Ձեր վստահելի աղբյուրը

Պայմանագրային զինծառայողի մայրը՝ Թերեզա Սահակյանը, իր որդուց լուր չունի սեպտեմբերի 29-ից: Որդին եղել է Թալիշում:

«Սեպտեմբերի 29-ին զանգել են, որ ժամը 8-ին զոհվել է, բայց ժամը 10:33 րոպեին իր աներձագի հետ հեռախոսով խոսել է: 29-ից մինչև հիմա փնտրում եմ: Դիակները հանել են, չկա իմ տղայի դիակը»,- լրագրողներին պատմեց մայրը, ով պաշտպանության նախարարության դիմաց է, ակնկալում է հանդիպում որևէ պաշտոնյանի հետ ու տեղեկություն ստանա որդու մասին, թեև հույս չունի: 

«Այդ երեխաներն իրենց համար խամաճիկ էին: Ղարաբաղից Հայաստան ինչքան մորգ կա, բոլորում եղել եմ, ԴՆԹ եմ հանձնել: Ինչքան թարմ դիակ է գալիս, գնում եմ, նայում եմ: Մահացածների ցուցակում է անունը, տվեք իմ երեխայի դին:

Մի տեղից մյուս տեղն են ուղարկում, ասում են՝ գնա ԱԳՆ: Այնտեղ չեն էլ ուզում դեմքիդ նայեն, հարցիդ պատասխանեն, բոլոր հեռախոսներն անջատում են ու ներսում նստում: Միայն մարդկային պատասխանել են Ռազմական ոստիկանությունում:

Մի հատ ղեկավարի գլուխ եմ կտրելու, իմանամ, որ թուրք եմ սպանել: Հերիք է, ջահելների գլուխը կերան: Սա պետությո՞ւն է, թե՞ անտերություն: Որտե՞ղ է իմ երեխան, ասե՞ղ է, որ կորավ: Ոչ գերիների մեջ է, ոչ զոհվածների մեջ, չգիտեմ որտեղ է»,- ասաց տիկին Թերեզան: 

Մեկ այլ անհետ կորած զինծառայողի հարազատ Կարինե Սանթրոսյանը նշեց, որ սեպտեմբերի 27-ից լուր չունեն, ամեն տեղ դիմել են:  Զինծառայողի անունը մահացածների ցուցակում է, բայց մինչև այժմ որևէ լուրչ չունեն, դիակ էլ չկա:

«Ծնողները հիմա շատ վատ վիճակում են: Որևէ տեղեկություն չունենք, այլևս դիմանալու չէ: Լռությունն էլ սահման ունի»,- նշեց  նա: