Ձեր վստահելի աղբյուրը

«Մեկ Հայաստան» կուսակցության ղեկավար Արթուր Ղազինյանը Արժանապատվության երթի ընթացքում հայտնեց, որ ՀՀ գլխավոր դատախազությանը տրվում է սեղմ ժամկետ՝ իրականացնելու քննչական գործողություններ։

«Հայաստանի արժանապատիվ քաղաքացիներ, հիշում եք չէ՞, որ Նիկոլը դատվելու է, հիշում եք չէ՞, որ Նիկոլը մենակ չի, ուրեմն մենք գործ ունենք ոչ թե մեկ մարդու պետական դավաճանության, այլ կազմակերպված հանցավոր խմբի կողմից, պետությունը թուլացնելու նպատակով իրականացված համալիր  գործողությունների հետ, որի արդյունքում տեղի է ունեցել հայկական բանակի կազմաքանդում»,- ասաց նա։ 

Արթուր Ղազինյանը նաև հիշեցրեց , որ երեկ դատախազություն դիմում են ներկայացրել, որում ներկայացրել են մի շարք հարցեր՝ կապված պետական դավաճանության հետ։ Նա տեղեկացրեց, որ այսօր ստացել են դատախազությունից պատասխան, որում, ըստ նրա, մասնավորապես, ասված է․

«Ձեր կողմից բարձրացված հարցերն այս պահին, ելնելով գործի շահերից, հրապարակման ենթակա չեն։ Սակայն միևնույն ժամանակ հայտնում են, որ  ձեռնարկվել և ձեռնարկվում են բոլոր միջոցները  քրգործի լրիվ, օբյեկտիվ և բազմակողմանի բոլոր հանգամանքները, այդ թվում՝ նաև մեր կողմից երեկ իրենց հանձնված հանգամանքները բացահայտելու նպատակով։ Դատախազությունը խոստացել է նաև հրապարակային ներկայացնել գործի քննության ընթացքում հայտնաբերված բոլոր տվյալները»։

Քաղաքական գործիչը նաև հայտնեց, որ հաշվի առնելով դատախազության պայմանական կոնստրուկտիվ վարքագիծը, տալիս են ժամկետ։

«Մինչև  երկուշաբթի օրը , ժամը՝ 14։00-ն, իրականացնել հետևյալ քննչական գործողությունները՝

- հարցաքննության հրավիրել Նիկոլ Փաշինյանին
- նրան շնորհել կասկածյալի դատավարական կարգավիճակ
- անհապաղ ձերբակալել պետական դավաճանության մեղադրանքով Նիկոլ Փաշինյանին
- այնուհետև կասեցնել նրա լիազորությունները ՀՀ վարչապետի պաշտոնում։

Իսկ հաջորդ քայլը, որն ակնկալում ենք դատախազությունից՝ Նիկոլ Փաշինյանին քրեական օրենսգրքի 299 հոդվածի պետական դավաճանություն մեղադրանքի առաջադրում և կալանքը որպես խափանման միջոց կիրառելու պահանջ»,- ներկայացրեց Ղազինյանը։