Ձեր վստահելի աղբյուրը

«Երեկ ողջ օրը դիտում էի, թե ինչ իրադարձություններ էին տեղի ունենում Եռաբլուրում, գարշանք էի ապրում։ Շատ վատ էի զգում, որ հերթական անգամ ծաղրի ու ծանակի առարկա դարձանք ամբողջ աշխարհի առաջ, որովհետև մարդիկ մոռանում էին, թե որտեղ էինք գտնվում»,- Եռաբլուր զինվորական պանթեոնում լրագրողների հետ զրույցում ասաց ԱԱԾ նախկին տնօրեն Միքայել Համբարձումյանը։

Նա չանդրադարձավ իր հրաժարականի պատճառներին, նախատեսում է  առաջիկայում ասուլիս հրավիրել. «Ձեռնպահ եմ մնալու նեղ անձնական խոսակցությունները, հանգամանքները ներկայացնելուց։ Այն կարծիքին եմ, որ ԱԱԾ աշխատակիցը չպետք է ներկայացնի այն տեղեկատվությունը, որն իրեն հասու է  դարձել ծառայողական պարտականություններ իրականացնելիս։ Իսկ այն հարցերը, որոնք վերաբերում են մեր երկրի անվտանգությանը, որի մեջ սպառնալիք եմ տեսնում, դրանց մասին կխոսեմ»։ 

Հարցին՝ երբևէ ապօրինի հանձնարարություններ ստացե՞լ եք, Մ. Համբարձումյանը պատասխանեց, որ ձեռնպահ կմնա ապօրինի հանձնարարական ձևակերումը տալուց, կարող է փաստել, որ եղել է հանձարարական, որը գտել է՝ չպետք է կատարել։

ԱԱԾ նախկին տնօրենն անդրադառնալով պահեստազորի սպաների հայտարարությանը՝ ուսումնասիրել այն տեղեկատվությունը, որ պայմանավորվածություն է  եղել թշնամի պետության ղեկավարի ու Փաշինյանի միջև, ասաց որ լիարժեք կիսում է իր գործընկերների մտահոգությունը։

«Հրապարակվել են այնպիսի տվյալներ, որոնք օր առաջ ամենայն խորությամբ պետք է քննության առարկա դառնան։ Նույնիսկ պատրաստ եմ որպես փորձառու քննիչ կամ քննչական խմբի ղեկավար  համապատասխան լիազորություններով օժտվելու դեպքում իրականացնել նախաքննության։ Այս պահի դրությամբ ամենամտահոգող հարցն է»,- ասաց Միքայել Համբարձումյանը։