Ձեր վստահելի աղբյուրը

Սյունիքի մարզի Քարահունջ համայնքում քաղաքացիները փակել են միջպետական ճանապարհը, դեմ են կարևոր դիրքերը թշնամուն հանձնելու իշխանության որոշմանը՝ նշելով, որ իրենց անվտանգությունը երաշխավորված չէ:

«Վաղը, մյուս օրն ադրբեջանցին մտնելու է յուրաքանչյուրի տուն, երաշխավոր չկա: Ո՞վ պետք է երաշխավոր կանգնի Սյունյաց աշխարհին: Այս իմպոտենտ կառավարությո՞ւնը: Ո՞ւր են Սյունիքից ընտրված պատգամավորները: Մեր ժողովուրդն է ընտրել նրանց»,- ասաց ակցիայի մասնակիցներից մեկը:

Մեկ այլ սյունեցի նշեց. «Շատ կարևոր է նաև մարզի անվտանգության խնդիրը: Մեր մարզի բոլոր համայքների ղեկավարները կազմել են ինքնապաշտպանական ջոկատներ, պետական սահմանից տասնյակ կիլոմետեր առաջ խրամատավորվել են ու պահել դիրքերը մինչ օրս:

Երեկ այդ դավաճան կոչվածը հստակ հրամաններ է հաղորդում, որ բոլորը պետք է հետ վերադառնան: Այսինքն՝ այդ տասնյակ կիլոմետրերը, որոնք հենց բուֆերային գոտին են, պետք է պահեն Սյունիքի մարզի անվտանգությունը: Այսօր կորցնում ենք այդ անվտանգ գոտին և հետ ենք գալիս, ոչ մեկ չի պատճառաբանում, թե սրա վերջն իրականում ինչ է լինելու, իրականում ոչ մեկ չի ասում, թե ինչ է կատարվելու:

Այսօր ամենամեծ խնդիրը դա է՝ պատասախան ստանանք, թե ինչու է այսպես»:

Սյունեցիները նշում են, որ ակցիաները շարունակելու են այնքան, մինչև ստանան Սյունիքի անվտանգության երաշխավորություն, չգիտեն, թե որն է Սյունիքի պետական սահմանը:  

Գորիս համայնքի ղեկավարի Մենուա Հովսեփյանն ասաց. «Մենք գիտենք որն է, բայց այն գործիքակազմը, որ օգտագործում է իշխանությունը սահմանները գծելու համար, թուրքերի որդեգրած սկզբունքն է, թուրքական սկզբունքով է իրականացվում: Այս գործընթացի շարունակական լինելու դեպքում միանշանակ կկորցնենք Սյունիքը: Չենք պատրաստվում այս ծախված գործընթացի մասնակիցը լինել: Ելքը պատկերացնում ենք՝ այս իշխանությունը միանշանակ պետք է հեռանա, քանի որ չի տիրապետում իրավիճակին, չի կարողանում այս գործընթացը կառավարման տակ պահել, պետք է ղեկը հանձնի այնպիսի մարդու, ով պատրաստ է խնդիրները լուծել:

Ադրբեջանի սահմանն ու Գորիսը տեղ-տեղ մի քանի մետր են հեռու լինելու, տեղ կա մտնում է հենց համայնքի կազմի մեջ: Հայաստանը սնուցող  գլխավոր մայրուղին, որը Հայաստանը կապում է  Պարսկաստանի հետ, վտանգված է, կիլոմետրերով տարածքներ անցնելու են թուրքին: Ո՞վ է  երաշխավորելու անվտանգությունը, որ գիշերը գորիսեցին իջնի Որոտան, գերի չընկնի, ով է տեր կանգնելու Հայաստանին»:

Ակցիայի մասնակիցների խոսքով, իրենք պահանջում են վարչապետի ու կառավարության հրաժարական, քանի որ նրանք ոչ մի երաշխիք իրենց չեն տվել, անհասկանալի է, ինչ է կատարվելու ապագայում:

«Մենք ամեն ինչ անելու ենք մեր վերջնական նպատակին հասնելու համար: Պետք է ապրենք անվտանգ երկրում, իսկ այսօր մեր երկիրը վտանգված է»,- նշեց ակցիայի մասնակից սյունեցին:

Նրանք նշում են, որ զինվորը չի պարտվել, պարտությունը եղել է թիկունքից՝ սխալ կառավարման, դիվանագիտության պատճառով:

«1988 թվականից մեր սահմանները գծվել են արյան գնով, հիմա գրչի մի հարվածով տալիս ենք թշնամիներին:

Համոզված եմ՝ եթե կառավարությունում, իշխանությունում լիներ մեկ հոգի, որը 1988 թվականից առ այսօր սահմանին կորցրած լիներ մի հարազատ, սրբություն, այս պահին հրաժարական կտար, կպահանջեր ներկայիս անճար, իմպոտենտ իշխանության հրաժարականը: Ազգովի մատնվել ենք անտերություն:

Եթե լսող չկա, ինքներս պետք է մեր հարցը լուծենք: Այստեղ բոլորը պատրաստ են զենք վերցնել, թող ապահովեն զենքով, մենք մեր հարցերը կլուծենք: Այսօր ադրբեջանցին ռուսի հետ գալիս, սահման է  գծում, ո՞ւր են մեր պետական կառավարման աշխատողները:

1987 թվականին քարտեզագրումով ահագին քառակուսի կիլոմետր անցնում է թուրքին: Հասկացանք, փաստի առաջ ենք կանգնել, բայց մի՞թե հնարավոր է առանց կրակոցի այդքան հողերը հանձնել:

Մենք ունենք 8000-ից ավելի զոհ, 1000-ից ավելի անհետ կորած, 300-400 գերիներ, այսքանից հետո այս իշխանության մնալը արժեք ունի՞: Իհարկե, չունի, օր առաջ սրանք պիտի հրաժարական տան, դատ ու դատաստան պիտի լինի օրենքի կետերին համապատասխան: 

Դատախազությանը, ԱԱԾ-ին կոչ եմ անում զբաղվել այդ հարցով: Երկրի դավաճանին իր կաբինետում պետք է ձերբակալեն: Սա է ժողովրդավարական պետության կանոնները:

Արդեն համոզված ենք, որ, իրոք, վաճառքի է հանել մեր երկիրը»,- լրագրողներին ասաց ակցիայի մասնակիցներից մեկը:

Հավաքված սյունեցիները կոչ են անում համայնքի մյուս բնակիչներին միանալ իրենց ու միասին պայքարել դավաճանի դեմ, ով ժամ առ ժամ իրենց պապենական հողերը հանձնում է թշնամուն:

«Սյունիքը Հայաստանի ողնաշարն է, այսօր վտանգված է: Փորձենք տեղ հասցնել անհայրենիք իշխանությանը, որ վերջ տա իր ոչ պրոֆեսիոնալ աշխատանքին ու հրաժարվի այն ամենից, ինչն այս պահին իրականացնում է:

Ամեն ինչ տանում է նրան, որ մնացած տարածքների նման ամեն ինչ տրվելու է թուրքին: Կարծում ենք՝ սյունեցիները չպետք է համակերպվեն սրա հետ»,- նշեց քաղաքացին: