Ձեր վստահելի աղբյուրը

Կառավարության այսօրվա նիստում Արդարադատության նախարար Ռուստամ Բադասյանը իր զեկույցից հետո Նիկոլ Փաշինյանին միջնորդեց, որ խոսք տան նաև ՀՀ փոխոստիկանապետ Արա Ֆիդանյանին:

Վերջինս հայտնեց, որ Կառավարությունը մտադիր է համաներել ռազմական գործողությունների հետևանքով սեպտեմբերի 27-ից դեկտեմբերի 27-ը ճանապարհային երթևեկության անվտանգության բնագավառի օրենսդրության մի շարք հոդվածների խախտումների համար վարչական տույժ նշանակելու մասին որոշումները:

Նրա խոսքով, առաջարկում է մի շարք վարչական իրավախախտումների համար կիրառված վարչական տույժերի համաներման մասին օրենքի ընդունում, որի նախագիծն արդեն նախնական տարբերակով պատրաստ է, իսկ երկրորդ կարգավորումը Վարչական իրավախախտումների վերաբերյալ ՀՀ օրենսգրքի 17-ով  հոդվածով կարգավորվող ծայրահեղ անհրաժեշտության կիրառումն է:  փոխոստիկանապետն առաջարկեց  որոշել, թե համաներման համար որ տարբերակն ընդունեն:

Նիկոլ Փաշինյանը հիշեցրեց, որ օրեր առաջ Գորայք համայնքում քաղաքացիներից մեկը նման հարց էր բարձրացրել՝ նշելով, որ պատերազմի ծայրահեղ անհրաժեշտությունից ելնելով խախտել են  երթևեկության կանոնները և հիմա տուգանքներ են գալիս:

Նկատելով, որ նման դեպքերում լինում են շահառու չհանդիսացող մարդիկ, ովքեր արագ օգտվում են արտոնությունից՝ Փաշինյանը հայտնեց. «Հետևաբար՝ շատ կարևոր, որ մենք կարողանանք հնարավորինս արագ ռազմական գործողությունների մասնակիցներին նույնականացնել և դա պաշտոնապես հաստատել, որ չունենանք երկու իրավիճակ, որոնք հավասարաբար տհաճ են. առաջինը՝ ռազմական գործողություններին չմասնակցած անձինք չկարողանան այդպիսի անվան ներքո հանդես գալ և օգտվել ամենատարբեր արտոնություններից, և երկրորդը՝ ռազմական գործողություններին մասնակցած անձինք ստիպված չլինեն չափից երկար սպասել, որ իրենց մասնակցության փաստը հաստատվի»: