Ձեր վստահելի աղբյուրը

«Այն հիվանդությունների գծով, որոնց դեպքում ակնհայտ է՝ քաղաքացիներն առաջիկայում ստանալու են հաշմանդամության խումբ, մինչև այդ խմբի ստացումը, հնարավորություն կունենան հիմնադրամի կողմից ստանալ աջակցություն՝ առավելագույնը 6 ամիս ժամկետով»,- կառավարության նիստում հայտնեց աշխատանքի և սոցիալական հարցերի նախարար Մեսրոպ Առաքելյանը՝ ներկայացնելով 2020 թվականի սեպտեմբերի 27-ին Ադրբեջանի սանձազերծած ռազմական գործողությունների հետևանքով վնասվածք կամ խեղում ստացած զինծառայողների աջակցության միջոցառումը հաստատելու մասին նախագիծը:

Նա հայտնեց, որ համաձայն «Զինծառայողների կյանքին և առողջությանը պատճառած վնասների հատուցման մասին» օրենքի՝ հիմնադրամի կողմից աջակցություն են ստանում հաշմանդամություն ստացած անձինք, սակայն քանի որ գործընթացը որոշակի ժամանակ է պահանջում մինչև կարգի հաստատումը, նախագծով առաջարկվում է, տալ միջանկյալ լուծում:

Նախարարաը հայտնեց, որ հիմնադրամը յուրաքանչյուր ամիս տրամադրում է աջակցություն 100 հազար դրամի չափով, իսկ նախագծով առաջարկվում է այդ գումարն ավելացնել ևս 200 հազար դրամով՝ պետբյուջեի միջոցներով՝ 6 ամիս ժամկետով՝ մինչև հիմնադրամի հիմնական շահառու դառնալը:

Նախագծով սահմանվում է, որ ամենամսյա դրամական վճարի տրամադրումը դադարեցվում է, եթե վնասվածք կամ խեղում ստացած զինծառայողը ճանաչվել է հիմնադրամի շահառու, կամ լրացել է վճարման 6 ամիսը,  կամ  էլ եթե որոշում կայացնելուց հետո քրեական վարույթն իրականացնող մարմնի կողմից ներկայացվել են տեղեկություններ, որ զինծառայողը  վնասվածքը կամ խեղումը ստացել է զորամասը կամ ծառայության վայրը ինքնակամ թողնելու կամ դասալքության կամ կամովին գերի հանձնվելու կամ մարտադաշտն ինքնակամ լքելու հետևանքով և այլն: