Ձեր վստահելի աղբյուրը

Ինչպես տեղեկացրել ենք «Հայրենիքի փրկության շարժման» վարչապետի թեկնածու Վազգեն Մանուկյանը հանդիպում է երիտասարդների հետ։

Հանդիպման ժամանակ ԲՀԿ երիտասարդական միության ներկայացուցիչ Ավետիք Հովեյանը, դիմելով Վազգեն Մանուկյանին, նշեց, որ նախորդ տարիներին Հայաստանից ուղեղների արտահոսք է տեղի ունեցել, և, իր վստահեցմամբ, այդ մարդիկ լավ ապագա ունենալու հույս Հայաստանում ուղղակի չեն ունեցել։ Երիտասարդը հետաքրքրվեց, թե ինչ քայլեր է նախատեսում անել Վազգեն Մանուկյանն այս առնչությամբ։

Պատասխանելով երիտասարդի հարցին՝ Վազգեն Մանուկյանն ասաց, որ պետք է ունենալ աշխատատեղ, որպեսզի մարդիկ երկիրը չլքեն։

«Ընդ որում, Հայաստանում առկա աշխատատեղը վարձատրության առումով չի կարող համեմատվել ԱՄՆ-ի նույն աշխատեղի հետ։ Բայց երիտասարդների հետ երբ խոսում ես, իրենք նշում են՝ եթե նույնիսկ երկու-երեք անգամ պակաս վարձատրվեն իրենք, համաձայն կլինեն ՀՀ-ում մնալ, քան թե գնալ։ Բայց եթե այդպիսի տեղ չկա, չես կարող այդ մարդու ձեռքից ու ոտքից բռնել։ Դա նշանակում է, որ ՏՏ ոլորտի համար պետք է զարգացման նոր հնարավորություններ ստեղծել, որպեսզի այդ երիտասարդները մնան»,- նշեց վարչապետի միասնական թեկնածուն։

Ավետիք Հովեյանը հետաքրքրվեց նաև, թե ի՞նչ հակակոռուպցիոն մեխանիզմներ է պատրաստվում ներդնել Վազգեն Մանուկյանը։

Արձագանքելով՝ նա ասաց, որ կոռուպցիան պետության համար քայքայիչ է։

«Կարծեմ Իրանում էր, դատավորը եթե կաշառք էր վերցնում, իրեն սպանում էին և իր կաշվով աթոռն էին պատում։ Հաջորդ դատավորը պետք է նստեր այդ աթոռի վրա...։ Ընդհանրապես, հայտարարել, որ գործող իշխանությունները անազնիվ են, իսկ եթե մենք գանք իշխանության, ազնիվ կլինենք, 99% դեպքերում այդպես չէ. նոր եկածները լինում են ավելի անազնիվ, քան նախորդները։ Չկա իրավիճակ, որ մարդը կարող է գալ, կոռուպցիան վերացնել և վերջ։ Կոռուպցիայի դեմ պայքարը պետք է լինի ամեն օր»,- եզրափակեց նա։