Ձեր վստահելի աղբյուրը

«Տեղի է ունենում քաղաքական տեռոր, այլ բառ չի կարելի օգտագործել»,-Քննչական կոմիտեի դիմաց լրագրողների հետ զրույցում ասաց Սյունիքի նախկին մարզպետ Վահե Հակոբյանը:

Նա չի հասկանում, թե ի՞նչ է նշանակում, երբ  դատարանը երեկ ոչ իրավաչափ է ճանաչում Գորիսի քաղաքապետ Առուշ Առուշանյանի  ձերբակալումը և 40 րոպե հետո այլ մեղադրանք է առաջադրվում. «Սա քաղաքական հետապնդում է, ես այլ գնահատական չեմ կարող տալ: Այստեղ միանշանակ նպատակ է հետապնդվում գլխատել Սյունիքը: Այսօր այստեղ գտնվում է երկու հրամանատար (խոսքը՝ Գորիսի և Քաջարանի քաղաքապետերի մասին է, որոնք նաև կամավորական ջոկատների հրամանատարներն են), ովքեր թողել են դիրքերը և եկել այստեղ, որովհետև իրենց քննչական մարմինն է կանչել: Ինչի՞  են ուզում հասնել սրանով, որ թուրքը մտնի Սյունի՞ք: Թուրքը, որ մտավ Սյունիք, վաղը գալու է այստեղ կանգնի,  նույնն քննիչների տների, աշխատասենյակների առջև»:

«Խոսքս ուզում եմ ուղղել այն ուժային մարմինների ներկայացուցիչներին, որոնք դեռ մի քիչ գիտեն՝ ինչ է արհեստավարժ մոտեցումը գործին:  Տղերք՝ մի արեք, դա ոչ մի լավ բանի չի բերելու:  Եթե իրենք շարունակեն այս ուղղությունը, իրենք կիսելու են Նիկոլ Փաշինյանի պատասխանատվությունն այն հանցագործությունների համար, որոնք ինքն արդեն կատարել է, կատարում է և փորձելու է կատարել ապագայում»,- ասաց Վ. Հակոբյանը:

Նա  նշեց, որ սյունեցիները մնալու են այնքան, մինչև իրենց քաղաքի ղեկավարները հետ չդառնան և չզբաղվեն Սյունիքի պաշտպանությամբ:

«Ինձ համար Փաշինյանը վարչապետ չէ, դավաճան է և պետք է հեռանա, անհետանա մեր կյանքից, կապ չունի՝ ոնց: Պարզապես մեկ օր պետք է արթնանանք ու տեսնենք, որ վարչապետը գոյություն չունի, բայց ի վերջո պատասխան է տալու դատարանի առաջ իր կատարած  այս բոլոր հանցանքների համար»,-ասաց Վահե  Հակոբյանը:

ՔԿ դիմաց հավաքված սյունեցիները հայտարարեցին, որ իրենք այստեղից չեն հեռանա, մինչև իրենց համայնքների ղեկավարները չվերադառնան, պատրաստ են ամենավերջին քայլերին դիմելուն:

«Այսօր սահմանն անպաշտպանն է: Մեր հրամանատարներին բերման են ենթարկել: Եթե սա դավաճանություն չէ՞, ի՞նչ է»,- հայտարարեց սյունեցիներից մեկը: