Ձեր վստահելի աղբյուրը

Քաջարանի քաղաքապետ Մանվել Փարամազյանին մեղադրանք է առաջադրվել: Լրագրողներին այս մասին հայտնեց Փարամազյանի պաշտան Երվանդ Վարոսյանը:

«8 ամիս առաջ Քաջարանում դեպքեր տեղի ունեցան՝ կապված Քաջարանի 3 քաղաքացիների ձերբակալության հետ: Այսօր Մանվել Փարամազյանին մեղադրանք առաջադրվեց՝ իբր այդ անձանց հետ խմբով ինչ-որ մեկին իբր առևանգելու հետ կապված:

Կարող եմ ասել, որ ոտքից գլուխ անհեթեթություն է: Այդ տղաները, ում ձերբակալել էին, վաղուց ազատության մեջ են։ Մամուլից, իմ ունեցած տեղեկություններով այն անձը, որ որպես տուժող էր ներկայացվում, վաղուց իրականությունը ներկայացրել է: Անկախ ամեն ինչից՝ նման դեպք տեղի ունեցել է, չի ունեցել, տեղեկություններ էլ չունենք, բայց այն, որ Քաջարանի համայնքապետը դրա հետ առնչություն չունի, փաստ է:

Ուստի ակնհայտ է, որ սա քաղաքական վրեժխնդրություն է, հետապնդում է: Մեր դիրքրոշումն էլ հայտնեցինք»,- ասաց պաշտպանը:

Երվանդ Վարոսյանը սա կապում է երկու հանգամանքի հետ.  «Քաջարանի  համայնքապետն ակտիվ մասնակցություն է ունեցել մարտական գործողություններին հայրենիքի պաշտպանության ուղղությամբ և Սյունիքի համայնքապետերի ու ավագանիների տարածած հայտարարությունը, որով պահանջեցին կառավարության հրաժարականը»:

Ըստ պաշտպանի, ծիծաղելի է՝ 8 ամիս անց  ինչ-որ մեկը որոշում է  նման մեղադրանք առաջադրել:

«Սա խոսում է  այն մասին, որ առաջին հերթին պարոն Փարամազյանն այնքան մաքուր անձնավորություն է, որ ուրիշ որևէ բան չի գտնվել, քան այդ հեքիաթը: Բայց այն, որ այս ամեն ինչը կապված է միայն քաղաքական գործընթացների հետ, անառարկելի է»,- ընդգծեց Ե. Վարոսյանը:

Նախաքննական մարմինը  որոշում է  կայացրել կալանավորումը որպես խափանման միջոց ընտրելու միջնորդություն ներկայացնել դատարան: Ե. Վարոսյանի խոսքով, դեռ տեղեկություն չունեն՝  երբ կներկայացվի, երբ կնշանակվի համապատասխան դատական նիստը: