Ձեր վստահելի աղբյուրը

«Մինչև ժամը 18:00-ը «Իմ քայլը» խմբակցությանը ժամանակ ենք տալիս, որպեսզի պատվիրակություն ներկայանա ու «Հայրենիքի փրկության շարժման» ղեկավարության հետ քննարկեն երկրում ստեղծված իրավիճակը»,- Հանրապետության հրապարակում հայտարարեց «Հայրենիքի փրկության շարժման» համակարգող, ՀՅԴ ԳՄ ներկայացուցիչ Իշխան Սաղաթելյանը:

«Հաշվի առնելով, որ այս շենքում նստածն ընդամենը մի խելագար դավաճան է, մենք ստեղծված իրավիճակից լուծումներ գտնելու համար առաջարկում ենք մինչև 18:00-ը «Իմ քայլը» խմբակցությունը ներկայանա ու մեզ հետ քննարկի երկրում ստեղծված իրավիճակը, հաշվի առնելով նաև, որ խորհրադարանական երկիր ենք ու խնդրի լուծումը խորհրդարանում  է»,- ասաց նա:

Ի. Սաղաթելյանը հայտարարեց, որ այս պահին շրջափակված են կառավարության, դատախազության, ԿԳՄՍ նախարարության շենքերը, անհնազանդության բողոքի ակցիաները շարունակվում են:

«Նկատի ունեցեք հարգելի քաղաքացիներ, որ սա հետևողական, վճռական, համառ պայքար է լինելու: Կան դժվարություններ, եղանակը ցուրտ է, բայց մենք պինդ ենք, ամուր ենք միասին: Այս վճռական պահին որոշվում է մեր երկրի ու ապագայի հարցը: Բոլորդ հավաքվեք Հանրապետության հրապարակում»,- հայտարարեց Ի. Սաղաթելյանը:

Նա նշեց, որ սպասում են «Իմ քայլը» խմբակցության արձագանքին, դրանից հետո կպլանավորեն իրենց գործողությունները, վրաններ կտեղադրվեն հրապարակում գիշերելու համար: