Ձեր վստահելի աղբյուրը

09։55

«Փաշինյանն ասում է, որ պատրաստ է գալ ու բոլորիս հետ խոսել, բա խի՞ չի գալիս։ Խի՞ չի գալիս, տեսնենք, թե ոնց է էսքան մարդու պատասխանում։ Թող գան, տանեմ մեր գյուղերից մեկը, տեսնեմ կարո՞ղ են ճիշտ դուրս գալ, նրանք գիտե՞ն՝ հողն ինչ է»,- ասում են սյունեցիները։

Նրանք հարց են հնչեցնում՝ ինչո՞ւ է այսօր Փաշինյանը եկել Սյունիք, իմաստը ո՞րն է։

«Նա, որ թուրք է, կասկած չկա, հատուկ ընտրել էր Նժդեհի թաղման օրը, որ գա ու ասի՝ Սյունիքից այսքան հատված տալիս եմ։ Մեղրին տալիս եմ, Կապանը տալիս եմ, Գորիսը տալիս եմ։ Հենա «Անտարես»-ից մեկը գրել է, որ Սյունիքում 20 տարուց ավելի ուրիշի հողում են մարդիկ ապրում»,- ասաց քաղաքացիներից մեկը։

Դիտարկմանը, որ Նիկոլ Փաշինյանը հայտարարել է, թե պատրաստ է խոսել սյունեցիների հետ, քաղաքացին արձագանեց՝ ասելով, որ իրենք «դավաճանի» հետ որևէ խոսելիք չունեն։

«Ի՞նչ խոսենք իր հետ, ի՞նչ ասենք։ Կամ որ ամեն ինչ գցում է կամավորի վրա, ասում է՝ կամավորը փախավ, բա 44 օրում մեզնից լավ զինված 3 պետության բանակներ ո՞նց չկարողացան առաջ գալ, էդ ո՞նց եղավ։ Կյանքե՞ր է փրկել։ Կամավորը գնում է հայրենիքը պահի, հետո գալիս ասում է՝ լավ է, որ մեզ փրկե՞ց, որ հայրենիքը տվե՞ց։ Էդ ո՞վ ասաց, որ մեկի ախպոր գերեզմանը սրբություն է, մյուսինը՝ չէ։ Սա (Սյունիքի մասին է խոսքը, խմբ.) իր համար Հայաստան չի, ինքը տվել է արդեն։ Դե եթե Հայաստան չի, թող չգա»,- նշեց նա։

Քաղաքացիների համար հարց է առաջանում նաև, որ եթե վտանգված չէ սյունեցու անվտանգությունը, ինչո՞ւ է ԱԱԾ-ն հեռախոսահամարներ տրամադրում, որ Սյունիքում գերի ընկնելու դեպքում զանգեն մարդիկ։

«Իրենք չգիտեն տարածքը։ Դե եթե վտանգ չկա, թող գան, ժամը 10-ին իջնենք Որոտան, տեսնենք որևէ մեկն այնտեղից հետ կգա՞»,- ասաց սյունեցիներից մեկը։

Բացի այդ, քաղաքացիների խոսքով, վտանգված է նաև Տաթևի ՀԷԿ-ը, քանի որ թշնամու դիտակետում է, նրա նշանառության տակ.

«Պաշտպանության նախարարն ասում է՝ անվտանգ է։ Դե արի, տանենք, ցույց տանք ճանապարհը, տեսնենք անվտա՞նգ է, այ շուն, շանորդի»։

09։37
Սյունիքում բողոքի ակցիաներ են. վաղ առավոտից սյունեցիները փակել են ճանապարհները, որպեսզի թույլ չտան վարչապետ Նիկոլ Փաշինյանին մուտք գործել մարզ։

Հիշեցնենք, որ ավելի վաղ Նիկոլ Փաշինյանը հայտարարել էր, որ աշխատանքային այցով մեկնելու է Սյունիք։ Սակայն սյունեցիները որոշել են ամեն կերպ թույլ չտալ, իրենց խոսքով, հայոց հողը օտարող վարչապետը մտնի իրենց հող։

Նշենք, որ հարյուրավոր ոստիկաններ վաղ առավոտից փակել են սյունեցիների ճանապարհը, որպեսզի նրանք խոչընդոտ չհանդիսանան Փաշինյանի մուտքի համար։

«Ախր սա ձեր հողն էլ է, ձեր հայրենիքն էլ է, էս ի՞նչ եք անում։ Մենք եկել ենք մեր տունը պահելու, ձեր երեխեքին պահելու»,- նեղսրտած ոստիկաններին են դիմում քաղաքացիները։

Մեկ ուրիշն էլ նշում է. «Նիկոլ, բա հետո՞, բա հետո՞։ Ոստիկաններ ես բերել, բայց ճար չունես։ Ամոթ է քեզ, ամոթ»։

Սյունեցիները հարց են հնչեցնում՝ այլևս իրենց հայրենիքում, իրենց ծննդավայրերում ապրելու իրավունք չունե՞ն։

«Ես իրավունք չունե՞մ ազատ շնչելու, ազատ քայլելու։ Իմ երեխաներին ո՞նց ազատ պահեմ»,- ասաց քաղաքացիներից մեկը։

Մեկ ուրիշն էլ վստահություն հայտնեց, որ Սյունիք գալով վարչապետը նպատակ ունի իրարանցում ստեղծելու և նոր «Մարտի մեկ» հրահրելու։

«Մենք արգելում ենք թշնամու՝ Փաշինյանի մուտքը Սյունիք։ Ինքն է հիմա թշնամին, քանի որ ստորագրեց։ Մեր դիրքերը 20 կմ հետ ենք բերել, ինչո՞ւ։ Մի գիշերում զորքը հանեց, ինչո՞ւ։ Թող շուտ ասեին, կամավորը կգար, 1000 տեղից կամավորներ կային..., եկան, բայց արդեն ուշ էր։ Թող շուտ ասեին, իմանայինք»,- նեղսրտեց նա։