Ձեր վստահելի աղբյուրը

Լեռնային Ղարաբաղում հրադադարի ռեժիմն ամբողջությամբ պահպանվում է, անցած մեկ օրում հրադադարի ռեժիմի խախտումներ և սադրանքներ չեն արձանագրվել: ՏԱՍՍ-ի հաղորդմամբ, այս մասին հայտնել է ԼՂ-ում ռուսական խաղաղապահ զորախմբի կենտրոնի պետի տեղակալ գնդապետ Դմիտրի Պերեպյոլկինը:

«Խաղաղապահ զորախումբը Լեռնային Ղարաբաղի հակամարտ զորքերի շփման գծում կրակի դադարեցման և մարտական գործողությունների վերաբերյալ պայմանավորվածությունների իրականացման վերահսկողություն է իրականացնում։ Խաղաղապահ գործողության տարածքում իրավիճակը հանգիստ է: Հրադադարի ռեժիմի խախտումներ և սադրանքներ չեն արձանագրվել»,-  տեղեկացրել է նա:

Սպայի խոսքով, 23 խաղաղապահ կետերում Ռուսաստանի խաղաղապահ զորակազմը վերահսկում է հրադադարի ռեժիմը:

Շփման գծում և Լաչինի միջանցքում իրականացվում է պարեկություն, ապահովվում է քաղաքացիական բնակչության տեղաշարժի անվտանգությունը: Ռուս խաղաղապահները ապահովում են քաղաքացիների անվտանգ վերադարձը իրենց մշտական բնակության վայրեր, տրամադրում են մարդասիրական օգնություն և վերականգնում են քաղաքացիական ենթակառուցվածքները:

Լեռնային Ղարաբաղ է վերադարձել ավելի քան 36 հազար մարդ։ Վերսկսվել է հասարակական տրանսպորտի երթևեկությունը, պետական, բժշկական և կրթական հաստատությունների աշխատանքը, գործում են խանութներ: Խաղաղապահների օգնությամբ էլեկտրաէներգիայի մատակարարման համակարգը վերականգնվել է 85 տոկոսով: Գազատարն ամբողջությամբ վերականգնվել է, իսկ ջեռուցումն իրականացվել է բնակելի շենքերի համար: