Ձեր վստահելի աղբյուրը

Իրավիճակը դուրս եկավ վերահսկողությունից, այս լարվածությունը շարունակվում էր տարիներ շարունակ։ Այս մասին մամուլի ասուլիսում ասաց ՌԴ նախագահ Վլադիմիր Պուտինը՝ պատասխանելով հարցին, թե ինչու հիմա Լեռնային Ղարաբաղում իրավիճակը սրվեց։

Պուտինը նշեց, որ Ռուսաստանի դիրքորոշումը կայանում է նրանում, որ պետք է առանց արյունահեղության լուծվեր հարցը։

«Երկար տարիներ մենք ելնում էինք նրանից, որ Ադրբեջանին պետք է վերադարձվի 7 շրջանները, Լեռնային Ղարաբաղի կարգավիճակը պետք է մնա անփոփոխ, այսինքն՝ մնա ապագային, պետք է ամրագրվի ստատուս-քվոն, բայց պարտադիր շփման հնարավորության ստեղծմամբ Հայաստանի ու Լեռնային Ղարաբաղի միջև՝ Լաչինի միջանցքով»,- ասաց Պուտինը։

Թուրքիայի դիրքորոշումը, Պուտինի խոսքերով, այն է, որ «Թուրքիան պաշտպանում է տարածքների վերադարձը, որոնք օկուպացվել էին 90-ականներին»։ Միջազգային իրավունքի տեսանկյունից այդ տարածքները Ադրբեջանի մաս է կազմում։ Պուտինը նաև կրկնեց, որ Հայաստանը Լեռնային Ղարաբաղի անկախությունը չի ճանաչել։

Ըստ նրա, իրավիճակը առավել բարդ է, քան միջազգային իրավական արմատները։ Էթնիկ հակամարտությունը, որը սկսվեց Սումգայիթում, ապա Լեռնային Ղարաբաղում, Պուտինի խոսքերով, ամեն կողմն ունի իր ճիշտը։

«Լեռնային Ղարաբաղի հայերը վերցրեցին զենք, որ պաշտպանեն իրենց կյանքն ու արժանապատվությունը»,- ասաց Պուտինը։

ՌԴ նախագահը նշեց՝ եռակողմ հայտարարությամբ պայմանավորվել են, որ զինված գործողությունները դադարեցվում են ու կողմերը կանգնում են ստորագրման պահին եղած դիրքերում, սակայն այստեղ առաջանում են տեխնիկական խնդիրներ ենթակառուցվածքների հետ կապված՝ հայկական ու ադրբեջանական կողմերի համար, ինչը պետք է լուծել հանգիստ՝ բանակցային գործընթացում։

«Այս հնարավորությունը տալիս է եռակողմ հայտարարությունը, քանի որ այնտեղ ասվում է, որ հրադադարից հետո պետք է լինի տարածաշրջանում լիակատար նորմալացում, տնտեսական, հաղորդակցության պոտենցիալի բացում, որը վերաբերում է ավտոմոբիլային, երկաթուղային ուղիներին, Նախիջևանին, Հայաստանի հարավին և հյուսիսին։ Եռակողմ հայտարարությունը դադարեցրեց արյունահեղությունը, ինչը ամենակարևորն է»,- ընդգծեց Պուտինը։

Հրադադարից ռեժիմի խախտման հետ կապված Պուտինը նշեց, որ այն միայն մեկ անգամ է եղել ու հույս հայտնեց, որ այլևս չի կրկնվի ու կհաջողվի նստել բանակցությունների սեղանին՝ իրենց, Մինսկի խմբի համանախագահության շրջանակներում, կարևոր չէ։

Պուտինի խոսքերով, հույս ունեն, որ միջազգային միջնորդները վերջապես խոսքից գործի կանցնեն ու կսկսեն օգնել մարդկանց, առաջին հերթին Լեռնային Ղարաբաղ վերադարձողներին, ու միայն Ռուսաստանն այն չի անի։

«Մենք մեր կողմից պատրաստ ենք շարունակել այդ աշխատանքը։ Ինչ վերաբերում է խաղաղապահների թվի մեծացմանը, ապա դա հնարավոր է, բայց միայն բոլոր կողմերի պայմանավորվածության արդյունքում, այդ թվում Ադրբեջանի»,- ասաց Պուտինը, հավելելով, որ դա տեխնիկական հարց է։