Փաստաբանները միանում են այսօրվա երթին, ապա հավաքին
Բազմաթիվ փաստաբաններ ֆեյսբուքյան իրենց էջերում դեռ երեկվանից տեղեկացնում են, որ միանալու են դեպի ԱԺ և ՀՀ դատախազություն երթին, ապա մասնակցելու են Հանրապետության հրապարակում այսօր կայանալիք հավաքին։
Ներկայացնում ենք փաստաբաններից մի քանիսի գրառումները.
Փաստաբանների պալատի նախագահ Արա Զոհրաբյանը գրել է.
«ՄԵՐ ՊԵՏԱԿԱՆՈՒԹՅԱՆ ԿՈՐՍՏԻ ՎՏԱՆԳՆ Է ՍՏԻՊԵԼ ՈՏՔԻ ԿԱՆԳՆԵԼ
22.12.2020թ. (երեքշաբթի) ժամը 11:00-ին գործընկերներիս հետ ՀՀ փաստաբանների պալատի գտնվելու վայրից երթով շարժվելու ենք դեպի ՀՀ Ազգային ժողով, իսկ այնուհետև՝ ՀՀ գլխավոր դատախազություն:
Ներկայացնելու ենք հետևյալ փաստաթղթերը՝
ա) ԱԺ նախագահին՝ ռազմական դրությունը վերացնելու և վարչապետին անվստահություն հայտնելու պահանջը.
բ) փաստաբան հանդիսացող պատգամավորներին՝ «Իմ քայլը» խմբակցությունից դուրս գալու հորդորը.
գ) ՀՀ գլխավոր դատախազին՝ հանցագործության մասին հաղորդումը:
Մենք՝ փաստաբաններս ցանկանում ենք Մարդուն պաշտպանել Հայաստանի Հանրապետության դրոշը կրող դատարանում:
Մեր պետականության կորստի վտանգն է ստիպել ոտքի կանգնել և օր առաջ ազատվել վտանգի աղբյուր հանդիսացող վարչապետից և իր թիմից»։
«Ես` փաստաբան Ելենա Կասպարովաս դեկտեմբերի 22-ին ժամը 11։00-ին գործընկերներիս հետ մասնակցելու եմ դեպի Ազգային ժողով և ՀՀ գլխավոր դատախազություն երթին, որից հետո ժամը 12։00 -ին միանալու ենք էլիտար և արժանապատիվ մեր հայրենակիցներին` Հանրապետության Հրապարակում։ Կոչ եմ անում բոլոր իմ ընկերներին միանալ մեզ։ Տեր կանգնենք մեր երկրին»։
«Ես՝ փաստաբան Արամ Վարդևանյանս վաղը 10:55 լինելու եմ Փաստաբանների պալատի գտնվելու վայրում և մասնակցելու եմ դեպի Ազգային ժողով և Գլխավոր դատախազություն մեր երթին: Երթից հետո լինելու եմ Հանրապետության հրապարակում իմ ընկերների հետ միասին»։
Փաստաբան Երվանդ Վարոսյանը գրել է.
«Վաղը, ժամը 12.00 բոլորս պետք է լինենք Հանրապետության հրապարակում, անկախ մեր քաղաքական հայացքներից, անկախ այս կամ այն գործչի հանդեպ մեր վերաբերմունքից։
Հայրենիքից թանկ ոչինչ մենք չունենք»։
Փաստաբան Ամրամ Մակինյանը տեղեկացրել է.
«Վաղը՝ ժամը 12-ին, ես լինելու եմ Հանրապետության Հրապարակում, ես գալու եմ հրաարակ հանուն գենիս ու երկրիս արժանապատվության, հանուն վաղվա հաղթանակների, հանուն Քեզ, իսկ դու՞…»։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
