Ձեր վստահելի աղբյուրը

«Հայրենիքի փրկության շարժման» վարչապետի թեկնածու Վազգեն Մանուկյանի խոսքով, Նիկոլ Փաշինյանի հրաժարականի պահանջով ակցիաները շարունակական են լինելու, քանի որ չի կարելի այդպիսի մարդուն թողնել իշխանության:

«Փողոցից ցանկացած մեկին վերցրեք, դրեք Փաշինյանի փոխարեն, Հայաստանի համար տասն անգամ ավելի լավ կլինի»,- այսօր՝ Կառավարության դիմաց Նիկոլ Փաշինյանի հրաժարականի պահանջով բողոքի ակցիայի ընթացքում լրագրողների հետ զրույցում ասաց նա:

Ըստ նրա, քաղաքակիրթ ճանապարհով Փաշինյանի հրաժարականին հասնելու համար ժողովուրդը պետք է դուրս գա փողոց, մասնակցի հանրահավաքներին:

«Եթե հարյուր հազար մարդ հիմա այստեղ կանգնած լիներ, հարցը վերջացած կլիներ: Բայց այդ մարդիկ կան ու դժգոհ են, հասկանում են, որ երկիրը կործանվում է, բայց տանը նստած են: Մեկը մեկին չի վստահում, մեկը մեկին չի հավատում: Մեր ժողովուրդն էլ է մեղկ, դեպրեսիայի մեջ է: 2.5 տարի առաջ ոտքի բարձրացավ՝ մտածելով, որ լավ կյանք է ունենալու, հիմա ամաչում է դուրս գա արդեն: Դեպրեսիվ վիճակ է, բայց ժողովուրդը դրանից դուրս կգա: Հայաստանում ինչ կատարվի, կատարվելու է ոչ թե ջոկատների միջոցով, այլ՝ ժողովրդի»,- նկատեց վարչապետի թեկնածուն:

Դիտարկմանը, որ Նիկոլ Փաշինյանն էլ ասում է՝ հրաժարական չի տալու, քանի որ ժողովուրդի մի մասը դեմ է իր հրաժարականին, Վազգեն Մանուկյանն արձագանքեց՝ ասելով, որ ցանկացած ժամանակում էլ կա ժողովրդի մի հատված, որ իշխանության կողմից է:

«Դա ի՞նչ նշանակություն ունի: Ինքը երկիրը կործանել է, հանցագործը պետք է նստի բանտում, իսկ ինքը հանցագործ է»,- ասաց նա։

Վարչապետի միասնական թեկնածուն հավելեց՝ որքան ուշանում է Փաշինյանի հրաժարականը, այդքան կորուստները շատանում են:

«Հիմա էլ պայմանագիր կկնքեն Ադրբեջանի հետ, որտեղ կֆիքսեն այդ սահմանները, հետո մենք մեծ պրոբլեմ ենք ունենալու՝ այդ սահմանները վերադարձնելու հետ կապված: Պատերազմը շարունակվում է: Մենք արդեն կորցրել ենք հսկայական տարածքներ, հազարավոր երիտասարդներ, պատիվ ու ինքնավստահություն»,- նշեց նա։

Վազգեն Մանուկյանի խոսքով, զարմանալի է հայ ժողովուրդը:

«Ցանկացած իշխանության ժամանակ կան գող ու ավազակներ, ինչպես նաև ազգին նվիրված մարդիկ, հերոսներ: Ինքը բաժանեց հին ու նորի, հետո արդեն կոռուպցիոներ-ոչ կոռուպցիոներ, հիմա էլ ասում է՝ էլիտա և ժողովուրդ: Ու դեռ կա ժողովրդի փոքր հատված, որ հալած յուղի տեղ ընդունում է մի տգետ, փոքրիկ, կրծող տառականի ասածները»,- շեշտեց նա: