Արման Ղուկասյանը՝ դրամաշնորհ ստացած ՀԿ-ներին. Ինչո՞ւ են տրվել այդ գումարները
«Ժողովրդի ձայն» հասարակական ակումբն ուսումնասիրել ու վերլուծել է, թե ինչով են զբաղվում այլ երկրներից, օտարերկրյա հիմնադրամներից դրամաշնորհներ ստացող հասարակական կազմակերպությունները Հայաստանում։
Ակումբի փորձագետ Արման Ղուկասյանն այսօր լրագրողների հետ հանդիպմանը հայտարարեց՝ թվում է, որ դրանք աշխատել են հանուն երկրի զարգացման, մինչդեռ այդպես չէ։
Բանախոսը պնդում է՝ բաց, հրապարակված հաշվետվություններում ՀԿ-ների ֆինանսավորման չափն ու կատարած աշխատանքները մասամբ, ոչ ամբողջությամբ են ներկայացված։
«Ներկայացնելու ենք առավել ակտիվ 40 կազմակերպությունների անուններ։ Կարող եմ հստակ ասել, որ այդ կազմակերպությունների զգալի մասը տարեկան ստանում է 1-2 մլն դոլար ֆինանսավորում։ Իրենք ներկայացնում են 200-300 հազար դոլար ծավալ, բայց իրականում թվերը շատ մեծ են։ Շատ դեպքերում չեն նշվում այն նպատակները, թե ինչի համար են տրամադրվում այդ դրամաշնորհները»,-ասաց Ա. Ղուկասյանը։
Նա նկատեց, որ այսօր շատ հաճախ է խոսվում Սորոսի հիմնադրամի մասին, բայց ինքը հավատացած է՝ դա միայն գագաթն է, և միայն այդ հիմնադրամը չէ, որ խնդիր է Հայաստանի համար։
«Կան տարբեր հիմնադրամներ՝ ամերիկյան, բրիտանական, այդ բոլորը ֆինանսավորվում են USAID-ի կողմից ու բոլորի նպատակը մեկն է՝ քանդել պետությունը, պետականությունը, իրենց կողմից ֆինանսավորվող կազմակերպություններին դարձնել խամաճիկ, հասարակությանը՝ ոչ զգոն, վերահսկվող։ Այսինքն, սրանք կոնկրետ քաղաքական նպատակներ հետապնդող դրամաշնորհներ են, գործիք՝ երկրներին ծնկի բերելու, օկուպացնելու, երկրներն ընդդեմ պետական շահերի տանելու համար։ Հայաստանի դեպքում դա հստակ ուղղված է Հայաստանի պետական շահերի հետ, օրինակ, տարիներ շարունակ քարոզել են, որ թուրքերի հետ պետք է բարեկամություն անել, որ Ռուսաստանը մեր ռազմաբարական դաշնակիցը չէ, որ պետք է տոլերանդ լինել բոլոր հնարավոր այլասերվածությունների նկատմամբ, որ մեր երկրի ազգային կոդը փոխվի, հայը դադարի լինել հայ»,-հայտարարեց Ղուկասյանը։
Վերջինը դրամաշնորհ ստացած ՀԿ-ների ղեկավարներին ու ներկայացուցիչներին հրապարակավ հարց է տալիս՝ ինչո՞ւ են ստացել այս գումարները, ի՞նչ նպատակով։
«Ինչո՞ւ են ստել, երբ ներկայացրել են իրենց ֆինանսական հաշվետվությունները։ Ինչո՞ւ են տրվել նրանց այս գումարները։ Մենք մեծ կասկած ունենք, որ այս գումարները տրվել են, որպեսզի խառնվեն մեր երկրի ներքին գործերին, փորձեն պետությունը ներսից քանդել, ազդեցություն ունենալ ներքաղաքական գործընթացների վրա։ Կան տեղեկություններ, որ իշխանության ներսում կան փայատերեր այս բոլոր ֆինանսական հոսքերում»,-ասաց նա։
Ասուլիսի մյուս բանախոս՝ ակումբի փորձագետ Ծովինար Կոստանյանն ասաց, բավականին երկար ժամանակ է, ինչ նման հետազոտություն են իրականացնում, 2015-ին ծավալուն հետազոտության արդյունքներն են հրապարակել, դրանից հետո արևմուտքից ֆինանսավորվող ու ակտիվություն ցուցաբերող ՀԿ-ների գործունեությունն են ուսումնասիրել։
Ակումբի փորձագետի խոսքով, արդյունքները ցույց են տվել, որ արևմուտքից սնվող կազմակերպությունների թիվը տարեցտարի մեծանում է, գերակշիռ ուղղություններն էլ եղել են ԼԳԲՏ համայնքի ներկայացուցիչների իրավունքներ, կանանց իրավունքները, որոնք հիմնականում լուսաբանվում, ներկայացվում են խեղաթյուրված կերպով, արտաքին քաղաքականության հարցեր, ներառյալ հայ-ռուսական հարբերությունների քննադատման ու վարակաբեկման գործընթաց։
«Այդ ՀԿ-ները նպատակաուղղված քարոզ են տարել, սուտ թեզեր են շպրտել շրջանառության մեջ, որոնց օգնությամբ փորձել են մարդկանց մոլորեցնել ու խաբել։ Նույնը կատարվում է այսօր։ Այդ ՀԿ-ների կողմից, միգուցե իրենց պատվիրատուների հորդորով, մշակվել են թեզեր, որոնց համաձայն արցախյան պատերազմի հետևանքները ռուս-թուրքական գաղտնի պայմանավորվածության արդյունք է, առաջարկում են վերջ դնել Ռուսաստանի հետ հարաբերությւոններին, հայացքն ուղղել դեպի արևմուտք։ Բայց մենք ցավոք սրտի, տեսանք, թե ինչպես Արևմուտքը, որ պետք է առաջինը բարձրաձայներ արձագանքեր Ադրբեջանի կողմից մարդու իրավունքների խախտումներին, գերիների գլխատումներին, խոշտանգումներին , արգելված զենքի կիրառմանը, ողջ ընթացքում լռում էր»,-ասաց նա՝ ընդգծելով, որ դա չի բխում Հայաստանի, հայ ժողովրդի շահերից։
Ակումբի մասնագետներն ուսումնասիրության արդյունքում եկել են այն եզրակացության, որ այդ ՀԿ-ները մեծ ու բազմաշերտ աշխատանք են իրականացնում երիտասարդության հետ, ստեղծում են լրատվական կայքեր, շրջանառում իրենց իսկ կողմից մշակված թեզերը, փորձում են վերահսկողության ներքո վերցնել պետական ապարատը, քննադատում ու ցեխ են շպրտում ԱԱԾ ու այլ կառույցների ուղղությւամբ։
«Սա բիզնես է, նրանք գումար են ստանում այդ հիմնադրամներից ի վնաս հայ ժողովրդի շահերի։ Նրանք կատարում են դրսից եկեղ պատվեր։ ԱԱԾ-ն պետք է պարզի, թե ովքեր են պատվիրատուները, միայն արևմյան հիմնադրամները, թե՞ նաև Թուրքիան ու Ադրբեջանը»,- նշեց բանախոսը։
Ի դեպ, Կոստանյանն ասաց, նախորդ անգամ տվյալների հրապարակումից հետո ստացել են անանուն սպառնալիքներ, խորհուրդ տվեց, սպառնալու փոխարեն, հանդիպել իրենց հետ, քննարկել տեղեկատվությունը, հարկն եղած դեպքում նաև հերքել։
Ակումբի ներկայացուցիչները տարածել են նաև այդ ՀԿ-ների անուններն ու ֆինանսավորման չափը։ Հրապարակած տեղեկանքը՝ հղումով։
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
