Ձեր վստահելի աղբյուրը

14:53

Անհետ կորած զինծառայողներից մեկի հարազատը փորձեց ճաղերի վրայով անցնել ներսի հատված, սակայն ոստիկանները թույլ չտվեցին: Իսկ ներսում գտնվող հարազատների մի մասն այս պահին հանդիպման են, սակայն դեռ պարզ չէ, թե ով է նրանց ընդունել:

ՊՆ դիմաց կանգնած հարազատաներից մեկն ասաց. «Իմ քրոջ որդին չկա հոկտեմբերի 27-ից, իսկ իմ որդին հիմա Ասկերանում է, երեխայի հոգեկանը լրիվ խանգարված է, ոտքերին փուչիկներ են: Աևձակուրդ էլ չեն տվել:

Տարան, կերան երեխուս գլուխը: Արդեն գժվեցինք, որևէ նորմալ տեղեկություն չեն տալիս: Ամեն օր մի բան են ասում, խաբում են: Սրանք կերան մեր կյանքը:

Պետք է բոլորը դուրս գան: Թուրքն արդեն Հայաստանում է, շրջափակման մեջ ենք, մտնելու է մեր տուն, բոլորին փրթի: Ներսի թշնամիները վաճառում են մեզ»:

13։55

Մայրերից մեկն ասաց, որ որդին սեպտեմբերի 30-ին գնացել է Ջաբրայիլ ու մինչև օրս տեղեկություն չունի:

«Երկու անչափահաս երեխա ունի: Քշում են այստեղ, այնտեղ: Փաստերով գնում ենք, ոչ մի օգնություն չկա: Ինչքա՞ն կարելի է: Գերեզման էլ չունենա՞ այդ երեխան: Բոլորիս համար է գնացել:

Փաշինյանը լավ էլ գիտեր, որ թիկունք չունի կռվելու համար: Ինչո՞ւ արեց սա: Ջանդամ նրանք կերել էին, այսքան զոհեր չէին տվել, մեղքը չեն այդ երեխաները:

Փաշինյանը գիտեր, որ զենք չունի: Ժանգոտած պատրոնը տվել են իմ տղուն, ով վարորդ էր, տարել առաջին գիծ, որ կռիվ տա: Չէր կարում, թող այդ կռիվը չաներ: Ինչո՞ւ տարար այսքան երեխեքի կոտորեցիր, այսքան տների լույսը մարեցիր»,- արտասվելով ասաց անհետ կորածի մայրը:

13։35

Անհետ կորած զինծառայողներից մեկի մայրն ասաց. «Ոչ մեկ ոչ մի ձևով չի մտածում, երեխայից լուր չկա: Ափսոս չէ այս շենքը, նստել են այստեղ՝ ի՞նչ են անում: Գոնե մի գործ անեն, ծնողների հետ ընկեն, ման գան ոսկորները: Էլ երեխա չկա: Մեռանք  ասելով Փաշինյանին՝ ողջ երեխաներ կան, անտառում են: Ասում են՝ չկան, որ լինեն գնում են, ման են գալիս: Այս գիշեր 100 գերի են տարել, 10 հոգու էլ սպանել են: Ծնողին էշի տեղ են դնո՞ւմ: Իրենց չենք հավատում, խաբում են, էլ չենք դիմանում»:

Մայրերից մեկն ասաց. «Երեխուդ տաս պետությանդ, էսօր ընկնես հետևից, որ մարմինը գտնե՞ս»:

«Ո՞ւր են մեր երեխեքը… 20 օրվա ծառայած երեխուն տարաք փուռը տվիք, էսքան ոստիկան ինչի՞ եք բերել ստեղ»,- նշեց մեկ այլ հարազատ:

Անհետ կորած ժամկետային զինծառայողի հայրն ասաց՝ վերջին ստացած տեղեկությունն այն է, որ հոկտեմբերի 3-ին որդին վիրավորվել է. «Անհետ կորած է, որևէ բան չենք իմանում, ամեն տեղ դիմել ենք, որևէ նորություն չեն ասում»: 

Հարազատներից մեկը բարկացած գոռում էր. «Արա Նիկոլ, գլխարկս հանեմ, դեմքս հիշի: Մի օր իրար տեսնելու ենք, հիշի դեմքս: Տաս տարի էլ անցնի, իրար տեսնելու ենք: Ո՞ւր են այն 88 պատգամավորները»:

13։15

«Դու սիրտ ունե՞ս: Տուն չեմ գնում, նաֆարս սաղ վարի է գնում»,- դիմելով ոստիկաններին՝ ասաց անհետ կորած զինծառայողի հարազատը:

«Երեխուս տվել եմ, ումից պետք է ուզեմ: 18 տարեկան լույսի պես երեխեքին տարաք փուռը տվեցիք»,- նշեց մեկ այլ ծնող:

Ոստիկաններից մեկն ասաց, որ ներսում ծնողներ կան, ոստիկանապետն էլ է ներսում: Բայց դրսում գտնվող ծնողներն իրենք էլ են ուզում ներս մտնել:

12։46

Անհետ կորած զինծառայողների ծնողները հավաքվել են պաշտպանության նախարարության դիմաց: Նրանց առջև փակ է անցակետի դուռը: Տղամարդկանցից ոմանց հաջողվեց անցել դարպասներն ու քայլել դեպի ՊՆ վարչական շենքի: Որոշ ծնողներ էլ կոտրեցին ՊՆ ապակյա դուռն ու մտան ՊՆ:

«Եթե պատերազմը 40 օր ավարտելուց հետո 100 գերի են տարել Հադրութի տարածաշրջանից, Ջաբրայլից, անտառներից հավաքել են, ի՞նչ է մտածում այստեղ վեր ընկած ղեկավարությունը:

Հույս ունեինք, որ անտառներում թաքնված են մեր երեխաները, հիմա այդ միակ հույսն էլ արդեն չկա»,- ասում է անցակետի դռան ճաղերի մոտ կանգնած անհետ կորած զինծառայողներից մեկի հարազատը:

Այս պահին ոստիկանական ուժեր են շարվում այն դարպասների մոտ, որտեղից ծնողներն ասել են անցնելու են դեպի ՊՆ վարչական շենք, եթե հինգ րոպեից իրենց չընդունեն: 

«Մի տան միջից 10 զոհ ունենք, էլ չեմ դիմում: Ո՞ւր են մեր երեխաները»,- ասաց հարազատներից մեկը:

Նրանք նշեցին, որ իրենց ընդունել են ՊՆ-ում, կառավարությունում, Կարմիր խաչում, ամենուր նույն պատասախանն են ստանում:

«Խաբում են: Մեր երեխեքի գլուխը կերան»,- շեշտեցին ծնողները:

«Բացեք դռները»,- բղավում են անհետ կորած զինծառայողների ծնողներն ու հարվածում դռներին: 

Նրանց հաջողվեց կոտրել հսկիչ անցակետի ճաղերը, որից այն կողմ արդեն ապակյա դուռ է, որը կրկին փակ է: Նրանք պահանջում են ոստիկաններից, որպեսզի բացեն դուռը: