Ձեր վստահելի աղբյուրը

ՀՀ նախկին վարչապետ Հրանտ Բագրատյանը կարծում է՝ Նիկոլ Փաշինյանը մինչև 2021 թվականը չի մնա իշխանության, այսօր նա ձերբակալել է Գորիսի քաղաքապետին, բայց և այնպես, ժողովուրդը նրան չթողեց Կապան և Գորիս մուտք գործել, ժողովուրդը հետո չի թողնելու, որ նա տուն մտնի, նա մնալու է անտուն:

«Հիշո՞ւմ եք Պագանին ոնց մեռավ, նրան եկեղեցին թույլ չէր տալիս թաղել, վախենամ, նա էլ այդպես հանգրվան չգտնի: Այո՛, Նիկոլ Փաշինյանը փորձում է մնալ, գուցե ընդդիմությունը, նաև ես ինչ-որ մի բան սխալ արեցինք։ Եվ նա կարծում է՝ եթե հրաժարական տա, բարձրանալու է իր կենդանի մնալու գինը: Ե՛վ Նիկոլ Փաշինյանին, և՛ Արմեն Սարգսյանին, որ առնչություն ունեն դավաճանության հետ, ինքս կգնամ կպաշտպանեմ, որ լինի կարգին դատ ու դատաստան»,- այսօր հրավիրված մամուլի ասուլիսի ըթաքում ասաց նա։

Նրա խոսքով, Հայաստանը պետք է կարողանա իրեն դրսևորել որպես քաղաքակիրթ երկիր, բայց  Փաշինյանը վախենում է կենդանի չմնալ:

«Ես, անպայման, կպաշտպանեմ նրան կրծքով, որ նա դատարանում դատվի, այդ դատը պետք է տևի տարիներ, հայ ժողովուրդը պետք է տեսնի սա, սա պետք է դաս լինի։ Հիմա սա դաս չի կարող լինել, որովհետև ընկալվում է որպես մի անհաջող գործողություն, կոմպլեքս են ստեղծում հայ ժողովրդի մոտ, որ մենք, մեր զինվորն ավելի թույլ էինք, դրա համար պարտվեցինք, իսկ դա այդպես չէ»,- նշեց նա։

Այնուամենայնիվ, ՀՀ նախկին վարչապետը վստահեցրեց՝ օղակը սեղմվում է Նիկոլ Փաշինյանի շուրջ, հիմա նա չի կարող Երևանից ուրիշ տեղ գնալ, շուտով նա կհամոզվի, որ եթե ևս մեկ անգամ Երևանից այլ տեղ գնա, չի կարող այլևս Երևան վերադառնալ:

Անդրադառնալով դեպի Եռաբլուր Նիկոլ Փաշինյանի կազմակերպած երթին՝ նա ասաց, որ փող էին տվել, մարդիկ էին հավաքվել գուցե 5, գուցե 10 հազար.

«Ինչի՞ էր գնում սրացման, ինչի՞ն էր պետք»։

Նա նշեց, որ Նիկոլ Փաշինյանը փորձում է ապացուցել, թե իրեն աջակցողներ կան։