Ձեր վստահելի աղբյուրը

«Այո, այսօր մեր ազգը ողբերգություն է ապրում»,- այսօր «Հայրենիքի փրկության շարժման» վարչապետի թեկնածու Վազգեն Մանուկյանի հետ հանդիպման ընթացքում ասաց ԵՊՀ դոցենտ Մարատ Գրիգորյանը։

Նրա խոսքով, թեև շատերը այսօր նոր զգում են, թե ինչ ողբերգական է հայ ժողովրդի վիճակը, այնուամենայնիվ, դրա սկիզբը եղել է 2018 թվականի մայիսին, երբ իշխանության եկան մարդիկ, որոնց ուղեղները «թլպատվել են» դոլարով։

«Այսօր այդ թլպտաված ուղեղներով մարդիկ են ղեկավարում երկիրը, և նրանք մեզ հասցրին այս վիճակին։ Ասել, որ ծանր իրավիճակի մեջ ենք, նույնն է, ինչ ոչինչ չասել։ Մենք այսօր ունենք մեկ խնդիր՝ ինչպես դուրս գալ այս վիճակից։ Եթե մենք միասնական չեղանք, չի բացառվում երկրորդ կործանիչ հարվածը մեր պետությանը։ Չենք դիմանա այդ հարվածին, բայց քանի դեռ Նիկոլ Փաշինյանն է իշխանության, այդ երկրորդ հարվածը չի ուշանալու։ Բայց այդ դեպքում մենք մեր պետությունը կկորցնենք ազգովի։ Այ դրա մասին պետք է մտածենք»,- նշեց դոցենտը։

Մարատ Գրիգորյանի պնդմամբ, այսօրվա իշխանությունները տառապում են, և մտածում են գեբելսյան հոգեբանությամբ.

«Գեբելսը, Հիտլերի ամենամեծ խորհրդականը, ասում էր՝ պետք է այնպես ստես, որ դիմացինդ կորցնի մտածելու ունակությունը։ Իսկ երբ կործանվեց Գերմանիան, Գեբելսի համախոհներից մեկն իրեն ասում է՝ ժողովուրդը մեզ չի ների, իսկ Գեբելսն արձագանքում է՝ մենք պատասխանատու չենք գերմանական ժողովրդի առաջ, նա է պատասխանատու, որ մեզ տվել է իշխանություն։ Հիմա նույնը սրանք են ասում՝ մենք մեղավոր չենք, հայ ժողովուրդն է մեզ տվել իշխանություն։ Այ սա է մեր ամենամեծ դժբախտությունը, եթե չհասկանանք դա, ապա մենք երբեք չենք կարող ուղղել մեր մեջքը»։

ԵՊՀ ներկայացուցիչը ցավով նշեց, որ այսօր Արցախ չկա, կա ռուսական բազայով շրջապատված տարածք, որտեղ ապրում են հայեր։ Ըստ նրա, հենց ռուս զինվորները դուրս եկան այդ տարածքից, Արցախ գոյություն չի ունենա։

«Այսօր մեր սահմանները պաշտպանված չեն, ոչ մի պայման, վիճակ չկա։ Զինվորներից մեկն ինձ ասաց՝ կանգնած ենք և մտածում ենք, որ մեզ չգողանան։ Զինվորը սահմանին կանգնած ոչ թե մտածում է՝ ինչպես պահել այն, այլ մտածում է՝ ինչ անի, որ իրեն չգողանան։ Իսկ այս խնդիրը գործող իշխանությունները չեն կարող լուծել։ Մեզ պետք է նոր իշխանություն, հակառակ դեպքում մենք կընկնենք ոչ թե ծանր դրության մեջ, այլ կկոցնենք մեր երկիրը»,- շեշտեց նա։

Բացի այդ, Մարատ Գրիգորյանը վստահություն հայտնեց՝  չի կարելի հների վերադարձով վախեցնել մարդկանց։ Նա նշեց՝ չկա հին ու նոր, կան հին դավաճաններ և կան նոր դավաճաններ, կան հին կոռուպցիոներներ և նոր կոռուպցիոներներ...։

«Այսօր չեզոք, պասիվ և անտարբեր լինելը ավելի մեծ հանցագործություն է, քան սորոսական լինելը։ Սա մեծ դավադրություն է մեր երկրի նկատմամբ»,- եզրափակեց խոսքը Մարատ Գրիգորյանը։