոտորվել է մեր ամբողջ պետությունը:

«Այն, ինչ արվեց Արցախի հետ,  նույնը հիմա շարունակելու են անել Հայաստանի հետ»,- նշեց Վ.Մանուկյանը:

Վարչապետի թեկնածուի խոսքով, մենք այս տարածաշրջանի միակ  հաղթած պետությունն էինք, համարվում էինք ամենահզոր բանակ ունեցող, 2,5 տարում ամեն ինչը ոչնչացավ:

«Այս նույն հարթակից ես եղել եմ այն առաջնորդներից, որ տարել եմ ձեզ հաղթանակի, և մենք ունեցել ենք անկախ պետություն, ղեկավարել եմ բանակը, գնացել ու հաղթել ենք: Այժմ նույնպես ասում եմ ձեզ՝  գնանք ու միասին հաղթենք: Երկար տևել չի կարող: Ինչքան տևի, այնքան ավելի կործանում է մեր Հայաստանի համար:

Ծնկի իջած ողորմություն ենք խնդրում այս ու այն երկրից: Նորից ոտքի կանգնենք, գնանք առաջ, առջևում տեսնում եմ՝ ինչպես ենք նորից զարգանում, հզորանում, արդար պետություն դառնում՝ բավարարող իր քաղաքացիներին:

Բոլորս միասին դեպի հաղթանակ»,- հայտարարեց Վազգեն Մանուկյանը: