Ձեր վստահելի աղբյուրը

Խորհրդարանը քննարկում է ԱԺ տարածքային կառավարման, տեղական ինքնակառավարման, գյուղատնտեսության և բնապահպանության մշտական հանձնաժողովի նախագահի ընտրության հարցը։ Իշխանական «Իմ քայլը» խմբակցությունն առաջադրել է Վահե Ղալումյանի թեկնածությունը։

Իր խոսքում առաջադրված թեկնածուն նշեց, որ անցած երկու տարիների ընթացքում ինքը հանձնաժողովի աշխատանքներին վերաբերվել է ամենայն պատասխանատվությամբ.

«Համոզված եղեք, ընտրվելու դեպքում այդ աշխատանքներին կվերաբերվեմ ավելի մեծ պատասխանատվությամբ»։

Վահե Ղալումյանը վստահություն հայտնեց, որ իր անցած կյանքի աշխատանքային կենսագրությունը բավականին համապատասխանում է վերոնշյալ հանձնաժողովի աշխատանքներին:

«Տեղական ինքնակառավարման մասով 4 անգամ ընտրվելով Իջևանի ավագանու անդամ, բավականին ակտիվորեն եմ մասնակցել այդ գործերին, և այդ տարիների ընթացքում պատկերացում կազմել և այնուհետև իմ պատկերացումներն ավելացրել որպես Տավուշի մարզպետ աշխատած տարիներին»,-ասաց նա:

Նա նաև նշեց, որ գյուղատնտեսության հետ էլ առնչվել է մանուկ հասակից, որոշակի ժամանակ անձամբ զբաղվել է անասնապահությամբ:

«Բնապահպանության առումով ես ուզում եմ ազնվորեն նշել, որ իմ պատկերացումներն ամբողջական չեն, բայց հանձնաժողովի և ԱԺ իմ գործընկների հետ միասին համոզված եմ, որ այդ բնագավառում նույնպես կարդարացնենք մեզ վերապահված պատասխանատվությունը»,- նշեց նա:

Հավելենք, որ հանձնաժողովի նախագահի ընտրությունը խորհրդարանում իրականացվելու է փակ քվեարկությամբ։