Ձեր վստահելի աղբյուրը

Անհետ կորած զինծառայողների հարազատները կրկին հավաքվել են Էջմիածնի զորամասի դիմաց: Նրանք երկու օր առաջ պաշտպանության նախարարությունում մինչև 02:00-ն սպասել էին Արցախում Ռուսաստանի Դաշնության խաղաղապահ զորակազմի հրամանատար Ռուստամ Մուրադովին: Ծնողների ներկայացմամբ, իրենց փոխանցվել է, որ ՀՀ ԶՈՒ գլխավոր շտաբի պետի տեղակալ Օնիկ Գասպարյանը զրուցել է նրա հետ, այսօր մարդիկ կգան զորամաս ու կպատասխանեն իրենց հարցերին:

Հարազատներից մեկը  կապ հաստատեց Արցախում ռուս խաղաղապահներից մեկի հետ՝ պարզելու, թե ե՞րբ են Զանգելանում որոնողական աշխատանքներ սկսեու իրենց երեխաներին գտնելու համար։ Խաղաղապահն ասաց,  որ համատեղ պայմանավորվածության արդյունքում այսօր որոնողական աշխատանքներ են սկսելու Հադրութի շրջանում, այնուհետև աշխատանքներ կլինեն նաև Ջաբրայիլում, Զանգելանում և Ֆիզուլիում։

Նա նշեց, որ չի կարող ասել, թե երբ կսկսվեն որոնողական աշխատանքները Զանգելանում։

«Մենք սպասում ենք մեր երեխաներին: Ծնողներս արդեն չենք դիմանում, արդեն դեղերն էլ մեզ չի օգնում: Թող պետությունը մտածի մեր երեխաների մասին»,- ասաց ծնողներից մեկը:

Մեկ այլ ծնող արձագանքեց. «Պետությունը չի մտածում մեր երեխաների մասին»:

Ծնողների հետ հանդիպեց հրամանատար Արսեն Աբգարյանը: Նա ասաց, որ իրեն հայտնել են՝ Կարմիր Խաչը երեկվանից Զանգելանի շրջանում սկսել է աշխատանքներ, իսկ ինքը հիմա պատրաստվում է գնալ Կապան, և եթե թույլատրեն, ինքը ևս կմասնակցի որոնողական աշխատանքներին։

«Ես մինչև վերջին պահը եղել եմ իմ զինվորականների հետ, ես իրենց հետ միասին այդ նույն տարածքում շրջափակման մեջ եմ ընկել։ Երկու օր հետո 22 զինծառայողի հետ միասին կարողացել ենք փրկվել և դուրս գալ»,- ասաց նա։

Հարցին՝ մյուս զինծառայողները ինչպե՞ս է ստացվել, որ չեն կարողացել փրկվել, հրամանատարն պատասխանեց․ «Թշնամու հետ մարտի ենք բռնկվել հանկարծակի, ով հասցրել փրկվել է, ով չի հասցրել՝ չի կարողացել փրկվի, կամ գերի է ընկել, կամ էլ փախել է մի ուրիշ կողմ: Այդ պահի դրությամբ չենք կարողացել իրենց որոնողական աշխատանքներն իրականացնել, որովհետև փախուստ է սկսվել, շրջափակման մեջ անկանոն կռիվ է սկսել»։

Ա. Աբգարյանն ասաց, որ այդ հատվածում մնացած զինծառայողներից գերեվարվածներ կան, թիվը  չի կարող ասել, տեսանյութերում տեսել ու ճանաչել են:

«Գեներալ-լեյտենանտն ասում է՝ երկու գրուպա են, կանչում է մի չոբանի, դնում է մյուս գրուպայի հետ, ինքն էլ մնում է այդ գրուպայի հետ։ Էդ գեներալ-լեյտենանտն ասում է՝ մենք իմացանք, որ էնտեղ տղերքը զասադի մեջ են, 3 ժամ բոյ են տալիս, ասում եմ՝ պարոն գեներալ-լեյտենանտ, ինչի՞ դու չգնացիր, ասում է՝ ես որ գնայի ինձ էլ կխփեին: Բա դու ո՞վ ես, արա։ 18 տարեկան զինվորը գնում, 11 հոգու  կյանք է փրկում ու զոհվում։

Էսօր ես իմ թոռանը, ում հայրը անհետ կորել է, հարցնում եմ՝ ի՞նչ առնեմ, ասում է՝ պապի ջան, ինձ ավտոմատ առ, գնամ պապայիս հետ թուրքերին կրակեմ, բայց գեներալն ասում է՝ ես գնային ինձ կխփեին, բա դու ինչի՞ համար ես այ գեներալ։ Ի՞նչ գեներալ: Ես պաշտպանության նախարարին եմ ասում, որ նման գեներալների պագոնները պոկեք, գցեք, զիբլանոցը։ Ժողովուրդ ջան, ձեր երեխեքին մի տվեք էդ գեներալներին, տանեն, սպանեն, տանեն թուրքի բերանը, իսկ իրենք փախնեն:

Ավելի լավ է գնան երկու տարի նստեն, քան գնան բանակ: Ի՞նչ բանակ: Գեներալ-լեյտենանտը չոբան է»,- զայրացած ասաց անհետ կորածի հայրը։

Մեկ այլ ծնող դիմելով Ա. Աբգարյանին ասաց.  «Տարար, երեխեքին բրախեցիր, թողիր փախար»:

Հրամանատարն ասաց, որ ինքը չի փախել, իսկ ծնողը պնդեց, որ նա չի մնացել շրջափակման մեջ, թողել փախել է:

«Իմ երեխին դու ես տարել, գնա այսքան ծնողի երեխեքին բեր, տուր: Կտամ, կսպանեմ: Ոչ դատվելուց եմ վախենում, ոչ էլ մեռնելուց: Անգրագետներ: Հավաքեցիք այսքան երեխաների,  տարաք գյուլի կրակի բերանը լցրեցիք… Այդ երեք անչափահաս երեխու երեսին ես ո՞նց նայեմ: Ի՞նչ անեմ՝ դե ասեք»,- ասաց ծնողներից մեկը:

Անհետ կորած զինծառայողներից մեկի ծնողը  խոսեց գնդապետ Սամվել Ասատրյանի հետ, ով ասաց, որ գալիս է Էջմիածին:

«Նա խոստացել է այսօր մեր հարցերին պատասխան տա: Երկու օր առաջ պաշպանության նախարարությունում Մուրադովին սպասելիս ասել է, որ ինքը կգա ու կասի՝ երբ, ոնց: Սպասում ենք գա ու պատասխան տա»,- նշեց անհետ կորած զինծառայող Վարդան Ադոյանի մայրը՝ Անահիտ Ադոյանը:

Ծնողներիցվ մեկն ասաց, որ իրենց կեղտոտ գործերը կոծկելու համար  խեղճ ու կրակ ծնողներն խաբում են, ելքեր են որոնում, որ ժողովուրդը ձայն չհանի:

«Շատ մտածված ձևով տարել են, երեխեքին փուռն են գցել: Ոչ մի բան չեմ հասկանում ռազմագիտությունից, բայց հասկանում եմ, որ եթե ջոկատը տանում ես  կռվի, պետք է պատրաստ լինես վերջին ձևով: Ո՞վ է  տեսել առանց զրահաբաճկոնի, սաղավարտի, մի հատ ավտոմատով  գնաս, կանգնես թուրքի դեմը, կռիվ տաս: Իրենց տակը լիքը կեղտոտ բաներ կան, թող գան, բացահայտեն: Ո՞ւմ հետ են մեր երեխեքի արյան գնով գործարք կնքել, ինչ են արել: Թող գան ու մեզ պատասխան տան»,- վրդովված ասաց ծնողը: