Ձեր վստահելի աղբյուրը

Ազատության հրապարակում շարունակվում են Նիկոլ Փաշինյանի հրաժարականի պահանջով ակցիաները։ Ոստիկանները բիրտ ուժ կիրառելով բերման են ենթարկում ակցիայի մասնակիցներին, սակայն նրանք շարունակում են վանկարկել՝ «Նիկոլ, դավաճան»։

«Հայրենիք» կուսակցության նախագահ Արթուր Վանեցյանը վստահեցնում է՝ իրենք վճռական են, և բոլորով միասին պայքարելու են այս «դավաճան և սրիկա» իշխանություններին հեռացնելու համար։

«Բոլոր քաղաքացիները պետք է շատ լավ հասկանան, որ սա պայքար չէ իշխանության համար, սա պայքար է հանուն մեր հայրենիքի փրկության։ Ժողովուրդ, դուրս եկեք փողոց, հասկացեք, որ այս իրավիճակը օրհասական է, որ վտանգված են ՀՀ սահմանները, վտանգված է հայ ժողովրդի գոյությունը։ Այս անհասկանալի և բիրտ ուժի կիրառմամբ չեն կարող մեզ լռեցնել, թույլ չենք տալու, որ այս դավաճան պլանը հասնի իր ավարտին»,- նշեց նա։

Դիտարկմանը, որ ոստկանները շարունակում են բերման ենթարկել ակցիայի մասնակիցներին, Արթուր Վանեցյանն արձագանքեց, ասելով, որ եթե դուրս են եկել պայքարի, պետք է պատրաստ լինեն ամեն ինչի։

«Բայց որևէ բանով մեզ հնարավոր չէ վախեցնել»,- ասաց «Հայրենիք» կուսակցության ղեկավարը։

Մինչ նա պատասխանում էր լրագրողների հարցերին, ոստիկանության գնդապետը մոտեցավ և հորդորեց դուրս գալ ճանապարհի երթևեկելի հատվածից, ապա նոր հարցազրույց տալ։

Արձագանքելով՝ Արթուր Վանեցյանը նշեց, որ իրենք օրինական ակցիա են իրականացնում։

Ապա, նայելով շուրջը, «Հայրենիք» կուսակցության ղեկավարը հարցրեց. «Ո՞ւր է, Իշխանին տարե՞լ են»,- որին ի պատասխան ականատեսները նշեցին. «Այո, Իշխան Սաղաթելյանին տարան ոստիկանները»։

«Ժողովուրդ ջան, բիրտ ուժ կիրառելն ապօրինի գործողություն է։ Ինչի՞ համար են բիրտ ուժ կիրառում ՀՅԴ ղեկավարի նկատմամբ։ Մեկը կարո՞ղ է բացատրել, ի՞նչ հիմքով, խուլիգա՞ն է Իշխան Սաղաթելյանը, կամ մեր մնացած տղաները։ Սա մեր իրավունքն է, մենք իրականացնում ենք մեր ակցիաները»,- նկատեց Արթուր Վանեցյանը։

Ապա, շարունակելով խոսքը, նա վստահություն հայտնեց, որ ոստիկանների 95%-ը հայրենասեր մարդիկ են, պարզապես այս պահին մոլորված են.

«Բայց ես համոզված եմ, որ մեր ոստիկանները շատ կարճ ժամանակ հետո սթափվելու են և հասկանալու են, որ չպետք է ծառայեն դավաճաններին։ Սպան չի կարող լինել դավաճանի ենթական, չի կարող կատարել դավաճանի հրամանները։ Սպան չի կարող համաձայն լինել մեր հայրենիքը նման խայտառակ կերպով հանձնելուն։ Դուք տեսա՞ք երեկվա զորահանդեսը, թուրքի հրճվանքը։ Մենք պետք է ամբողջ կյանքներս թուրքի առաջ կզած ման գա՞նք, մի հատ խելքի եկեք, սթափվեք, չի կարելի։ Ընկել ենք մի հատ հիմար խմբակի ձեռքը ու ազգը տուժում է։ Արդեն թուրքական պետական հեռուստատեսությամբ ցուցադրում են Հայաստանի քարտեզը, որտեղ չկան Սյունիքի մարզը, Վայոց Ձորի մի մասը, Գեղարքունիքի մի հատված»։