Ձեր վստահելի աղբյուրը

Մի խումբ ազատամարտիկներ «Եռաբլուրում» են։ Նրանք պնդում են՝ «սրբապիղծ» Նիկոլ Փաշինյանը չպետք է ոտք դնի «Եռաբլուր»։

«Դավաճանական երթը չպետք է մտնի Եռաբլուր։ Նրանք, ովքեր կմասնակցեն Փաշինյանի երթին, իրենց վրա կվերցնեն այն ողջ պատասխանատվությունը, որն ունեն Փաշինյանն ու իր կառավարությունը»,- լրագրողների հետ զրույցում ասաց ԱԱԾ նախկին տնօրեն, քաղաքական գործիչ Դավիթ Շահնազարյանը։

Նրա խոսքով, Արցախի մեծ մասի հանձնման, կապիտուլյացիայի, հազարավոր զոհերի համար պատասխանատվությունն այժմ Նիկոլ Փաշինյանի ուսերին է, և դա վերցնում ու կիսում են մարդիկ, որոնք որոշել են այսօր միանալ նրան ու երթով գնալ Եռաբլուր։

«Այդ մարդիկ մասնակիցը կդառնան նաև այն պետական դավաճանությունների, որոնք 2.5 տարի իրականացրել է Նիկոլ Փաշինյանը»,- վստահեցրեց ԱԱԾ նախկին տնօրենը։

Ըստ նրա, իշխանություններն այսօր մոբիլիզացրել են վարչական բոլոր ռեսուրսները. ոստիկանության պետերը հրահանգ են ստացել իրենց մոտ հաշվառված անձանց՝ թմրամոլ, քրեական տարր..., բոլորին ընդգրկել այս երթին։

«Բոլոր պետական հիմնարկներին հրահանգ է տրվել։ Այսինքն՝ վերջին ռեսուրսներն է Փաշինյանը նետում՝ փորձելով ցույց տալ, թե իբր ինքն աջակցություն ունի։ Ես բոլորին կոչ եմ անում հրաժարվել, չմասնակցել այդ երթին, դա դավաճանների երթ է։ Մերժեք պետական դավաճանների երթը»,- կոչ արեց նա։

Դավիթ Շահնազարյանը հավելեց, ԱԱԾ-ն ևս հրահանգ է ստացել երթին ներգրավվել «գործակալական ցանցին», ինչն, իր խոսքով, հանցագործություն է.

«Ուրեմն այսպես, դավաճանների երթը մուտք չի գործելու Եռաբլուր»։

Նա նշեց, որ այդ մուտքի արգելքի ընթացքում հնարավոր են բախումներ, բայց իրենք բոլոր հնարավոր ձևերով պատնեշ են հանդիսանալու երթի մասնակիցների համար։

«Փաշինյանը հրահրում և հրահրել է բախումներ, և եթե հիմա էլ հրահրի, կստանա արժանի պատասխան, դրանում չկասկածեք»,- շեշտեց ԱԱԾ նախկին տնօրենը։

Նա նկատեց, Նիկոլ Փաշինյանի ստորագրած կապիտուլյացիոն հայտարարությունից հետո վտանգված է նաև ողջ Հայաստանի անվտանգությունը։ Ըստ նրա, Նիկոլ Փաշինյանը կառչած է իշխանությունից, որովհետև դեռ քայլեր ունի անելու. նա պետք է զորքերը հետ քաշի և հյուսիսում առնվազն 7-8 գյուղ հանձնի Ադրբեջանին։

«Նա քիչ առաջ արեց հերթական դավաճանական հայտարարությունը, որ տարածքներ տալով մենք ավելի անվտանգ ենք լինելու։ Բացի դրանից, նա պատրաստվում է Ադրբեջանի հետ սահմանազատման պայմանագիր կնքել, ինչպես նաև հաստատել դիվանագիտական հարաբերություններ։ Նա պատրաստվում է Սյունիքի մի քանի ճանապարհով թույլատրել, որ Ադրբեջանից Թուրքիա նավթամուղեր ու գազամուղեր անցնեն։ Դրանք բացարձակապես չեն լինելու ՀՀ վերահսկողության տակ։ Նա նաև մտադիր է դիվանագիտական հարաբերություններ հաստատել Թուրքիայի հետ։ Այսինքն՝ փոխում է այն Հայաստանը, որ կար մինչև սեպտեմբերի 27-ը։ Մենք ունենք ծվատված և ամեն օր թուլացող պետականություն։ Փաշինյանը նպատակաուղղված թուլացնում է բանակը»,- շեշտեց Դավիթ Շահնազարյանը։

Դիտարկմանը, որ Փաշինյանը նշում է՝ իր հրաժարականի պահանջը  էլիտար բունտ է, որով ժողովրդից փորձում են խլել իշխանությունը, Դավիթ Շահնազարյանն արձագանքեց՝ այսօր Փաշինյաը բացարձակապես լեգիտիմ չէ.

«Իր լեգիտիմությունից ոչինչ չի մնացել։ Նա կառչած է իր նման դավաճաններից։ Ի վերջո, Փաշինյանի խոսքերն արդեն որևէ նշանակություն չունեն ո՛չ Հայաստանում, ո՛չ Հայաստանից դուրս, քանի որ նրան արդեն որևէ տեղ լուրջ չեն ընդունում։ Այսօր նրա՝ օր առաջ հեռանալը, հանրային պահանջ է։ Այսօր ՀՀ ժողովրդի ճնշող մեծամասնությունը համոզված է, որ 2.5 տարի ամեն օր տեղի է ունեցել պետական դավաճանություն»։