Ձեր վստահելի աղբյուրը

Գրեթե երկու տասնյակ երկրներ, ներառյալ Եվրամիության առնվազն 14 անդամ պետություններ, որոշել են դադարեցնել կամ սահմանափակել տրանսպորտային կապերը Բրիտանիայի հետ այն բանից հետո, երբ այնտեղ հայտնաբերվել է կորոնավիրուսի նոր, ավելի վտանգավոր շտամ, փոխանցում է «ՌԻԱ Նովոստի»-ն։

Ըստ աղբյուրի, մուտացիան հայտնաբերվել է դեկտեմբերի կեսերին: Բրիտանիայի առողջապահության նախարարությունը հաղորդել է, որ նոր SARS-CoV-2- ը սովորականից արագ է տարածվում և գերակշռող է դարձել Լոնդոնում: Բրիտանիայի վարչապետ Բորիս Ջոնսոնը հայտարարել է, որ այս նոր շտամը 70 տոկոսով ավելի վարակիչ է, քան նախնական տարբերակը:

«Նիդեռլանդների իշխանություններն առաջինը հայտարարեցին դեպի Միացյալ Թագավորություն թռիչքների դադարեցման մասին: Այնուհետև Բելգիան առնվազն 24 ժամով փակեց Մեծ Բրիտանիայի հետ սահմանը: Այս կապակցությամբ չեղյալ է հայտարարվել Լոնդոն-Բրյուսել և Լոնդոն-Ամստերդամ երկաթուղային հաղորդակցությունը։ Իտալիան, Գերմանիան, Բուլղարիան, Իռլանդիան, Լիտվան, Լատվիան, Ֆինլանդիան և Խորվաթիան նույնպես դադարեցրել են թռիչքները դեպի Բրիտանիա:
Ֆրանսիան ևս 48 ժամով դադարեցրել է բոլոր տրանսպորտային հաղորդակցությունները դեպի Միացյա Թագավորություն: Շվեդիան արգելել է մուտքը այս երկրից, Հունաստանը Բրիտանիայից ժամանածների համար սահմանել է յոթօրյա կարանտին, Կիպրոսը՝ երկշաբաթյա կարանտին է հայտարարել, իսկ Իսպանիան խստացրել է վերահսկողությունը Միացյալ Թագավորությունից ժամանողների վրա»,- հայտնում է աղբյուրը։

Նշվում է, որ ԵՄ երկրներից բացի, Թուրքիայի, Շվեյցարիայի, Կանադայի, Իսրայելի և Արգենտինայի իշխանությունները նույնպես պայմանավորվել են դադարեցնել թռիչքները Բրիտանիայի հետ: Սաուդյան Արաբիան մեկ շաբաթով ամբողջովին փակել է իր սահմանները և չեղյալ հայտարարել բոլոր միջազգային թռիչքները: