Ձեր վստահելի աղբյուրը

Գորիսի քաղաքապետ Առուշ Առուշանյանը Քննչական կոմիտեում է:

«Խայտառակ ապօրինություն ենք համարում այն ամենը, ինչ կատարվեց Առուշանյանի հետ»,- լրագրողների հետ զրույցում ասաց իրավապաշտպան Ռուբեն Մելիքյանը:

Նրա խոսքով, ժողովրդի կողմից ընտրված քաղաքապետին, հայրենիքի զինվորին գիշերը հինգին տնից հանել են Քրեական օրենսգրքի ամենաթեթև հոդվածի կասկածանքով՝ ապօրինի հավաքներ կազմակերպելու, այն էլ փորձի համար:

«Մի քանի տասնյակ փաստաբաններով  մեր մասնագիտական  աջակցությունն ենք առաջարկելու Առուշան Առուշանյանին ու պատիվ ենք համարելու, երբ որ համաձայնվի, որպեսզի մենք էլ ներգրավենք այս վարույթում որպես պաշտպան»,- ասաց Ռ.Մելիքյանը:

Իրավապաշտպանն ասաց, որ միայն այն, որ բերման ենթարկելուց 6-7 ժամ անց փաստաբաններն ահազանգում են՝ չգիտեն, թե որտեղ է իրենց վստահորդը, նշանակում է գործ ունեն կոպտագույն խախտման հետ:

«Ազատությունից զրկված անձի նվազագույն իրավունքներից ամենակարևորներից մեկը փաստաբանի հետ կապվելու հնարավորությունն է: Դատավարական բնույթի խախտումներ են տեղի ունեցել»,-  ասաց նա:

Փաստաբան Արսեն Մկրտչյանն ասաց, որ սա ևս մի ակցիա է, որպեսզի իշխանություններին լսեցնեն՝ հերիք է, միայն հրաժարական  չտալու համար ազգ չեն պառակտում, երկիր չեն քանդում: 

«Ես և իմ գործընկերներն այստեղ ենք աշխարհին, մարդկանց լսեցնելու, որ այստեղ տեղի է ունենում նպատակաուղղված պետության կազմաքանդում»,- նշեց փաստաբանը: