Ձեր վստահելի աղբյուրը

«Հայրենիքի փրկության շարժման» վարչապետի թեկնածու Վազգեն Մանուկյանը կարծում է, որ ներկա վիճակը շատ ավելի սարսափելի է, քան թվում է։

Այսօր երիտասարդների հետ հանդիպման ընթացքում նա նշեց, որ հայ ժողովուրդը ոչ միայն ունի տարածքային և մարդկային կորուստներ, այլ նաև կորցնում է վստահությունը երկրի ապագայի նկատմամբ, վիրավորված է բոլորի արժանապատվության զգացումը։

«Հարց է առաջանում՝ մենք կկարողանա՞նք ոտքի կանգնել և այդ ամենը մաքրել, սկսել կառուցել այն պետությունը, որի մասին երազում էինք։ Ես համոզված եմ՝ այո։ Պատերազմը չի ավարտվել, այլ ակտիվ մասն է վերջացել, բայց շարունակվում են լոկալ, տեղային փոքր պայքարները, որտեղ մենք մեզ զգում ենք անպաշտպան և կոտրված։ Բանակը և կառավարությունը պարալիզացված են, տեղի բնակչությունը չի ստանում օգնություն այդ կառույցներից, և հարց է առաջանում՝ ո՞նց է պետք այս իրավիճակից դուրս գալ և ո՞ւր գնալ»,- նշեց Վազգեն Մանուկյանը։

Վարչապետի միասնական թեկնածուն փոքր պատմական ակնարկ արեց՝ ներկայացնելով, թե ինչպես սկսվեց 1988 թվականի շարժումը։ Նա հիշեցրեց, որ ամեն ինչի հիմքը եղել է Արցախի ժողովրդի դիմումը, որ նա ուզում է դուրս գալ Ադրբեջանի կազմից և միանալ Հայաստանին։

«Այդ ժամանակ ամբողջ ընկալումն այն էր, որ մայր Հայաստանի փոքր զավակն իրենից օգնություն է խնդրում։ Եվ այդ պատկերն ինձ մոտ տպավորվել է։ Եվ այդ ոգևորությունը` դու օգնում ես քո հայրենակցին, որն ավելի թույլ վիճակում էր, մեր մեջ դրված էր։ Բայց այդ շարժումը շուտով վերածվեց ավելի մեծ բանի, մենք սկսեցինք երազել և իրականացնել մի ծրագիր, որով պետք է ստեղծեինք անկախ պետություն՝ հիմնված երեք սյուների վրա։ Դրանք ազգայինի, ազատության և ինքնությունը չկորցնելու գաղափարներն էին»,- ընդգծեց Վազգեն Մանուկյանը։

Ըստ նրա, Խորհրդային միությունը մարդկանց համար կյանքի բավականին բարեկեցիկ պայմաններ էր ապահովում, բայց փորձը ցույց է տալիս, որ որքան կյանքը բարեկեցիկ է լինում, այնքան մարդիկ ձգտում են ազատության, և հենց դա է պատճառը, որ մեզ համար այդ ժամանակ կարևորվում էր ազատությունը, քանի որ կյանքը բարեկեցիկ էր։

«Ազատության համար կարևոր է ժողովրդավարությունը, մենք կարողացա՞նք հասնել ժողովրդավարության։ Համեմատած Խորհրդային միության հետ, իհարկե, մենք հասանք ժողովրդավարության։ Ժողովրդավարությունը ենթադրում է ազատ մտածող մարդ և ընտրությունների միջոցով ձևավորվող իշխանություն։ Մենք մինչև հիմա էլ ազատ մտածող մարդկանց նոսր շերտ ունենք, իսկ ընտրությունների ինստիտուտը փչացավ, քանի որ ընտրությունների միջոցով իշխանությունը սկսեց վերարտադրել ինքն իրեն։ Այնուամենայնիվ, վերջին ընտրությունները մոտ էին ազատ ընտրություններին»,- ասաց նա։

Սակայն, Վազգեն Մանուկյանի խոսքով, երկիր կորցրած, պարտություն կրած ղեկավարը հազարավոր զոհեր տալուց հետո կառչած է աթոռին, և այս դեպքում, եթե ընտրություններ անցկացվեն, դրանք արդար և թափանցիկ չեն լինի։ Ավելին, ըստ նրա, դրանք կլինեն ամենասարսափելի ընտրությունները, որ երբևէ մենք տեսել ենք։

«Ժողովրդավարության երկրորդ կարևոր բաղադրիչը խոսքի ազատությունն է։ Մենք բավականին լիարժեք խոսքի ազատություն ունենք, չնայած վերջին շրջանում իշխանությունները մատ են թափ տալիս ԶԼՄ-ների վրա, բայց և այնպես, խոսքի ազատություն Հայաստանում կա։

Եվ երրորդ բաղադրիչը ազատ տնտեսությունն է։ Այն զարգացավ, բայց քանի որ նպատակ կար ամեն ընտրության ժամանակ վերարտադրել իշխանությունը, պետությունը այս կամ այն չափով միջամտում էր բիզնեսին, որպեսզի ապահովեր իր վերարտադրությունը։ Իսկ ահա չորրորդ կարևոր բաղադրիչը օրենքն է։ Մեր օրենքները շատ լավն են, դատական համակարգը լավը չէր, բայց զարգանում էր, իսկ Նիկոլ Փաշինյանի օրոք դատական համակարգը սկսեց ջարդվել, որպեսզի միարժեք ծառայի միայն իրեն»,- ասաց վարչապետի թեկնածուն։

Ինչ վերաբերում է ազգայինի բաղադրիչին, ապա Վազգեն Մանուկյանի խոսքով, դա բավականին մեծ չափով կա ժողովրդի մեջ։ Բայց, անգամ այս դեպքում, ըստ նրա, չպետք է մտածել, որ մարդիկ պետք է միանման լինեն, միանման մտածելակերպ ունենան։

«Մոդեռնիզացված ազգային մտածողությունը մեզ մոտ բավականին պակասում է, դա էլիտային պետք է բնորոշ լինի։ Եվ ազգայինն այն է, որ մեր երիտասարդները գնում են պատերազմ ու պաշտպանում իրենց հայրենիքը»,- նշեց նա։

Ըստ վարչապետի թեկնածուի, Հայաստանում հիմա ապրում են ոստիկանական պետությունում, և դա ամենաուժեղը խփում է երիտասարդությանը։

«Մենք հիմա ունենք ազգային, պետական ինստիտուտների փլուզում, բանակի փլուզում, ամոթալի պարտություն։ Եվ որ ասում են՝ մեկ է պատերազմ լինելու է, և մեկ է մենք պարտվելու էինք, ոչ, այդպես չէ։ Կարող էր պատերազմ չլինել, և, լինելու դեպքում էլ կարող էինք մենք հաղթել։ Այս վիճակից դուրս գալ նախկին իշխանություններով, հնարավոր չէ...։ Կարծում եմ՝ սա ամենաբարենպաստ ժամանակն է, որ մենք իրականացնենք այն երազանքը, որով սկսվեց 1988-ը»,- նշեց Վազգեն Մանուկյանը։