Ձեր վստահելի աղբյուրը

«Գորիսի քաղաքապետ Առուշ Առուշանյանից որևէ տեղեկություն չունենք, չգիտենք՝ որտեղ է գտնվում, չգիտենք՝ ձերբակալել են, թե ոչ»,- Panorama.am-ի հետ զրույցում ասաց Առուշանյանի պաշտպաններից Արմեն Մելքոնյանը:

Նա նշեց, որ առավոտյան ժամը 05:00-ին ինչ-որ անձիք են եկել, ներկայացել են իբրև ոստիկաններ ու տարել են:

«Անհանգստացած ենք, հաղորդում են տվել ոստիկանություն, որ առևանգված է, որովհետև բոլոր ժամկետները լրացել են, նրա վերաբերյալ որևէ տեղեկություն չունենք:

Ասում են բերվել է Երևան, հստակ չգիտենք:  Բայց որտեղ է պահվում, ինչ կարգավիճակում է պահվում, որևէ տեղեկություն չունենք»,- նշեց պաշտպանը:

Այժմ, նրա խոսքով, որոնողական աշխատանքներ են տանում:

«Չգիտենք՝ գուցե Առուշանյանին արդեն հանձնել են Ադրբեջանի իշխանությունների՞ն Հայաստանի սահմանը պաշտպանելու համար»,- ասաց Ա. Մելքոնյանը:

Հիշեցնենք, որ երեկ երեկոյան  Առուշ Առուշանյանը կոչով դիմել էր գորիսեցիներին՝ հավաքվել  Սյունիքի  դարպասների մոտ՝ արգելելու «հայոց հողը օտարող, Սյունիքի երբեմնի անառիկությունը խաթարող «վարչապետի» մուտքը Սյունիքի մարզ»։