Ձեր վստահելի աղբյուրը

Իրավաբաններն ու իրավապաշտպանները բողոքի ակցիա են իրականացնում ՀՀ Գլխավոր դատախազության դիմաց։

Նրանց հետ հանդիպման է դուրս եկել գլխավոր դատախազի խորհրդական Գոռ Աբրահամյանը։ Նա իրավապաշտպաններին հաղորդեց, որ գլխավոր դատախազը հարգելի պատճառներով չի կարող ընդունել նրանց։

«Որքանով տեղյակ եմ, զինդատախազը չի մերժել ձեր հանդիպման առաջարկը»,- նշեց Գոռ Աբրահամյանը։

Ի պատասխան իրավապաշտպան Ռուբեն Մելիքյանն ասաց, որ իրենց ասել են երեք հոգանոց խմբով հանդիպել զինվորական դատախազին, սակայն իրենք չենք կարողացել պատվիրակություն կազմել, քանի որ երեսունից ավելի իրավապաշտպաններից յուրաքանչյուրն իր հարցն է ունեցել։

«Բայց նախադեպ կա, երբ 2018 թվականին գեներալ Մանվել Գրիգորյանի գործով մարդիկ եկել էին գլխավոր դատախազի մոտ, և նա իջել ու հանդիպել էր նրանց։ Մենք ակնկալում էինք, որ մեզ էլ նույն տարբերակով կընդուներ պարոն Դավթյանը։ Հիմա դուք եք իջել, շնորհակալ ենք, իհարկե, բայց ասում եք, որ հարգելի պատճառներով չենք կարող հանդիպել գլխավոր դատախազին»,- նշեց իրավապաշտպանը։

Սակայն, Գոռ Աբրահամյանը հակադարձեց, ասելով, որ արված համեմատությունն այդքան էլ տեղին չէր, քանի որ այն ժամանակ ինչ-որ որոշման հետ կապված է եղել հանդիպումը գլխավոր դատախազի և քաղաքացիների միջև։

«Բայց ձեր հարցերը, որքանով հասկացա, վերաբերում են պատերազմի հետ կապված վերջին իրադարձություններին և դրանց հետ կապված քրեական վարույթներին։ Բայց ինքներդ էլ գիտեք, որ հարցերը կարող են առնչվել հանգամանքների, որոնք իրենց մեջ գաղտնիք են պարունակում, և դրանք համեմատել այն մի փոքր պարզաբանման հետ, որը 2018-ին գլխավոր դատախազն է արել, կարծում եմ, համադրելի չէ։ Ամեն դեպքում, ես ցանկանում եմ նշել, որ հիմա էլ դուք որևէ կաշկանդվածություն չունեք, և ցանկացած պահի զինդատախազը պատրաստ է ձեզ ընդունել, բայց փոքր խմբով»,- ասաց Գոռ Աբրահամյանը։

Իրավաբաններից մեկը, արձագանքելով Գոռ Աբրահամյանի խոսքին, նշեց, որ եթե գաղտնիք պարունակող նյութեր լինեին, ապա իրենք դրանց մասին ԶԼՄ-ներից չէին իմանա։

«Հիմա ես կոնկրետ հարց ունեմ, ասվում է, որ 1400 հայկական անձնագիր է տրամադրվել ադրբեջանցիներին, այդ առումով գործ հարցուցվե՞լ է»,- հարցրեց նա։

Ի պատասխան, Գոռ Աբրահամյանը նշեց, որ այո, այդ հարցը քննության ենթակա է։

«Չի եղել որևէ հրապարակում, որը որոշակիություն է պարունակել հանցակազմի առումով, և չի հայտնվել դատախազության տեսադաշտում։ Չի եղել նման դեպք»,- վստահեցրեց նա։

Ռուբեն Մելիքյանն էլ արձագանքեց գլխավոր դատախազի խորհրդականի հայտարարությանը, թե պետք չէ համեմատական անցկացնել 2018-ին տեղի ունեցած մի դեպքի և ներկայիս իրավիճակի միջև։

«Այո, դուք ճիշտ եք։ Մենք այն ժամանակ հայրենիք չէինք կորցրել, 5000 և ավելի զոհ չէինք ունեցել, գերիներ ու անհետ կորածներ չկային այն ժամանակ։ Հիմա խիստ մեծ հանրային պահանջ կա, որպեսզի եղած հարցերին պատասխաններ տրվեն»,- ասաց նա։