Մինասյան. Պատերազմի օրերին Փաշինյանը, «Պատրոն» Դավիթն ու Դավիթ Տոնոյանը փող են աշխատել
Սուրբ Աթոռում ՀՀ նախկին դեսպան Միքայել Մինասյանը ներկայացրել է «Ռեքվիեմ 3»-ը՝ պատերազմի ժամանակ բանակից թալանի և ապագա դավադրության մասին։
Նրա խոսքով, նոյեմբերի 10-ը մի ջրբաժանային, դաժան օր էր, երբ հայ ժողովուրդը պետք է առերեսվեր իրականության հետ, որովհետև փաստը հստակ էր՝ Նիկոլ Փաշինյանը ստորագրել է պայմանագիրը, որը նախապատրաստվել էր 2,5 տարի։
«Նիկոլ Փաշինյանը մեզ հասցրեց գերեզմանի շեմին, սպանեց մեր 5000 տղաներին, և դրանից հետո մենք ինչ արեցինք՝ ոչինչ։ Շարունակեցինք էմոցիոնալ բանավեճը, և բացարձակ չնկատեցինք փաստերը։ Ուրիշ յուրաքանչյուր երկրում, եթե լիներ այս վերջին ժամանակահատվածի փաստերի գոնե 10 տոկոսը, այդ երկրում կլինեին տոտալ կատակլիզմներ։
Ժողովրդավարական երկրում կլինեին քրեական գործեր, ձերբակալումներ, մի քիչ ավելի էմոցիոնալ երկրներում պատասխանատուներին կկախեին փողոցներում, պատերի տակ կգնդակահարեին։ Մեր երկրում՝ ոչինչ»,-ասաց Միքայել Մինասյանը։
Նախկին դեսպանը հիշեցրեց՝ ԳՇ պետը հայտարարել է, թե պատերազմի 4-րդ օրն ասել է, որ պետք է պատերազմը կանգնեցնել, բայց դրանից բոլորը զարմացել են ու անցել առաջ. «ՌԴ նախագահն ասում է՝ հոկտեմեբրի 20-ին ավելի հայանպաստ առաջարկ է եղել, Փաշինյանը չի համաձայնել, ու դա բոլորը մոռացել են, գլխավոր ռազմական տեսուչը պատմել է ողջ գործընթացը, որն էլի մոռացել ենք»։
Նա նշեց, թե Մովսես Հակոբյանի հայտարարություններից հետո տարածեցին նրա տան լուսանկարը՝ նշելով, թե դա Հակոբյանը ձեռք է բերել բանակի թալանի արդյունքում, սակայն հարցեր չեն տրվել՝ արդյո՞ք դա իր տունն է, արդյո՞ք թալանի արդյունքում է ձեռք բերել, և եթե իր տունն է՝ թալանով ձեռք բերված, Նիկոլ Փաշինյանն այդ մասին չի՞ իմացել։
«Մենք այնքան ենք խճճվել սիրել-չսիրելու մեջ, որ վերջում բոլորին ատում ենք»,-նշեց նա։
Ըստ նախկին դեսպանի, 21-րդ դարում հայերը գերի են և գերի են ընկնում. 44 տղա վերադարձավ, հաջորդ օրը 177-ը գերեվարվեցին, սակայն նորից շարունակում են՝ քննարկել՝ սիրում են-չեն սիրում։
«Իսկ փաստե՞րը․ սրանք շատ վատն են, այն մասին են, որ ՀՀ ղեկավարները կազմակերպված բանդա են, մաֆիոզների բանդա են։ Ես ուղղակի հարցրի Նիկոլ Փաշինյանին՝ հաստատո՞ւմ ես, որ Դուբայում եղել է հանդիպում, և ստացել ես առաջարկ՝ 7 շրջանը 5 միլիարդի դիմաց։ Ի պատասխան՝ Նիկոլ Փաշինայնն ինչ-որ մեծ շոուով ասում է՝ կլինի քրեական գործ, որը կպարզի։ Բայց բառերի կույտի մեջ նորից կորում է փաստը»,- նշեց նա։
Նա հավաստիացրեց՝ լինելու է քրեական գործ, թե ինչու բերեցին համակարգ, որը չկրակեց, և դրա պատճառով սպանվեցին տղաները, լինելու է քրեական գործ, թե ինչու առան ռազմական օդանավեր, որոնք չթռան և չկրակեցին, և ինչու դրանք չունեին ռակետաներ. «Եվ ամենակարևոր հարցը՝ ինչո՞ւ եք դուք նույնիսկ պատերազմի ընթացքում աշխատել փող»:
Միքայել Մինասյանի հրապարակած տեսանյութում ցուցադրվեց փաստաթուղթ, որտեղ ՀՀ ՊՆ-ին առաջարկվում են Ռուսաստանի արտադրության «Կալաշնիկով» կոնցեռնի կողմից արտադրված «Կալաշնիկով ԱԿ-103» ինքնաձիգներ՝ համապատասխանաբար մոտ 243 դոլարով։
«Նրանք պատերազմի օրերին գնել են «Պատրոն» Դավոյի և Տոնոյան Դավիթի գործարանից 385 դոլարով նույն «Կալաշնիկով» ինքնաձիգը։ Պատերազմի օրերին, երբ հայերը կռվում էին իրենց երկրի համար, երբ ՀՀ քաղաքացիները կռվում էին իրենց ինքնիշխանության համար, իրենց հողի, մայրերի համար, Նիկոլ Փաշինյանը և երկու Դավիթները փող են աշխատել՝ ամեն մի ավտոմատից ավելի քան 140 դոլար»,-ասաց նա։
Բայց և այնպես, նախկին դեսպանը նշեց, որ փաստաթղթերի փաթեթն այսօր չի հրապարակելու, քանի որ դրա մեջ կան ռազմական և պետական գաղտնիքներ։
«Ես կսպասեմ, որ մասնագիտական դատարանին, որը վստահորեն շուտով լինելու է Հայատստանում և դատելու է բոլոր մեղավորներին, հանձնեմ այս փաթեթը, որի մեջ կան մազերը սպիտակեցնող փաստեր, թե ում հետ մենք գործ ունենք, թե ինչ ստոր արարածներ են, սառնասիրտ և խենթ մարդասպաններ են»,- ընդգծեց Միքայել Մինասյանը։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
