Ձեր վստահելի աղբյուրը

Կառավարության շենքի դիմաց Նիկոլ Փաշինյանի հրաժարականի պահանջով բողոքի ակցիաներ են։ Մի խումբ քաղաքացիներ իրենց հետ բերել են տարբեր պաստառներ, որոնց վրա նշված են ֆեյսբուքյան ֆեյք օգտատերերի անուններ և #հաղթելուենք գրությունը։

ՀՀԿ երիտասարդական կազմակերպության ղեկավար Հայկ Մամիջանյանը լրագրողների հետ զրույցում նշեց, որ ՀՀ վարչապետի պաշտոնը ժամանակավորապես զբաղեցնող Նիկոլ Փաշինյանը ազատ, անկախ և հզոր Հայաստան չի ուզում, նա ֆեյքահայաստանի ղեկավարն է։

«Ինքը ֆեյք վարչապետ է, և քանի որ իր սատարողները հիմնականում համացանցային ֆեյքեր են, մենք որոշել ենք իր փոխարեն իր աջակիցների հանրահավաքը կազմակերպել։ Նրա աջակիցներն են «Նվերների աշխարհը», «Մերսում Դինուլը», «Խպարտ Խայուհին»...։ Այդ մարդը ֆեյքահայաստանի վարչապետն է, և Հայաստանի ֆեյքերն էլ թող իրենց աջակցությունը ցուցաբերեն։ Սա երևի ամենաանկեղծ ցույցն է, որը կարող են անել վարչապետի աջակիցները»,- ներկայացրեց Հայկ Մամիջանյանը։

Նրա խոսքով, Նիկոլ Փաշինյանը չի տիրապետում իրավիճակին, ինքը մտնում է լայվ, և իրեն թվում է, որ իրեն «սրտիկ» դնողներն իրական մարդիկ են։

«Եթե պարոն Փաշինյանը տեղյակ չի, որ իրեն սրտիկողները ֆեյքեր են, ապա մենք եկել ենք իր աչքերը բացելու։ Ինչ վերաբերում է նրա հրաժարականին, ապա դա կախված է լավ համոզելուց։ Ես վստահ եմ, որ իրեն հրաժարական տալ «համոզել» կհաջողվի»,- նշեց Հայկ Մամիջանյանը։

Հարցին, թե արդյոք միայն փողոցային պայքարը կստիպի Նիկոլ Փաշինյանին հրաժարական տալ, ՀՀԿ-ական գործիչը պատասխանեց, որ համաձայն չէ, թե Նիկոլ Փաշինյանի հրաժարականի պահանջը միայն փողոցում է.

«Նրա հրաժարականը պահանջում են Հայաստանի երկու սրբագույն կառույցները, 200-ից ավելի համայնք կոչ է արել, բուհերն են միացել այդ պահանջին։ Ես չգիտեմ՝ ուրիշ ով պետք է կոչ անի, որ Նիկոլ Փաշինյանը հեռանա»։

Դիտարկմանը, որ իշխանության ներկայացուցիչներն ասում են՝ Կաթողիկոսը ժողովուրդը չէ, Հայկ Մամիջանյանն արձագանքեց.

«Գիտեք, իշխանության ներկայացուցիչների համար ժողովուրդն այս ֆեյքերն են, ու այն կեղծ լիբերալ զանգվածը, որի վրա իրենք հաճախ հիմնվում են։ Մեր եկեղեցուց ավելի կարևոր ու ավելի ժողովրդին միավորող կառույց ես չգիտեմ։ Անբացատրելի պնդերեսություն է պետք ունենալ այդ մտավորականների, եկեղեցականների ու պաշտոնյաների հորդորից հետո հրաժարական չտալու համար»։

Միևնույն ժամանակ, Հայկ Մամիջանյանն անդրադարձավ նաև Աննա Հակոբյանի վարչապետ դառնալու մասին լուրերին, և նշեց, որ հույս ունի՝ մի օր չի արթնանա մի Հայաստանում, որտեղ արդեն փաստացի իշխանությունից զատ, օրինական իշխանությունը ևս կպատկանի Աննա Հակոբյանին։

«Ինչ վերաբերում է հրաժարականի պահանջին և ժամանակավոր կառավարության կողմից կառավարության գործառույթների իրականացմանը, ապա դա նշանակում է, որ պետք է գործընթացների կառավարմամբ ընտրություններ կազմակերպվեն։ Նիկոլ Փաշինյանն ունակ չէ նորմալ ընտրություններ կազմակերպելու։ Այստեղ ամենահրատապ խնդիրների լուծումն է՝ սկսած գերիների հարցից մինչև սահմանագծումներ։ Պարոն Փաշինյանը մի քիչ շատ է վստահում ադրբեջանական GPS-ներին, բայց մեզ պետք է մարդ, որը կունենա նաև իր GPS-ները, և կզած չի խոսի բանակցելուց»,- վստահեցրեց Հայկ Մամիջանյանը։