Ձեր վստահելի աղբյուրը

Միջազգային լրատվամիջոցներն ակտիվորեն լուսաբանում են Երևանում նախօրեին տեղի ունեցած ընդդիմության հանրահավաքները։

France 24. Հայաստանի ընդդիմությունը բողոքի ցույցեր է կազմակերպում, գործադուլ Ղարաբաղի հետ կապված

Հազարավոր ցուցարարներ երեքշաբթի օրը հավաքվել էին Հայաստանի մայրաքաղաքում՝ պահանջելով վարչապետ Նիկոլ Փաշինյանի հրաժարականը՝ Ադրբեջանի հետ վիճահարույց խաղաղության գործարքի պատճառով, գրում է france 24-ը։

Ըստ դեպքի վայրում AFP-ի թղթակցի, մոտ 25,000 ցուցարարներ հեղեղել են Երևանի կենտրոնը` վանկարկելով «Նիկոլ դավաճան» և «Հայաստան՝ առանց Նիկոլի»:

Ցուցարարները շրջապատել էին կառավարության շենքը և  ոստիկանության հատուկ ջոկատայիններին կոչ անում միանալու ժողովրդին:

Նշվում է, որ Փաշինյանը կատաղություն առաջացրեց, երբ անցյալ ամիս ստորագրեց Մոսկվայի միջնորդությամբ կնքված համաձայնագիրը՝ վերջ տալով վեց շաբաթվա պատերազմին, որի արդյունքում ավելի քան 6000 մարդ զոհվեց:

Հանրահավաքը տեղի ունեցավ մի օր անց, երբ ցուցարարները փակել էին դեպի սահմանամերձ Գորիս տանող ճանապարհները՝ ստիպելով Փաշինյանին կարճել պաշտոնական այցը։ Նշվում է, որ Գորիսի քաղաքապետ Առուշան Առուշանյանը կոչ էր արել ցուցարարներին արգելել Փաշինյանին՝ մուտք գործել Սյունիքի հարավային շրջան, իսկ ավելի ուշ ոստիկանությունը բերման է ենթարկել նրան:

PBS News Hour. Հազարավոր մարդիկ բողոքում են Հայաստանում և պահանջում վարչապետի հրաժարականը

Երեքշաբթի Հայաստանում ընդդիմության կողմնակիցները ուժեղացրին ճնշումը վարչապետի վրա՝ հրաժարական տալու Ադրբեջանի հետ Լեռնային Ղարաբաղի հակամարտության կարգավորման հետ կապված՝ մայրաքաղաքի գլխավոր հրապարակում բողոքի վրանային ճամբար հիմնելով:

Ընդդիմության քաղաքական գործիչները և նրանց կողմնակիցները պահանջում են, որ Նիկոլ Փաշինյանը հեռանա՝ նոյեմբերի 10-ին կնքված խաղաղության պայմանագրից հետո, որով Ադրբեջանը հետ վերադարձրեց վերահսկողությունը Լեռնային Ղարաբաղի և հարակից տարածքների մեծ մասերի վրա: Ռուսաստանի միջնորդությամբ կնքված համաձայնագրով ավարտվեց 44-օրյա կատաղի մարտերը։

Տասնյակ հազարավոր ցուցարարներ հավաքվել էին Երևանի կառավարական շենքերում ՝ վանկարկելով «Նիկոլ, հեռացիր»: Հանրահավաքից մի քանի ժամ անց ընդդիմության կողմնակիցները վրաններ տեղադրեցին Երևանի գլխավոր հրապարակում:

Ռիա Նովոստի․Երևանում ցուցարարները գիշերեցին Կառավարության տան հարակից հրապարակում

«Երևանում ցուցարարները մնացին գիշերելու Հանրապետության հրապարակում ՝ Հայաստանի կառավարության շենքի մոտ»,- գրում է Ria-ն, նշելով, որ այս մասին հայտարարել էր Դաշնակցություն կուսակցության ներկայացուցիչ Իշխան Սաղաթելյանը:

