Ձեր վստահելի աղբյուրը

«Հարցաքննությունն ավարտվել է: Հրաժարվել ենք ցուցմունքներ տալուց, հակիրճ մի քանի բան ենք ասել, որ Առուշանյանի գործողությունները եղել են օրինական, որևէ հանցագործություն չի կատարել»,-  Քննչական կոմիտեի դիմաց լրագրողներին ասաց Գորիսի քաղաքապետի պաշտպաններից Արմեն Մելքոնյանը:

Նա ընդգծեց, որ որևէ  ապօրինի հավաքի մասին խոսք լինել չի կարող:

«Առուշանյանը խնդրել է չքաղաքականացել, որևէ կուսակցության ինքը չի պատկանում, իր կուսակցությունը մեր Գորիս քաղաքն է, հայրենիք սահմանները անառիկ պահելն է»,- ասաց պաշտպանը:

Հիշեցնենք, որ այսօր ՀՀ ոստիկանության Սյունիքի մարզային վարչության Գորիսի բաժնում հարուցվել է քրեական գործ՝ ՀՀ քրեական օրենսգրքի 34-225.1 հոդվածի 1-ին մասի հատկանիշներով: Նույն օրը` ժամը 06:30-ին, Գորիս համայնքի ղեկավար Առուշ Առուշանյանը ձերբակալվել է՝ օրենքով սահմանված կարգի խախտմամբ հավաք կազմակերպելու և անցկացնելու փորձ կատարելու կասկածանքով:

Պաշտպանն ասաց, որ Առուշանյանի ձերբակալումն ապօրինի է, բողոքարկել են, սպասում են դատարանի արձագանքին:

«Չի կարող որևէ մեկը օրինական հավաք կազմակերպելու համար անձին մեղադրանք առաջադրի: Ապօրինի գործողություններ են: Ենթադրում եմ, որ քաղաքական գործընթաց է, բայց ուզում եմ ասել, որ այս պահին իր փաստաբանական թիմի ղեկավարն եմ, բայց նաև հանդիսացել է  իմ հրամանատարը, երկու ամիս նույն խրամատում ենք եղել, կռվել,  գիտեմ ինչպիսի անձ է: Այսօրվա իշխանություններին  կոչ եմ անում՝ խելքներդ գլուխներդ հավաքեք: Այդ մաքրությունը մի պղտորեք»,- ասաց Ա.Մելքոնյանը:

Նրա ներկայացմամբ, Գորիսում սկզբում 10 հազար փախստականների, հիմա արդեն 4000, հենց Առուշանյանն է իր միջոցներով երեք անգամ սննդով ապահովել, Հայաստան տեղափոխվող մի քանի հազար զինվորների դիակներ իր միջոցներով է հասցրել նրանց բնակավայրեր:

«Հասկացեք՝ ում հետ գործ ունեք»,- շեշտեց պաշտպանը:

Նա լիահույս է, որ դատարանները ճիշտ որոշում կկայացանեն:

Պաշտպանն ասաց, որ բացի հիշյալ քրեական գործից, ինչ-որ քրեական գործեր կան, տեղեկություն է ստացել, որ միավորվում են մեկ վարույթում. «Հասկանում եմ,  թե ինչ են փորձում կատարել: Միավորվում են մեկ վարույթում, չի բացառվում, որ Առուշանյանին ժամերի ընթացքում նոր մեղադրանքներ առաջադրվի ու ծանր  հոդվածներով փորձեն միջնորդություն ներկայացնեն դատարան, որպեսզի խափանման միջոց կալանավորում կիրառվի, քանի որ 34-225.1 հոդվածի 1-ին մասն ուղղակի օրենքի ուժով հնարավարություն չի տալիս որպեսզի նրան ներկայացնեն կալանքի: Սրանով ձերբակալումն ապօրինի է:  

Հիմա ինչ որ քրեական գործեր կծնվեն, կմիավորվեն… Մի բան կարող եմ ասել,  այդ բոլոր փուչիկ քրեական գործերը, կարծում եմ, կպայթեն»:

Ա. Մելքոնյանն ասաց, որ Առուշանյանի դեմ քրեական գործ հարուցելու և  ձերբակալելու որոշում է կայացրել տեղամասային տեսուչը: Պաշտպանի ներկայացմամբ, նրան տնից ապօրինի բերման են ենթարկել 04:30-ի սահմաններում, 06:30-ին ձերբակալել են,  մինչև 14:30-ը տեղեկություն չեն ունեցել Առուշանյանի վերաբերյալ:

«Առուշանյանն ուղղակի ծիծաղում է սրանց վրա: Նա հայի այն տեսակն է, որին ուղղակի պահել ու պահպանել է պետք»,- ասաց նա՝ հավելելով, որ սա ասում է ոչ թե որպես պաշտպան, այլ մարդ, որը պատիվ է ունեցել նրա հրամանատարության ներքո կռվել ու հայրենիք պաշտպանել: