Ձեր վստահելի աղբյուրը

«Ստորագրված փաստաթղթով ստեղծված իրադրությունից դուրս գալու համար մենք մեծ ջանքեր պետք է ներդնենք, որպեսզի կարողանանք պետության հետագա զարգացումն ապահովենք»,-հայտարարեց Արցախի հերոս, գեներալ-գնդապետ, պաշտպանության նախկին նախարար Սեյրան Օհանյանը՝ ելույթ ունենալով Նիկոլ Փաշինյանի հրաժարականի պահանջով Հանրապետության հրապարակում շարունակվող հանրահավաքում։

Նա նշեց, իր համար մեծ պատիվ է այդեղ գտնվելը, տարիներ ի վեր ծառայել է Հայաստանի ու Արցախի Հանրապետությունների, ունեցել  է գերագույն-գլխավոր հրամանատարներ, որոնք ճանապարհ են անցել,  կերտել են պետության նորագույն պատմությունը, ասաց՝ իր համար միանշանակ ամենագերագույն հրամանատարը եղել է ժողովուրդն ու պետականությունը։

Օհանյանն ընդգծեց, պատերազմի ձախողումների ու արդյունքների մասին խոսում է  ստորագրված հայտարարությունը, սակայն հայկական բանակը, գեներալները, ժողովուրդը չեն պարտվել։

«Պարտվել է իշխանությունն իր անգրագետ գործողություններով, ճիշտ չգնահատելով ռազմաքաղաքական իրադրությունը, ճիշտ չդասավորելով ունեցած ուժերն ու միջոցները»,-ընդգծեց ռազմական գործիչը։

Նա փաստեց՝ հայկական կողմն ունեցել է 283 կմ կահավորված առաջին գիծ, և միայն երկու վայրում՝ մոտ 20 կմ-ում է եղել ճեղքում, ապա մխրճում թշնամու կողմից։

«Ես վստահ եմ, որ կարող էինք այնպես անել, որ հակառակորդը չկարողանար առաջանալ, հատկապես լեռնաանտառային պայմաններում։ Ես այս պահին ուզում եմ մեր և ձեր խոնարհումն արտահայտել արժանի ու հերոս հրամանատարների ու զինվորների առաջ, որոնք պաշտպանել են հայ ժողովրդին, նրանց արժանապատվությունը, եթե հարկ լինի, նորից կպաշտպանեն՝ անկախ իշխանությունից»,-ասաց Սեյրան Օհանյանը։

Նա հիշեցրեց, որ քաղաքական որևէ ուժի անդամ չէ, բայց պնդում է՝ Հայաստանում պետք է փոփոխություններ լինեն, մինչդեռ փորձում են ոչնչացնել այն  դրականը, որ ձեռք է բերվել երեսուն տարիներին։ Օհանյանն ասաց՝ կարծում էր իշխանափոխությունը պետք է զարգացման հիմք դառնա, մինչդեռ անցած երկուսուկես տարիներին տեսել են միայն հետապնդումներ, շանտաժներ, խմբակային պլաների իրականացում, ձախողել են արտաքին քաղաքականությունը, ավելացել են խնամի-ծանոթ-բարեկամ սկզբունքով նշանակումները, եղել են մարդկային ռեսուրսի կառավարման խնդիրներ։

«Չեն կարող մանրախնդիր մարդիկ լինել երկրի ղեկավար, իսկ մանրախնդիր են միայն անփորձները։ Փորձառու մարդիկ են լինում մեծահոգի։ Տեսեք՝ ինչ է կատարվում, մեկը մի ազատ խոսք է ասում, կանչում են իրավապահ մարմինները»,-ասաց Օհանյանը՝ ընդգծելով, որ 2.5 տարվա ընթացքում այդ փորձը ձեռք չի բերվում։

Նրա խոսքով, փոխարեն հենվեն դրականի վրա, ոչնչացնում են այդ հիմքը։

«Ես ինչու պետք է լռեմ, երբ իմ մարտական ընկերների աշխատանքը, նույնիսկ եթե թերություններ ունեցել ենք, զրոյացվում են»,-նշեց նա։

Հնարավոր քննադատություններին ու մեղադրանքներին ի պատասխան՝ Սեյրան Օհանյանը հայտարարեց, որ ինքն իշխանության համար չի պայքարում, իշխանության չի ձգտում։

«Անգրագետ  ղեկավարումն է , որ բերել է այս պարտության։ Ես չէի խոսի, եթե չտեսնեի, որ այդ պարտությունները, ձախողումները շարունակվում են»,-նշեց նա՝ ընդգծելով, աջակցում է Վազգեն Մանուկյանի թեկնածությունը, «էդ ինչքա՞ն եղավ, անփորձ թիմը, որ քննադատում է  Վազգեն Մանուկյանին, ում ինչի՞ հետ ենք համեմատում, սիրելի հայրենակիցներ»։