Ձեր վստահելի աղբյուրը

Հայաստանի պաշտպանության նախկին նախարար, Արցախի Ազգային հերոս Սեյրան Օհանյանը, որը մասնակցել է արցախյան վերջին պատերազմին, «Արմնյուզ» հեռուստաընկերությանը տված հարցազրույցում հայտարարեց՝  հայտարարության պատասխանատվությունը Հայաստանի իշխանությունների վրա է։

«Դավաճանությո՞ւն է, թե ոչ, ժողովուրդը կարող է որոշել, այն ժողովուրդը, որին ՀՀ վարչապետը խոստացել էր, առանց նրա թույլտվության, զեկուցելու որևէ փաստաթուղթ չի ստորագրի, դրա գնահատականը թող տան ԱԺ-ն ու դրա բոլոր խմբակցությունները, որոնց հետ քննարկելու շրջանակներում պետք է որոշում ընդունի, արդյո՞ք նրանց հետ քննարկվել է այդ փաստաթուղթը, և այդ գնահատականը պետք է տա Հայաստանի իրավապահ ոլորտը»,- ասաց Սեյրան Օհանյանը։

Նա պատմեց, որ լսելով Ադրբեջանի կողմից սանձազերծած պատերազմական գործողությունների մասին՝ սեպտեմբերի 27-ին, 28-ին ԶՈւ ԳՇ նախկին պետ Յուրի Խաչատուրովի հետ ներկայացել են ՊՆ, բայց նախարարության ղեկավարությունն իրենց չի ընդունել։ Դրանից հետո սեպտեմբերի 28-ին որոշել է մեկնել Արցախ, ներկայացել է Արայիկ Հարությունյանին, ապա մեկնել է հրամանատարական կետ, այնտեղ եղել է երեք օր, փորձել է առաջարկություններ անել, խորհուրդներ տալ՝ հնարավոր օպերատիվ վերադասավորումներ անելու վերաբերյալ։

«Ամսի 29-ի երեկոյան համապատասխան եզրակացության եկա, կարճ ներկայացրել եմ դրանք Ջալալ Հարությունյանին, Արայիկ Հարությունյանին, համապատասխան փաստաթուղթ կազմել ու փոխանցել եմ Մովսես Հակոբյանին, որ նա մեկնի Երևան ու ներկայացնի Հայաստանի վարչապետին։ եզրակացությունը մեկն էր, որ բավականին բարդ իրավիճակ էր ստեղծված։ Ի տարբերություն ԶՈւ ԳՇ պետի, որն օգտագործել էր կանգնեցնել պատերազմը արտահայտությունը, ես օգտագործել եմ այսպիսի արտահայտություն. «ՀՀ և ԱՀ իշխանությունները պետք է ամեն ինչ անեն աջակցելու ՊԲ-ին, վերականգնելու բանակցային գործընթացը և համակողմանի ապահովման միջացառումներ իրականացնեն ՊԲ-ի համար»,- ասաց Օհանյանը։

Նրա խոսքով, երբ Հայաստանի վարչապետի կողմից որոշում ընդունվեց, որ փորձառու գեներալներն իրավունք չունեն հրամանատարական կետ այցելելու, յուրաքանչյուր ոք փորձեց իր հնարավորությունների շրջանակում աջակցել։

«Ես գտնում եմ, որ փորձառու գեներալներից մի քանիսը պետք է լինեին Ջալալ Հարությունյանի կողքին, որպեսզի իրենց փորձառությամբ համապատասխան աջակցություն ցուցաբերեին, առանց խանգարելու միանձյա որոշումներ կայացնելուն»,- ասաց Օհանյանը։

Նա նաև պատմեց Արայիկ Հարությունյանի հետ հանդիպման ու վիճաբանության մասին։

Մանրամասները՝ տեսանյութում։