«Մենք պայմաններ կապահովենք նրանց համար, ովքեր ցանկանում են գիշերել հրապարակում: Վաղը առավոտյան զանգվածային բողոքի ցույցերը և գործադուլները կշարունակվեն ամբողջ Հայաստանում: Մենք կշարունակենք մեր գործողությունները մինչև 16:00։ 16:00-ին տեղի կունենա մեծ հանրահավաք, և մենք մենք բոլորս անցնելու ենք ավելի կտրուկ ու վճռական գործողությունների», - ասել է Սաղաթելյանը։

Ըստ նրա՝ ցուցարարները չեն լքի հրապարակը, քանի դեռ վարչապետ Նիկոլ Փաշինյանը հրաժարական չի տվել:

TASS. Հայաստանի ընդդիմությունը վրաններ տեղադրեց Հանրապետության հրապարակում՝ պահանջելով Փաշինյանի հրաժարականը

Վարչապետ Նիկոլ Փաշինյանի հրաժարականը պահանջող բողոքի ցույց սկսած Հայաստանի ընդդիմությունը, կառավարության շենքի դիմաց, Հանրապետության հրապարակում տեղադրեց մի քանի վրաններ և մտադիր է այնտեղ մնալ գիշերը։

Նշվում է, որ «Հայրենիքի փրկության շարժումը» հայտարարել է զանգվածային գործադուլների ու քաղաքացիական անհնազանդության մասին: Ընդդիմությունը կարծում է, որ նոյեմբերի 9-ին համատեղ հայտարարությունը Լեռնային Ղարաբաղում ռազմական գործողությունների ամբողջական դադարեցման մասին, ըստ էության, կապիտուլյացիա է, գրում է Tass-ը։ Հայաստանի վարչապետի ընդդիմախոսները նրան մեղադրում են նաև երկրի տնտեսական և սոցիալական խնդիրների մեջ:

Երկրում ստեղծված իրավիճակի ֆոնին Հայաստանի նախագահ Արմեն Սարգսյանը կոչ արեց արտահերթ խորհրդարանական ընտրություններ անցկացնել, իսկ դրանցից առաջ իշխանությունը փոխանցել ազգային համաձայնության կառավարությանը: Փաշինյանն ինքը հայտարարում է, որ հրաժարական չի տալու, քանի որ ցանկացած իշխանափոխություն պետք է տեղի ունենա միայն ընտրությունների միջոցով: 

Ռուսական Առաջին ալիք․  Ընդդիմությունը արգելափակում է Հայաստանի կառավարության և գլխավոր դատախազության շենքերը

«Հայաստանի գործող վարչապետի հակառակորդները խոստանում են վաղը վճռական գործողությունների դիմել: Այսօր Երևանում մեկնարկել է ընդդիմության ուժերի կողմից հայտարարված լայնածավալ ակցիան»,- գրում է Առաջին ալիքը:

Հազարավոր ցույցեր կառավարության շենքի մոտ են: Մասնակիցները պահանջում են Նիկոլ Փաշինյանի հրաժարականը և բանակին կոչ են անում անցնել իրենց կողմը: Փաշինյանն իր Ֆեյսբուքում գրել է՝ հավատում է, որ այն, ինչ տեղի է ունենում փողոցում, ոչ թե ընդդիմության ելույթ է, այլ նախկին էլիտաների պայքար՝ կորցրած իշխանության համար: 

Россия 24. Բողոքի ակցիաներ Երևանում. ցուցարարները պահանջում են Հայաստանի վարչապետ Նիկոլ Փաշինյանի հրաժարականը: Ցուցարարները շրջապատել են կառավարության, գլխավոր դատախազության և արտաքին գործերի նախարարության շենքերը: Ցուցարարների և ոստիկանության միջև բախումներ են գրանցվել: