Ձեր վստահելի աղբյուրը

«Մեր՝ պատերազմի հետևանքների վերացումն ու ոտքի կանգնելը կսկսվի այն պահից, երբ Նիկոլ Փաշինյանը գնա: Բոլորը հասկանում են, որ ինքը պետք է գնա, բացի իրենից: Բայց այդ հոգեվարքը, ամեն մի կորած օրը մեզ վրա շատ ծանր է նստում»,- մտավորականների ու մշակույթի գործիչների հետ հանդիպմանն ասաց «Հայրենիքի փրկության շարժման» վարչապետի թեկնածու Վազգեն Մանուկյանը:

Նա նշեց, որ պարտված ղեկավարի հեռանալուց հետո հսկայական բանակցային պրոցես պետք է գնա այս համաձայնագիրը կյանքի բերելու համար, որոշ կետեր մեկնաբանել այնպես, ինչպես մենք  կուզենք:

«Պայմանագիրը հնարավորություն տվեց, որ այստեղ մտնեն ռուս խաղաղապահ զորք: Հիմա իրենք են մեր անվտանգության երաշխիքը: Եթե մինչ այդ մեր անվտանգության երաշխիքը մեր բանակն էր ու մեր դաշանակիցների հետ համաձայնագրերը, հիմա հիմնական մեր անվտանգության երաշխավորը դարձան ռուսական խաղաղապահ զորքերը: Այս դեպքում չեմ հասկանում, երբ Երևանում, Արցախում ցույցեր են լինում, որ ռուսական բազան այստեղից հանել ու ռուսները գնան:

Պատկերացնում եմ, որ հասարակության մեջ կարող են լինել տարբեր պատմական վեճեր, հիշեն նմանություններ, մտածեն՝ ինչ հարաբերություններ պետք է ունենանք ԱՄՆ, ՌԴ, Թուրքիայի հետ, բայց եթե մեկը դուրս է գալիս փողոց ու պայքարում ռուսական բազաների դեմ, դա հակառուսական տրամադրություն չէ, փող է, որը տրվում է  իրենց արտաքին ուժերի կողմից, որպեսզի ինքը պայքարի Ռուսաստանի ազդեցությունն այստեղ նվազեցնելու համար: Իսկ ո՞ւմ է  դա ամենաշատը պետք: Թուրքիային:  Ուրեմն ես իրավունք ունեմ ենթադրելու, որ դրանք Թուրքիայի ագենտներն են ու կատարում են նրանց առաջադրանքը»,- ասաց Վ. Մանուկյանը:

Նրա խոսքով, ժամանակի ընթացքում պետք է լրջորեն քննարկեն, թե ինչ հարաբերություններ պետք է ունենալ Թուրքիայի, Իրանի, մյուս երկրների հետ, բայց կան մարդիկ, որոնք դեռ պատերազմը չավարտված, հայտարարում են Թուրքիայի հետ դիվանագիտական հարաբերություններ ստեղծելու մասին:

«Մանկապարտեզից սկսած բոլորը  գիտեն, որ կռվի ժամանակ եթե գնում ես, ասում ես՝ իրար հետ հաշտվենք, դա կլինի մեր երկրորդ կապիտուլյացիան:

Ես գտնում եմ, որ մենք պետք է տարբեր, բազմաթիվ հարաբերություններ ունենանք: Բայց այս պահին դա ասելը, նշանակում է՝  երկրորդ կապիտուլյացիան: Այդ մարդիկ գնում են երկրորդ կապիտուլյացիայի: Դա իրենց թելադրվում է, թե իրենց տգիտությունն է, ինձ չի հետաքրքրում»,- նշեց Վ.Մանուկյանը:

Նա նշեց, որ Փաշինյանի հեռանալուց հետո լինելու է բավականին ծանր մի ժամանակաշրջան, որը դրված է լինելու անցումային  կառավարության վրա: Դա պայմանագրերի  մեկնաբանությունն է, փախստականների, գերիների, անհետ կորածների հարցերը:

«Հարց է առաջանում՝ հետո ի՞նչ է լինելու: Մենք կկարողանա՞նք ոտքի կանգնել ու դառնալ ուժեղ պետություն, թե՞ այսպես կռացած վիճակում մնալու ենք»,- հարցադրումներ արեց Մանուկյանը: Այնուհետև նա օրինակներ բերեց, կապիտուլյացիա ստորագրած պետություններն այսօր ինչպիսի ազդեցություն ունեն աշխարհում: Այսինքն, ըստ Վ. Մանուկյանի, ոտքի կանգնելու ու առաջ գնալու հնարավորություն կա:

Վ. Մանուկյանն ասաց, 2016 թվականից արդեն զգացվում էր, որ պետք է գնալ որոշակի մոդեռնիզացիայի, փոխել որոշ բաներ:

«Դա հասկանում էր և ժողովուրդը, և իշխանությունները: Ցավն այն է, որ այդ մոդեռնիզացիան, որը պետք է կատարվեր Սերժ Սարգսյանի ժամանակ, կատարվում էր շատ դանդաղ, վախվորած,  անտեսանելի էր բնակչության մեծ մասին: Ժողովուրդը դուրս եկավ  փողոց ու ասաց, որ ուզում է նոր փուլ մտնել:  Այդ նոր փուլը, որ իրենք ասացին, կործանարար եղավ Հայաստանի համար:

Ժողովրդավարության  փոխարեն ստացանք ոստիկանական պետություն, դատական համակարգը Սահմանադրական դատարանով փլուզվեց:

Անցումային շրջանից հետո սկսվելու է նոր փուլ, որի մեջ կտեղավորվեն հներ, նորեր, նրանք, ովքեր կարող են իրենց հայրենիքին օգուտ բերել: նոր իշխանությունում պետք է տեղ ունենան պրոֆեսիոնալները և կապ չունի, թե նրանք որ քաղաքական ուժերի ներկայացուցիչներ են»,- ասաց վարչապետի թեկնածուն:

Նա հիշեց, երբ Ղարաբաղյան շարժումը սկսվեց, երեք սյան վրա էր հենված՝  ազգային, ազատության գաղափար, ինտեգրվել համաշխարհային համակարգի մեջ առանց  ինքնությունը կորցնելու:

«Այս աշխատանքները կկատարեն նոր կառավարությունները, որոնք կգան անցումային շրջանից հետո: Մտավորականությանը կոչ եմ անում հիմիկվանից սկսել բանավեճ արտաքին քաղաքականության մասին, ինչպիսին պետք է լինի պետությունը:

Մենք հիմա խոսում ենք դժվարություների մասին: Ունենք ոտքի կանգնելու, տարածաշրջանում ավելի ազդեցիկ լինելու բոլոր հնարավորությունները, դրա համար պետք է կամք, ցանկություն, երազանք և աշխատանք»,- ասաց Վազգեն Մանուկյանը: