Ձեր վստահելի աղբյուրը

Այսօր «Հայրենիքի փրկության շարժման» կազմակերպած Արժանապատվության երթի ընթացքում «Մեկ Հայաստան» կուսակցության ղեկավար Արթուր Ղազինյանը դիմեց ՀՀ գլխավոր դատախազին, նշելով, որ նոյեմբերի 23-ին ՀՀ դատախազություն է ներկայացվել հաղորդում հանցագործության մասին, որում մանրամասն տեղեկություններ են նշվել ՀՀ մի խումբ բարձրաստիճան պաշտոնատար անձանց կողմից դավաճանության և այլ հանցավոր արարքներ կատարելու վերաբերյալ։

«Հաջորդ օրը Ձեր կողմից տրված պատախանում նշվել է, որ գեներալ-գնդապետ Մովսես Հակոբյանի հայտնի հարցազրույցի վերաբերյալ ՀՔԾ-ում արդեն իսկ հարուցված է քրեական գործ՝ ՔՕ  308-րդ հոդվածի երկրորդ մասով, այն է՝ պաշտոնեական դիրքի չարաշահում, լիազորությունների չարաշահում, որն անզգուշությամբ հանգեցրել է ծանր հետևաքների»,- նշեց Արթուր Ղազինյանը։

Նրա խոսքով, այդ գործը վերաբերում է սեպտեմբերի 27-ից նոյեմբերի 9-ը ընկած ժամանակահատվածում Արցախում տեղի ունեցած պատերազմի ընթացքում ՀՀ մի խումբ բարձրաստիճան պաշտոնատար անձանց կողմից կատարված այնպիսի արարքներին, որոնք հակասել են ՀՀ ՊՆ նորմերին և կանոնակարգումներին՝ բացասական ազդեցություն ունենալով ԶՈւ կազմի վրա, ինչպես նաև պատերազմի ելքի վրա։

«Մովսես Հակոբյանը իր հարցազրույցում այլ աղմկահարույց բացահայտումների հետ մեկտեղ հայտնել է, որ սեպտեմբերի 27-ին սանձազերծված պատերազմի երրորդ օրը վարչապետ Նիկոլ Փաշինյանի հրահանգով արձակվել է հրաման, որով կանգնեցվել է ԶՈւ լրահամալրումը, փոխարենը՝ առաջնագիծ են ուղարկվել կամավորականներ, ինչի պատճառով մարտական գործողությունների ընթացքում զոհված և վիրավորված անձնակազմի լրահամալրումը չի իրականացվել»,- ներկայացրեց «Մեկ Հայաստան» կուսակցության ղեկավարը։

Այսպիսով, Արթուր Ղազինյանը նշեց, որ այժմ իրենք պահանջում են մինչև վաղը ժամը 17.00-ն տրամադրել տեղեկատվություն, թե հիշատակված քրեական գործի շրջանակներում հարցաքննվե՞լ է արդյոք Նիկոլ Փաշինյանը։

«Եթե այո, ապա ինչպիսի վիճակում է նա հարցաքննվել, և ի՞նչ է ասել։ Եթե չի հարցաքննվել, ապա խնդրում եմ ասել՝ ինչ պատճառով։ Բացի այդ, Մովսես Հակոբյանի մատնանշած ձայնագրությունը քննության առարկա դարձե՞լ է, թե՞՝ ոչ, եթե այո, ապա ի՞նչ է հաջողվել պարզել, եթե ոչ, ապա ինչո՞ւ այն  չի դարձել քննության առարկա։ Երրոդ. առգրավվե՞լ է արդյոք Մովսես Հակոբյանի հիշատակած թիվ 00038 գաղտնի հրամանը, որով վերացվել է հինգ մարտական գունդ, դադարեցվել է ԶՈւ լրահամալրումը։

Չորրորդ. Պարզվե՞լ է արդյոք, թե ովքեր են ներկա գտնվել զորքերի լրահամալրումը դադարեցնելու վերաբերյալ Նիկոլ Փաշինյանի մոտ տեղի ունեցած քննարկմանը, հիշյալ հարցի շուրջ հարցաքննվե՞լ է արդյոք ՀՀ ԶՈւ ԳՇ պետը, թե՞ ոչ։

Եվ հինգերորդ. դարձե՞լ է արդյոք քննության առարկա, թե ինչպես է ստացվել, որ ԶՈւ ԳՇ պետի կողմից պատերազմի առաջին իսկ օրերին կատարված տագնապային կանխատեսումների պայմաններում վարչապետ Փաշինյանն, այնուամենայնիվ, կասեցրել է լրահամալրումը»,- ներկայացրեց հարցերը Արթուր Ղազինյանը։

Նա տեղեկացրեց, որ նշյալ հարցերից որևէ մեկը նախաքննական գաղտնիք չի պարունակում, ուստի մինչև վաղը 17.00 պետք է լինի դատախազության արձագանքը։