Ձեր վստահելի աղբյուրը

«Նոր տեղեկացանք, որ Նիկոլը հետ է դարձել Սյունիքի մարզից: Շնորհավորում ենք բոլորին»,- հայտարարեց Նիկոլ Փաշինյանի մուտքը Գորիս արգելող քաղաքացիներից մեկը: 

Բազմաթիվ սյունեցիներ վաղ առավոտից փակել էին դեպի Գորիս ճանապարհը, որպեսզի Նիկոլ Փաշինյանը ոտք չդնի Գորիս: Փաշինյանը միայն այցելել է Սիսիան:

Ճանապարհը փակած քաղաքացիներն ասացին, որ իրենք դեռ անավարտ գործ ունեն՝ Գորիսի համայնքապետ Առուշ Առուշանյանը, որին առավոտյան բերման էին ենթարկել, մարզում չէ, թաքուն տեղափոխել են Երևան:

«Միասին այնքան ենք փակելու այս ճանապարհը, մինչև Առուշը դուրս գա ու ասի, որ ազատության մեջ է»,- նշեց քաղաքացին:

Գորիսի փոխքաղաքապետ Մենուա Հովսեփյանն ասաց, որ իրենք իրենց հողը պաշտպանում են չար, թվապաշտ, սատանայապաշտ մարդուց:

«Այսօր էլ սկսեց այս կեղտոտ գործը, գիշերվա կեսին ձերբակալեց Առուշին՝ մտածելով կձախողի մեր միջոցառումը, այդպես չեղավ: Միասին կանգնելու ենք այնքան, մինչև այդ տականքը որոշում կայացնի ու բաց թողնի Առուշ Առուշանյանին: Այսպես շարունակվելու է այնքան, այնքան է կաթվածար լինելու Սյունիքի մարզը, մինչև Սյունիքի մարզի տեղը լավ իմանա:

Ինքը աշխարհագրություն չգիտի: Մինչև հիմա պատկերացում չունի Սյունիքի սահմանների մասին: Ամեն օր շեշտում է, որ Սյունիքի սահմաններից 1 մմ չենք տալիս: Բոլորը երեկ ականատես եղան, որ Սյունիքի մարզում թուրքեր են հայտնվել, բա լավ, որտեղի՞ց են այդ թուրքերը:

Հեռացիր Նիկոլ, հերիք է նման կեղտոտ խաղեր խաղաս: Եթե ուզում էիր խոսել, կարող էիր առանց ձերբակալելու գայիր այստեղ ու խոսեիր, իսկ եթե ձերբակալել ես, մենք քեզ հետ խոսելիք չունենք»,- ասաց փոխքաղաքապետը: