Ձեր վստահելի աղբյուրը

«Այսքան ժամանակ մենք պահում էինք մեր սահմանը, որովհետև մեզ համար ամենակարևոր թեման մեր սահման է: Մի օր մեզ ասացին, որ հողերը պետք է հանձնել: Դրա համար մենք այստեղ ենք»,- լրագրողներին ասաց Սյունիքում Նիկոլ Փաշինյանի մուտքն արգելող քաղաքացիներից Արմեն Անդրեասյանը:

Նա նշեց, որ իրենք ճանապարհներին թուրքեր են տեսնում, ինչպե՞ս կարող են հանգիստ ապրել:

«Մենք մեզ համար չենք անհանգստանում, մեր երեխաների, ընտանիքների: Ո՞ւր գնանք ապրենք:  Գնանք Նիկոլի տո՞ւն, ամենաապահով տունն է այսօր Հայաստանում: Որտե՞ղ պետք է ապրենք»,- նշեց Ա. Անդրեասյանը:

Նրա խոսքով, իրենք մնալու են այստեղ, չեն թողնելու, որ Փաշինյանը մտնի Սյունյանց աշխարհ. «Օդով է անցնում, հողի տակով է  գնում… Ոստիկանության խմբերը ավտոբուսներով բերել են այստեղ: Մենք այսօր մարդու կարիք ունենք մեր սահմաններում, մարդ չկա, բայց 500 ոստիկանի են բերում, որ մեր առաջը պահեն: Առանց այդ էլ վտանգված ենք, հիմա էլ մեր առաջն են գալիս, պահում: Չի լինելու»:

Ակցիայի մեկ այլ մասնակից հավելեց. «500 չէ, 1000, 2000 ոստիկան է բերվել»:

«Մենք իր հետ հարց ու պատասախան չունենք, իր հետ խոսելու բան չունենք:
Մենք իրեն որպես դավաճան ենք մոտենում: Թող հրաժարական տա, հանձնաժողով ստեղծվի ու քննի, թող ապացուցվի՝ դավաճան է, թե ոչ: Թող հրաժարական տա, մենք չունենք իշխանություն: Մենք վտանգված ենք: Անվտանգության գոտի չունենք, շատ վատ վիճակում ենք»,- ասաց Ա. Անդրեասյանը: