Ձեր վստահելի աղբյուրը

«Ցավալի է, որ որպես համայնքի ղեկավար, «Քաջարան» կամավոր ջոկատի հրամանատար, այսօր մարտական դիրքերը թողել եմ, քանի որ կանչել են հարցաքննության»,- լրագրողների հետ զրույցում ասաց Քաջարանի քաղաքապետ Մանվել Փարամազյանը, ով պատրաստվում է մտնել Քննչական կոմիտե:

Նրա խոսքով, սա քաղաքական պատվեր է, քաղաքական հետապնդում: Մանվել Փարամազյանը նշեց, որ այս իշխանություններին ձեռք չի տալիս ունենալ հերոս տղաներ:

«Մենք մտահոգված ենք մեր սահմաններով, պաշտպանությամբ, բայց եկեք ու տեսեք, թե այսօր իրենք ինչով են զբաղված:

Մենք այսօր իշխանություններից պահանջում ենք անվտանգություն, ապահով կյանք: Այստեղ հավաքված սյունեցիներն աթոռ ու պաշտոն չեն ուզում, միան ուզում են ապրել անվտանգ ու խաղաղ երկնքի տակ»,- ընդգծեց Քաջարանի քաղաքապետը:

Նրա համար անհասկանալի է, թե ինչու է հրավիրվել ՔԿ:

Հիշեցնենք՝  Քննչական կոմիտեն երեկ Panorama.am-ին տեղեկացրել էր, որ ՀՀ քննչական կոմիտեի հատկապես կարևոր գործերի քննության գլխավոր վարչությունում քննվող քրեական գործի շրջանակում, Քաջարանի համայնքի ղեկավարը դեկտեմբերի 22-ին հրավիրվել է Քննչական կոմիտե, սակայն վերջինս չի ներկայացել, կապ է հաստատել վարույթն իրականացնող քննիչի հետ խնդրելով՝ ներկայանալ դեկտեմբերի 23-ին: Վարույթն իրականացնող մարմինը ընդառաջել էր նրա խնդրանքին:

Հարցին արդյո՞ք ՔԿ հրավիրվելը կապված է իր այն հայտարարության հետ, որ միանում է վարչապետի հրաժարականին: Մանվել Փարամազյանը դրական արձագանքեց՝ նշելով, որ հավատարիմ են մնում իրենց պահանջին:

«Մեր պահանջն անփոփոխ է: Նախ վարչապետին մեղադրում ենք նրա համար, որ քիչ է պատերազմ եղավ, 8-10 օր բառիս բուն իմաստով պատերազմից հետո էլ միայն նահանջ, նահանջ ու նահանջ է եղել: Հենց պատերազմի սկզբից մեր ջոկատով մեկնել ենք Ջաբրայիլ: Այդ ամենը տեսել ենք»,- նշեց քաղաքապետը:

Նա ասաց, որ այսօր ժողովուրդը վախով է ապրում, Սյունիքում ճանապարհներն անվտանգ չեն, մարդիկ այլընտրանքային ճանապարհներով են երթևեկում: 

«Թուրքը եկել, հասել է մեր թքի տակ, տան առաջ, մնում է ծեծեն դուռն ու ասեն՝ դուրս եկեք: Երեկ Որոտանում թուրքը եկել ու 5 հոգանոց ընտանիքին 1 ժամ ժամանակ է տվել տունն ազատելու համար: Մարդն իր երկրում ապահով չի: Մեր պայքարը հենց սրա համար է՝ անվտանգության գոտի ստեղծենք: Հիմա բերել, հասցրել ենք թշնամուն Կապան»,- ասաց Մանվել Փարամազյանը: