Ձեր վստահելի աղբյուրը

«Միջոցառման նպատակը 3 ամսով վարձատրվող հասարակական աշխատանքների կազմակերպման միջոցով տեղահանված և փաստացի Հայաստանում գտնվող Արցախի գործազուրկ քաղաքացիների ժամանակավոր զբաղվածության ապահովումն ու երկրում սոցիալական լարվածության մեղմումն է»,- կառավարության այսօրվա նիստում ներկայացնելով Հայաստանում գտնվող Արցախի Հանրապետության գործազուրկ քաղաքացիների ժամանակավոր զբաղվածության ապահովման միջոցառումը հաստատելու մասին հարցը՝ հայտնեց աշխատանքի և սոցիալական հարցերի նախարար Մեսրոպ Առաքելյանը:

Նախարարը նշեց, որ նմանատիպ ծրագիր արդեն գործում է, այն իրականացվում է համայնքների հետ, որին ներգրավվում են հիմնականում գյուղական համայնքների բնակիչները և մեկ աշխատանքային օրվա համար վարձատրվում են 8 հազար դրամի չափով:

Կառավարության ընդունած նախագծում ասվում է, որ վարձատրվող հասարակական աշխատանքների մեկ միջոցառման արժեքը չի կարող գերազանցել 2 մլն դրամը, որը նախատեսվում է տրամադրել աշխատավարձերի վճարման, ինչպես նաև շինանյութեր, բարեկարգման համար անհրաժեշտ այլ պարագաներ ձեռք բերելու, տեղափոխելու, աղբահանության ծախսերը փոխհատուցելու նպատակով:

Միջոցառման շրջանակում աշխատավարձի համար տրամադրվող գումարը չի կարող գերազանցել միջոցառման արժեքի 20 տոկոսը, իսկ շահառուն չի կարող միաժամանակ ընդգրկվել մեկից ավելի վարձատրվող հասարարակական աշխատանքներում։