Ձեր վստահելի աղբյուրը

«Ամեն ժամը, ամեն օրը Նիկոլի մնալը փորձանք է այս ժողովրդի գլխին: Խոսք ասեք հարգելի գիտականներ, մտավորականներ»,- մտավորականների ու մշակույթի գործիչների և  «Հայրենիքի փրկության շարժման» վարչապետի թեկնածու Վազգեն Մանուկյանի հանդիպմանն ասաց դրամատուրգ Սամվել Խալաթյանը:

Նա նշեց, որ նիկոլիզմը  սոսկ քաղաքական շարժում չէ, հիվանդության պալար է, որ պետք է հեռացվի, եթե անգամ հարկ կա նույնիսկ վիրահատության միջոցով:

Դրամատուրգի խոսքով, արդեն շատ են հապաղում: Սամվել Խալաթյանի խոսքով, պետք է ձայն տրվի գիտնականներին:

«Շրջաններում քնած  վիճակ է: Միայն վերջերս, ի պատիվ ՀՅԴ-ի, փոքր մի բան եղավ Վանաձորում: Կարծում եմ՝ շարժումը պետք է ուշադիր լինի ու տեղերում աշխուժություն մտցնի:  Մարդիկ ցավի, սգի մեջ են, շուտով սոցիալական վիճակն ավելի կսրվի»,- ասաց Ս. Խալաթյանը:

Հանդիպմանը ներկա մշակույթի ոլորտի աշխատող, այժմ գործազրուկ Մարտին Ուրիխանյանն ասաց, որ մինչ այստեղ նի-նի-ներ ենք անում,  Ծաղկաձորում մտավորականների, ՊՈԱԿ-ների տնօրեններին հավաք են անում, 3 միլիոն գումար փոշիացնում են:

«Վերջին երեք տարում միայն Կինոկենտրոնում 1 միլիարդ 200 միլիոն գումար է փոշիացվել:

Ի՞նչ եմ ուզում ասել: Ես զինվոր եմ, 62 տարեկան մարդ եմ, եկել եմ այսօր ձեզ հրամանատար եմ ընտրել, ասեք՝ ինչ եմ անելու: Ուրիշ ոչ մի բան չեմ ուզում լսել: Կոնկրետ իմ քայլը ասեք»,- նշեց նա: 

Ռեժիսոր Աշոտ Գևորգյանն ասաց, որ այս ամեն ինչն իր համար կենսագրություն կորցնել է: Նրա խոսքով, Ղարաբաղը մեր պետականության, անկախության ողնաշարն էր, որ ջարդեցինք:

«Երկու օր առաջ գործի բերումով եկել եմ Զանգեզուրից: Գորիսից չեմ կարողացել գնալ Կապան, հենց քաղաքապետն ասել է՝  գարանտիա չկա, որ քեզ մեքենայով չեն գողանա:

Պետական տեղեկատվությունը մի բան է ասում, թելեգրամ ալիքները մի բան են ասում, բայց որ վտանգը կա փաստ է, գլխավոր շտաբը, ՊՆ, ԱԱԾ-ն ոչ մի արձագանք:

Բոլորին էլ հայտնի է կորցրել ենք մեր սուվերենությունը: Ամբողջովին ռուսական խաղաղապահների հույսին ենք: Բայց նրանք հո՞ կանգնած չեն ողջ Զանգեզուրին սահմանին:

Ի՞նչ առաջարկ ունեք, անցնե՞ք ֆիդայական ջոկատներին»,- ասաց մտավորականը:

Նա համոզված եմ՝ իշխանափոխություն է լինելու, այս տականքը գնալու է, գալու է Վազգեն Մանուկյանը:

Ա. Գևորգյանը մեկ հարց էլ տվեց Վազգեն Մանուկյանին. «Ի՞նչ լուծում եք տալիս էս սորոսական ՀԿ-ներին: Արդյո՞ք Ռուսաստանի պես օրենք եք ընդունելու, էս մոլախոտը հանվի»:

Վազգեն Մանուկյանն ասաց, որ Հայաստանն ունի բանակ, բայց հիմա այդ բանակը չի տեսնում, բայց կա, այդքան ջանք են թափել բանակ կառուցելու համար:

«Պետք է կարողանանք բանակն օգտագործել իր պարտականությունները կատարելու համար: Կոչ ենք անում բանակին, բայց իշխանությունը հակառակն է գնում»,- ասաց Մանուկյանը:

Ինչ վերաբերում է  սորոսականներին, նա նշեց, որ  եթե ազատության բառի տակ թույլ են տալիս արտաքին գրանտներով բազմաթիվ կառույցներ լինեն, որոնք աշխատում են արտաքին հետախուզությունների, ազդեցությունների տակ, երկիրը կործանվում է:

«Պետք է գտնել միջոց, որ այդպիսի գրանտեր չլինեն: Ամեն ինչ պետք է լինի օրենքով: Լուծելու բազմաթիվ հնարավորություններ կան:

Հարցն այն է՝  ինչո՞ւ գալ, նվաճել Հայաստանը տանկերով, եթե կարելի է 30, 50 100 միլիոն դոլար ծախսել ու  ժողովրդին խաբելով տանել այն ուղղությամբ, ինչ ուղղությամբ ուզում ես: Հիմա այդ երևույթը տեսանք»,- նշեց «Հայրենիքի փրկության շարժման» վարչապետի թեկնածուն:

Հայաստանի վաստակավոր արտիստ, դերասան Դավիթ Հակոբյանն ասաց, որ Նիկոլի ապագա մանիպուլյացիոն  խաղի համար այստեղ հսյակական ջուր նախապատրաստեցին՝  հայտարարելով, որ մենք նրա հետ սուգին քայլելու իրավունք չունենք:

«Մեծագույն սրիկայի հետ այդ սուգին գնալու իմաստը չեմ տեսնում, նույնն է, որ նրա հետ գնաս խաշ ուտելու: Սրիկայություն է դա: Բայց չե՞ք կարծում, որ հսյկական ժողովուրդ է հավաքվելու այդ:

Իմ կարծիքն այն է, որ նախ արդեն ուշացրել ենք, արդեն պետք է սուգ հայտարարվեր: Չենք արել, բայց հիմա, կարծում եմ, որ ապագա մանիպուլյացիան կանխելու համար լուրջ հայտարարություններ արվեն, որ ժողովուրդը հասկանա, որ մենք գիտենք, որ դա մանիպուլյացիա է, դա օգտագործվելու է մեր դեմ, բուն ժողովրդի դեմ»,- ասաց Դ.Հակոբյանը:

Վազգեն Մանուկյանն արձագանքելով՝ ասաց. «Ես ասացի ես, երկրորդ՝ այդ հարցը պետք է քննարկենք շարժման ղեկավարության հետ, որոշում կընդունվի: Ես ասում եմ՝ իմ անձնական ցանկությունը, այդ սուգի 99 տոկոս մեղավորի հետ միասին չեմ գնա այդ սուգին»: