Ձեր վստահելի աղբյուրը

ՀՀ նախկին վարչապետ Հրանտ Բագրատյանի խոսքով, վարչապետ Նիկոլ Փաշինյանի քայլերից դավաճանության «հոտ է գալիս», և դա նաև այն պատճառով է, որ նա հյուսիսը պահում է, իսկ հարավը, կարծես թե, պայմանավորված, թողնում է անպաշտպան, անընդհատ ասում է հետ եկեք, նահանջեք։

«Մեր ունեցած նախնական տեղեկություններով, Ռուստամ Գասպարյանը, որ որդու հետ զոհվեց, շտապում էր Երևան՝ Նիկոլ Փաշինյանի հետ հաշվեհարդար տեսնելու։ Քանի որ եղել են նահանջի հայտարարություններ։ Բացի այդ, հոկտեմբերի տասին Փաշինյանը չի համաձայնել Պուտինի առաջարկած տարբերակին, այսինքն՝ Ալիևն ու Փաշինյանը Պուտինի հետ քննարկում էին հարցը, բայց ես ենթադրում եմ, որ Փաշինյանն ունեցել է Ալիևի հետ կապ և պայմանավորվածություն՝ Շուշին հանձնելու վերաբերյալ։ Եղե՞լ է դրա համար փոխհատուցում, դա արդեն նախաքննական մարմինների քննելու գործն է։ Տարօրինակ է, քանի որ ՌԴ-ն ասել է Շուշին պահեք, իսկ մենք ասել ենք՝ չէ, թող վերցնեն»,- այսօր լրագրողների հետ զրույցում ասաց նա։

Ըստ Հրանտ Բագրատյանի, այս իրավիճակի, «դավաճանության» երկրորդ մեղավորը ՀՀ նախագահ Արմեն Սարգսյանն է։ Նրա խոսքով, վերջինից ամեն բան սպասելի է։

«Այն, որ նա ՀՀ քաղաքացի չի եղել նշանակվելուն նախորդած վեց տարիներին, ռուսներն ասում են, որ նա գործակալ է...։ Պատերազմի ընթացքում նա երեք անգամ տվել է ինտերվյու և ասել՝ այ մարդ, չեք ամաչո՞ւմ, բա մենք նավթամուղ կամ գազամուղ խփո՞ղ ենք։ Չգիտես ինչու՝ Արմեն  Սարգսյանը պատերազմի օրերին արտակարգ հետաքրքրություն է ցուցաբերում նավթամուղերի և գազամուղերի նկատմամբ։ Իսկ Արցախի բարձրագույն ղեկավարության ներկայացուցիչները ինձ ասել են, որ այդ մարդն Արցախում եղել է երկու-երեք անգամ, բայց այնտեղ չի գիշերել։ Նույն օրը հետ է գնացել, քանի որ հասկանում էր, լավ գիտեր, որ Ղարաբաղը հետ ենք տալու։ Ավելին, ինքն աշխատել է, որ իր այդ այցելությունները չհրապարակվեն, չմեկնաբանվեն»,- նկատեց նախկին վարչապետը։

Հրանտ Բագրատյանը հարց հնչեցրեց՝ իսկ եթե ոչ պատերազմի ընթացքում, էլ ե՞րբ պետք է հայկական կողմը հակառակորդի նավթամուղին խփեր։ Նա հիշեցրեց, որ Արմեն Սարգսյանը ատոմակայանի մասին խոսելիս Եվրոպայի շահերն է ներկայացել և գումար ստացել։

«Նա նաև ստում է, երբ ասում է, թե նոյեմբերի 10-ի հայտարարությունից տեղյակ չի եղել։ Բայց դրանից հետո նա մեկնում է Հորդանան՝ զբոսաշրջության խնդիրներով, ու դա այն դեպքում, երբ երկիրը կապիտուլյացիայի էր ենթարկվել։ Եվ Հորդանան է մեկնում կառավարական ինքնաթիռով, դա էլ Նիկոլի կողմից կաշառք է, հյուրասիրում է նրանց, ովքեր դեմ չեն Նիկոլին։ Այնտեղից էլ արաբական մի երկիր մեկնեց։ Նրա կողքին է հայտնվում մեկ այլ հայ, որը միշտ իր կողքին է, բայց ինձ համար անհասկանալի է, թե ինչ կապ ունի։ Նա բոլոր արաբական մուտիլովկաներին ներկա է։ Մենք ունենք խնդիր, քրեական գործ՝ դավաճանության կասկածանքով»,- ներկայացրեց բանախոսը։    

Նա նկատեց, որ կոռուպցիոն սխեմաներ կան, որոնցում ներգրավված են Դավիթ Տոնոյանն ու «Պատրոն» Դավիթը։ Օրինակ, հայկական կողմը ձեռք է բերել ավելի թանկ զրահաբաճկոններ, երբ կարող էր դրանք ձեռք բերել մինչև 300 դոլարով։    

«Կան դեպքեր, երբ մենք գործ ունենք պաշտոնյաների հանցավոր անգործության հետ։ Օրինակ ,հայտնի մուտիլովչիկ Անդոն (պատգամավոր Անդրանիկ Քոչարյանին նկատի ունի, խմբ.)։ Այս մարդը երկու տարի Ապրիլյան պատերազմ է քննում, փոխանակ քննի մեր բանակի այսօրվա վիճակը։ Նա պաշտպանության փոխնախարար է եղել, բայց նույնիսկ վառոդի հոտը չի առել։ Նա պատերազմի օրերին էլ էր շարունակում հակաքարոզչությունը»,- նշեց Հրանտ Բագրատյանը։