Ձեր վստահելի աղբյուրը

19։59

«Երեքշաբթի, ժամը 12-ից ողջ երկրով հայտարարվել է գործադուլ, դասադուլ: ժամը 12-ին Հանրապետության հրապարկում լինելու է այն վճռական հեռացման պահանջը, որից հետո Հայաստանը դառնալու է առանց Նիկոլ Հայաստան։ Իսկ վաղը «Գարեգին Նժդեհ»-ի հրապարակում հավաքվում ենք ժամը 18.30-19.00-ն՝ ջահերով ու մոմերով, շարժվելու ենք մեր պայքարի, մեր հաղթանակների, ցավոք, նաև մեր պարտության սրբավայր «Եռաբլուր»:

Լինելու է մեր հերոսների հիշատակի խնկարկման երեկո»,- «Արժանապատվության երթ»-ի ավարտին Ֆրանսիայի հրապարակում հայտարարեց ՀՅԴ ԳՄ ներկայացուցիչ Գեղամ Մանուկյանը։

Նա նաև տեղեկացրեց, որ շաբաթ օրը Ազատության հրապարակում, ժամը՝ 15։00-ին լինելու է կարճատև հանրահավաք, որից հետո Սուրբ Գրիգոր Լուսավորիչ եկեղեցում մատուցվելու է հոգեհանգստյան կարգ՝ ի հիշատակ մեր բոլոր նահատակների, հերոսների։

18։59

«Հանրապետության գլխավոր դատախազը ի պաշտոնե պարտավոր է քրգործի շրջանակներում ոչ միայն կասեցնել Նիկոլ Փաշինյանի պարտականությունները, այլ նաև նրա նկատմամբ ձեռնարկել օրենքով նախատեսված գործողություններ՝ ձերբակալություն, կալանավորում և արդար դատարանով նրա պատժի սահմանում»,- «Արժանապատվության երթի» ժամանակ հայտարարեց ՀՅԴ անդամ Արծվիկ Մինասյանը։

«Չափազանց կարևոր է, որ ժողովուրդը միավորվի Հայրենիքի փրկության շարժման շուրջ և պահանջատեր դառնա սուբյեկտներին»,- կոչ արեց նա։

18:40

Այն, ինչ անում է Նիկոլ Փաշինյանի իշխանությունը, դա հանցագործություն է ՀՀ-ի նկատմամբ։ Այս մասին «Արժանապատվության երթի» ժամանակ հայտարարեց քաղաքագետ Անդրանիկ Թևանյանը:

«Հայաստանում այս վիճակը տիրում է, քանի որ բացարձակ անիշխանություն է, բացարձակ անտերություն։ Այս իշխանությունը պետք է փոխվի, որպեսզի ամենօրյա հսկայական աշխատանք կա կատարելու, կատարենք։ Լուծենք այն խնդիրները, որոնք կկայունացնեն այս իրավիճակը և Հայաստանը դուրս կբերվի այս իրավիճակից։ Կապիտուլացիան մինչև հիմա շարունակվում է՝ արդեն Հայաստանի սահմանում։ Գիտեք, GPS-ով Հայաստանի սահմանները գծելը պետական դավաճանություն է և դավաճանության շարունակություն»,- հայտարարեց նա։

18:32

«Նիկոլ Փաշինյան, քո հրաժարականը պահանջում է ողջ արժանապատիվ հայությունը։ Քեզ չհաջողվեց երկու տարում պառակտել ժողովրդին, որովհետև մենք միասնական ենք, հող ու հայրենիք պաշտել գիտենք»,- ասաց ՀՅԴ անդամ Լիլիթ Գալստյանն ու հավելեց․

«Նիկոլ Փաշինյան, այսօր քաղաքական օրակարգում մի հարց կա՝ դա քո հեռացումն է»։

18։20

րժանապատվության երթի մասնակիցներն այժմ Բաղրամյան պողոտայում են։ Բազմաբնակարան շենքերի լուսամուտներից բնակիչները նրանց ողջունում են և իրենց աջակցությունն են հայտնում։

18։03

«Ես առհասարակ կուսակցական չեմ եղել և չեմ զբաղվել քաղաքականությամբ։ Ուղղակի իրավիճակից դուրս է եկել այս ամենը, ամեն օր գերիներ ենք ունենում։ Մեր Հայաստանի սահմանը ՝ Սյունիքի սահմանն, անցնում է ադրբեջանցիներին։ Եթե մարդիկ մտածում են ինչ-որ շահի համար ենք այստեղ եկել նման բան գոյություն չունի։

Կոնկրետ ես, իմ երեխաների հետ եկել եմ այստեղ, քանի որ Սյունիքում բարեկամներ ունենք և այդ ճանապարհը անցնում է Ադրբեջանի տարածքով, այսինքն՝ ցանկացած պահի Սյունիքը կարող է շրջափակման մեջ հայտնվել, եթե Ադրբեջանը կամենա»,- ասաց երթի մասնակից մի կինը, որը չնայելով տեղացող անձրևին եկել էր մանկասայլակով երեխաների հետ։ 

Քաղաքացին նաև կարծիք հայտնեց, որ վարչապետը չի կարողանում բանակցել Ալիևի հետ, քանի որ ստորագրել է այդ կապիտուլացիոն հայտարարությունը։

«Ալիևն ամեն օր ծաղրում է, վիրավորանքներ է հասցնում, դա նշանակում է, որ երբևէ չի նստի սեղանի շուրջ բանակցելու»,- ասաց նա։

17:58

Երթի մասնակիցներն անցնելով Հալաբյան, ապա Կիևյան փողոցով, այս պահին Օրբելի փողոցում են։ Նրանք Բաղրամյան պողոտայով կքայլեն դեպի Ֆրանսիայի հրապարակ։

17։52

Դաշնակցական գործիչ Արծվիկ Մինասյանն էլ երթի ընթացքում հայտարարեց. «Նիկոլ Փաշինյանն ու իր ոհմակը ոչ միայն տվեցին Արցախը, ոչ միայն զիջեցին մեր հայրենի հողը, ոչ միայն զոհեց մեր հինգ հազար հայորդիներին, հաշմանդամ դարձրեց հազարավոր մարդկանց, տնազուրկ դարձրեց հարյուր հազարավոր ընտանիքների, այսօր արդեն նաև Սյունքիի սահմանային դիրքերն է հանձնում։

Նա իրավունք չունի որպես ՀՀ ղեկավար հանդես գալու։ Նա հողատու է, նա դավաճան է։ Նա դավաճանել է բոլորիս՝ Հայաստանից մինչև Սփյուռք, Արցախից մինչև Ջավախք, նա դավաճանել է նախնիներին, բոլոր նահատակներին։ Նա իրավունք չունի, իրավունք չունի, որովհետև նա ձեռնտու է միայն Ադրբեջանի ու Թուրքիայի իշխանություններին։ Նա իրավունք չունի ներկայացնելու հայ ժողովրդին, Հայաստանի Հանրապետությունը։ Նաև այդ է պատճառը, որ մենք ասում ենք, մինչև Նոր Տարի Նիկոլ Փաշինյանը պետք է հեռանա վարչապետի պաշտոնից։ Նա իրավունք չունի Նոր Տարուն դիմելու մեր ժողովրդին։ Նիկոլ Փաշինյանը ջարդել, ավիրել է բոլորին, նա չի կարող 2021 թ. մուտք գործի որպես ՀՀ վարչապետ։ Մնացել են հաշված օրեր, նա դուրս է շպրտվելու այդ պաշտոնից»։

Արծվիկ Մինասյանը ընդգծեց, որ Փաշինյանն ու իր ֆեյքային բանակը փորձում են սևացնել բանակը, զինվորին, ապա ընդգծեց՝ զինվորը, բանակը հերոս է։ Նա կոչ արեց Սփյուռքին ոտքի կանգնել, քանի որ Փաշինյանը դավաճանել է նաև ամեն վայրկյան նյութական, ֆինանսական ու այլ աջակցությամբ բանակի ու հայրենիքի կողքին կանգնած Սփյուռքին։

«Բոլորը միասին՝ դավաճան, հեռացիր, դավաճան, հեռացիր»,- խոսքն ամփոփեց Մինասյանը։

17։40
Երթն առաջնորդողներից ԱԺ նախկին փոխնախագահ Արփինե Հովհաննիսյանը հայտարարեց՝ այստեղ են Նիկոլ Փաշինյանին ասելու, Հայաստանը լինելու է, ապրելու է։

«Նիկոլ Փաշինյանը երբ ասում էր, կամ ես կլինեմ Հայաստանի վարչապետը, կամ Հայաստանը վարչապետ չի ունենա, անամոթաբար շանտաժի էր ենթարկում մի ողջ ժողովրդի, իսկ հիմա ասում է՝ կամ ես կլինեմ վարչապետ, կամ Հայաստանը չի լինի։ Մենք այսօր հավաքվել ենք այստեղ, որպեսզի դավաճանին ասենք, Հայաստանն առանց քեզ լինելու է»,- բարձրախոսով հնչեցրած ելույթում հայտարարեց Արփինե Հովհաննիսյանը։

17:24

Շարունակելով խոսքը՝ Գեղամ Մանուկյանը դիմեց պատուհաններից երթին հետևող աջափնյակցիներին, ասաց, Փաշինյանն այնպիսի իրավիճակ է ստեղծում, որ վաղը Կապանը կրակի տակ է լինելու։ Նա կոչ արեց բազմոցին նստած ու ուղիղ եթերում պայքարի ընթացքին հետևողներին դուրս գալ փողոց, միանալ իրենց։

«Մի բան հասկացեք, սա քաղաքական կռիվ չէ, պետք է թուրքը գա հասնի ձե՞ր տանը, նոր խելքի գա՞ք։ Մի բան հասկացեք, այն ինչ կատարվում է Հայաստանում, գոյամարտ է։ Այստեղ չի լինելու սպիտակ ու սև։ Նիկոլ, հեռացիր»,- հայտարարեց Մանուկյանը։

Նա նշեց, որ 2.5 տարի երկրի վարչապետի աթոռը զբաղեցրած մարդը անընդհատ սուտ է խոսել, խճճվել է իր ստերի մեջ, ասաց, որ երեկ էլ ստեց՝ իբր ռուսներ են շրջափակվել ԼՂ-ում, սակայն ապտակ է ստացել ռուսական կողմից։

«Բայց մեր երկիրն է  խայտառակ լինում։ Նա պետք է հեռանա։ Մեր երկիրը պետք է ապրի առանց Նիկոլի»,- ընդգծեց նա։

17։18

Երևանի Աջափնյակ վարչական շրջանում գտնվող Թումոյի այգու հարակից տարածքն այս պահին բազմամարդ է, այսօր հենց այստեղից մեկնարկեց Նիկոլ Փաշինյանի հրաժարականի պահանջով Արժանապատվության երթը։

Գյումրեցի պրոդյուսեր Ռուբեն Մխիթարյանի հեղինակած «Իմ Արցախ, իմ հող ու ջուր, իմ Հայաստան» երգի ներքո՝  եռագույներով, «Հայրենիքը փրկողը հենց դու ես» գրությամբ մեծ ցուցապաստառով, «Հայաստան, Հայաստան», «Առանց Նիկոլ Հայաստան» բացականչություններով ու վանկարկումներով երթի մասնակիցները սկսեցին քայլել։

Քաղաքագետ Անդրանիկ Թևանյանը հայտարարեց՝ քայլելու են մինչև Ֆրանսիայի հրապարակ։
Դաշնակցական գործիչ Գեղամ Մանուկյանը հայտարարեց՝ այս պայքարը հանուն հայրենիքի է, հանուն մեր երկրի է, հանուն արժանապատվության։

«Ձեզանից շատերը հարազատներ ու ազգականներ ունեն Կապանում, Գորիսում, Զանգեզուրում, Մեղրիում։ Հենց այսօր Նիկոլ Փաշինյանը գողանում է նրանց անվտանգությունը։ Հրավիրում է, թուրքին գրկաբաց ընդունում է Գորիսի, Ղափանի մատույցներում, և դրա համար է, որ մենք ողջ ժողովրդի անունից ասում ենք՝ առանց Նիկոլ Հայաստան»,- հայտարարեց Մանուկյանը, ինչին հաջորդեցին «առանց Նիկոլ Հայաստան» վանկարկումները։ 

Երթի ընթացքին կարող եք հետևել News.am-ի ուղիղ եթերում։