Ձեր վստահելի աղբյուրը

«Ես երբեք չէի ցանկանա այստեղ կանգնած լինել, այն էլ այսպիսի հարցով»,- Ազատության հրապարակում «Հայրենիքի փրկության շարժման» հրավիրված հանրահավաքում ասաց Շիրակի թեմի առաջնորդ Միքայել արքեպիսկոպոս Աջապահյանը՝ նախ իր խոսքը սկսելով աղոքթով։

Սրբազանը հիշեց, որ 32 տարի առաջ, երբ 1988-ի փետրվարին սկսվեց ղարաբաղյան շարժումը, կանգնած էր այստեղ վերջին շարքերում, պարզ երիտասարդ սարկավագ էր, իր հետ էր բանակի այսօրվա հոգևոր առաջնորդը՝ Վրթանես սրբազանը, երկուսով հետևել ու աղոթել են, որ իրադարձությունները զարգանան այն հունով, ինչ հունով երազում էին:

«Երբեք չէի կարող երևակայել, որ 32 տարի հետո կարող եմ կանգնել այստեղ տխուր սրտով, հայացքով, կոտրված մեջքով, կորցրած շատ բան այն ամենից, ինչը ձեռք բերեցինք այն տարիների ընթացքում:

Գարեգին արքեպիսկոպոս Հովսեփյանը, որ հետո դարձավ կաթողիկոս Կիլիկիո, Կարսի անկումը համարում էր իր կյանքի մեծագույն դժբախտության օրը: Ես և  երևի շատերը կհամարեն 2020-ի նոյեմբերի 9-ի լույս 10-ի գիշերը իրենց կյանքի ամենադժբախտ օրը: Հասկացողները կհամարեն, անհասկացողները չեն համարի: Կհասկանան այն մարդիկ, որոնք գիտեն՝ հայրենիք կորցնելն ինչ է նշանակում:

Իմ ցանկությունն այն է, որ մեր հայրենիքի ամբողջականության խաթարման պատասխանատուն հեռանա և մեզ թողնի,  հնարավորություն ստեղծի մեր մեջքը շտկելու: Մենք միայն այսօր չէ, որ սուգի մեջ պետք է լինենք, մենք 84 օր սգի մեջ ենք՝ մղկտալով ամեն մի զոհված զինվորի համար, ամեն մի թիզ հողի կորստով: Այսօր թշնամին հասել է Սյունյաց սահմաններ, ոտքով մտնում է, թիզ առ թիզ  հաշվում է: Մեզ ասում են, թե ոչ մի միլիմետր չենք զիջելու: Զիջելու տե՞ղ է մնացել»,-ասաց նա:

Շիրակի թեմի առաջնորդը նշեց, որ քաղաքականությամբ զբաղվելու ցանկություն չունի, բայց հայրենիքի կորստի հետ հաշտվելու հնարավորություն չունի։

«Ես իմ ապրելու իմաստն եմ կորցրել, իմ ապրած տարիների իմաստն եմ կորցրել, իմ հպարտությունը, իմ երջանկությունը, իմ անցած ճանապարհն եմ կորցրել: Եթե Աստված ինձ հույս չտա ապրելու և շարունակել պայքարը հանուն հայրենիքի, ես ապրելու իմաստ չեմ տեսնում:

Նա, ով պատասխանատուն և գլխավոր մեղավորն է այս ամենի, պետք է հեռանա, ասպարեզը զիջի նոր մարդկանց, նոր դեմքերի, որոնք թաթախված չեն ապօրինություններով, անարդարություններով, հայրենասեր են,  ամեն թիզ հողի համար պատրաստ են զոհաբերվել»,- նշեց Միքայել Սրբազանը։ 

Միքայել արքեպիսկոպոս Աջապահյանի խոսքով, այլ ճանապարհ չկա, վաղ թե ու վարչապետի առոթը զբաղեցնողը հեռանալու է, բայց ամեն մի օր, որ մնում է, ավելի է քաշում դեպի խորխորատ և հաջորդի համար ավելի դժվարանալու է մեզ փոսից հանելը:

«Ամեն մի օր մենք ավելի ենք խրվում ճահճի, կեղտի, ցեխի մեջ: Դրա համար անհրաժեշտ է, որ վայրկյան առաջ հեռանա: Դրա համար պետք է մեկ միասնական հայկական կամք։

Որպեսզի չզրոյացնենք մեր նահատակների նահատակությունը, պետք է շարունակենք փնտրել ուղիներ մեր մեջքը շտկելու համար, կերտելու նոր Հայաստան մեր միասնական ջանքերով»,-ասաց Միքայել Սրբազանը։