Ձեր վստահելի աղբյուրը

«Հնի վերադարձի վախն իսկապես կա ժողովրդի մոտ, բավականին հեշտ կարելի է դրա վրա խաղալ»,- երիտասարդների հետ հանդիպման ժամանակ ասաց «Հայրենիքի փրկության շարժման» վարչապետի թեկնածու Վազգեն Մանուկյանը՝ պատասխանելով մասնագիտությամբ սոցիոլոգ, անկուսակցական Արմեն Խաչիկյանի դիտարկմանը, թե իշխանությունները մարդկանց մոտ վախ են սերմանում՝ տարածելով, որ եթե Փաշինյանը գնա, նախկինները հետ կգան:

Ըստ Վ. Մանուկյանի, վախը ոչ թե անձերից է, քանի որ հասկանալի է, որ ամենավերևի անձերը չեն վերադառնալու, խոսքը բարքերի վերադարձի մասին է: Նա նշեց, որ Հայաստանում բարքերը կամաց-կամաց լավանում էին:

«100 տոկոս եմ ասում՝ այդպիսի կյանք չի վերադառնալու: Ոչ թե մեկ տարում այնպես կանեմ, որ չլինի, մեկ տարում կդնեմ արմատներ, որ չլինի, բայց հասարկությունը հին փուլերին չի վերադառնում: Կարծում եմ՝ մենք հիմա մտնում ենք նոր փուլ: Բնական է, որ նոր փուլը չի կարող կրկնի հինը, պատմության մեջ երբեք այդպիսш բաներ չեն լինում»,- ասաց Վ. Մանուկյանը:

Արմեն Խաչիկյանը նաև հետաքրքրվեց, թե ինչպես է կազմելու նոր կառավարությունը, եթե կառավարությունը փոխվի ու ԱԺ-ն նոր վարչապետ ընտրի Վազգեն Մանուկյանին:

Վ. Մանուկյանը հիշեց, որ, օրինակ, 1990-ականներին, երբ եկան իշխանության, լարվածությունը մեծ էր կոմունիստների դեմ, բայց երբեք հարց չի դրել, որ կոմունիստները լավը չեն, պետք է իրենցից ազատվել: Հակառակը, իր կառավարությունում կոմունիստները շարունակել են աշխատել:

«Նույն ՀՀԿ-ում կան բազմաթիվ մեծ փորձ ունեցող մարդիկ, ազնվորեն ծառայել են պետությանը, բնական է՝ տեղ պետք է ունենան: «Իմ քայլում», ասում են, մարդիկ կան, որոնք ազնվորեն ծառայել են իրենց պետությանը, ունեն համապատասխան պրոֆեսիոնալ կարողություններ: Ինչո՞ւ չպետք է կարողանան ծառայել: Ի՞նչ է, որ ժամանակին եղել են Նիկոլը կողքը: Դա պետք է չափանիշ չլինի»,- ասաց նա:

Հանդիպման ժամանակ հարց հնչեց՝ Նիկոլին հեռացնելուց հետո ինչպե՞ս է պատկերացնում նիկոլիզմի, այսինքն՝ ագրեսիայի, անպատասխանատվության անջատումը հասարակությունից, «որպեսզի հետագայում նոր չարիքների, նոր Նիկոլների համար հենասյուներ չլինեն մեր հասարակության մեջ», ո՞րն է նրա տեսլականը հետագայում ավելի համերաշխ ու  պատասխանատու հասարակություն ունենալու հարցի մասին, Վ. Մանուկյանն ասաց, որ նիկոլիզմն առանց Նիկոլի արդեն գոյություն չունի:

«Բայց մտածողության…Կարծում եմ, որ արտաքին ուժերի ազդեցության կամ հենց ծառայության մեջ գտնվող մի քանի հոգի Հայաստանում կան, որոնք շատ վտանգավոր են, պետք է քննել, նայել ովքեր են այդ մարդիկ, պարզել, ոչ թե կասկածներով առաջնորդվել:

Մի զգալի մասն էլ կա, որ ընկած են գաղափարական ազդեցությունների տակ: Գաղափարի դեմ միակ պայքարը գաղափարն է, ագենտի դեմ պայքարն ագենտով է: Մենք պետք է հստակ ձևակերպենք, թե մեր հասարակության մեջ ինչը մենք չենք ընդունի: Մի բան  ինձ համար անընդունելի է, եթե օտար որևէ երկիր, լինի ԱՄՆ, ՌԴ, Թուրքիա, Իտալիա, կարողանան գաղտնի միջամտել մեր ընթացքի վրա: Դա պետք է բացառել: Բացառելու համար աշխարհում մշակված բազմաթիվ ձևեր կան: Ես էլ եմ բաներ մտածում:

Գտնում եմ, որ զուտ ռեպրեսիվ ապարտով չեն լուծվում հարցերը: Հարցեր կան օրենքով են լուծվում, հարցեր կան՝ գաղափարի դեմ գաղափար»,- նշեց Վ.Մանուկյանը:

Ինչ վերաբերում է ընտրական համակարգին, նա ասաց, որ փոխված Սահմանադրությունն ունի բազմաթիվ թերություններ: 

«Կամ Սահմանադրությունը պետք է շտկել, կամ անցնել հին Սահմանադրությանն ու այն շտկել: Եթե դրա որոշողը ես լինեմ, կնշանակի, որ ազատությունից զրկում եմ հասարակությանը: Այդ հարցը արժի՞ առաջին տարվա մեջ անել, հետո նոր գնալ ընտրություններին, թե՞ ընտրություններից հետո  ավելի երկար ժամանակում այդ գործն անել, թող որոշեն Ազգային ժողովում ներկայացված և չներկայացված քաղաքական ուժերը: Որպես վարչապետ կարող եմ խորհուրդ տալ, օգնել:

Բայց, կարծում եմ, որ Ընտրական օրենքն արժի մինչև հաջորդ ընտրություններ փոխել: Բոլոր կուսակցությունների կոնսեսուսով  ինչ-որ մի բան փոխել, որովհետև մեջը թերություններ կան»: