Ձեր վստահելի աղբյուրը

«Երբ իմացանք դավաճանի պլանները, որոշեցինք  արագ արձագանքման խմբով միանալ սյունեցիներին ու խոչընդոտել: Մեր նպատակն այն չէ, որ Նիկոլը մտնի կամ չմտնի Սյունիք, գլխավոր նպատակն այն է, որ Նիկոլը  երբեք այլևս չի կարողանալու ազատ քայլել Հայաստանում: Դավաճանները տեղ չունեն մեր երկրում»,- լրագրողներին ասաց  «Ադեկվատ» միաբանության անդամ Վահագն Տեր-Նակալյանը: 

Նա հայտնեց, որ իշխանության է եկել մի մարդ  ճանապարհներ փակելով, փորձում է  իշխանություն պահել էլի ճանապարհներ փակելով, ուղղակի այս անգամ օգտագործում է ուժայիններին՝ ոստիկաններին:

«Սրանով ակնհայտ է, որ այլևս չունի իշխանություն: Չի կարելի Նիկոլի հետ որևէ համագործակցության գնալ, անգամ նրա հետ ձեռք սեղմելը հավասարազոր է նույն դավաճանությանը»,- նշեց նա:

«Նիկոլ դավաճան», «Նիկոլ դավաճան», «Նիկոլ, թուրք», «Նիկոլ, թուրք»՝ վանկարկում են Փաշինյանի առաջ ճանապարհը փակած սյունեցիները:

Ակցիայի մասնակիցներից մեկն ասաց, որ լավ կլինի իրենց կտրեն աշխատավարձից, բայց իրենց հողերը հետ բերեն: Կոչ արեցին չտրվել սադրանքների: Նշում են, որ ավտոբուսներով ոստիկաններ են բերել Սյունիք:

«Հարգարժան ոստիկաններ, իմացեք որ Սյունիքը Հայաստանի ողնաշարն է, եթե կարող եք այդ ողնաշարը տեսնել թուլացած, ծռված, վստահ եղեք, եթե այսօր չանենք քայլ, տարիներ անց նույնիսկ լավագույն վիրաբույժներն այդ ողնաշարը չեն կարողանալու բուժել»,- ասաց ակցիայի մասնակիցը:

«Մենք ոստիկաններին պահանջում ենք բացել մեր ճանապարհները: Գորիսեցիներին չեն թողում գալ այստեղ: Առանց այդ էլ մեր ճանապարհները փակ են, չենք կարողանում գնալ մեր տները, մի հատ էլ այստեղ են եկել փակում: Մենք դրան ենք արժանի՞, չհասկացանք»,- նշեց ճանապարհը փակած սյունեցիներից մեկը:

Նրանք կոչ են անում ազատ արձակել Գորիս համայնքի ղեկավար Առուշ Առուշանյանին: