Ձեր վստահելի աղբյուրը

Նիկոլ Փաշինյանը կառավարության այսօրվա նիստում արձագանքել է Սյունիքի մարզում իրականացվող սահմանազատման աշխատանքներին:

Նկատելով, որ դրանք ունեն որոշակի նրբություններ ու բարդություններ՝ Փաշինյանը նշեց. «Մեր համոզմունքն է՝ այդ աշխատանքը պետք է տեղի ունենա, որովհետև այդ աշխատանքն անհրաժեշտ է Սյունիքի և Հայաստանի Հանրապետության անվտանգության ապահովման տեսանկյունից: Մեր դիրքորոշումը, պաշտպանության նախարարության դիրքորոշումն է՝ մենք այս գործունեությամբ ավելացնում ենք Սյունիքի անվտանգության երաշխիքները, և Սյունիքի ու Հայաստանի անվտանգության երաշխիքների նոր համակարգ ենք ձևավորում»:

Նար կարծիքով միայն Որոտան համայնքի, Շուռնուխ բնակավայրի  մասով կարող են ծագել հարցեր:
«Դրանց շուրջ ամենօրյա աշխատանք է տեղի ունենում, և այդ հարցերը կարող են որոշակի ցավոտ իրավիճակների բերել, բայց ես ուզում եմ հավաստիացնել, որ բոլոր այն պարագաներում, եթե մեր քաղաքացիների շահերի տեսանկյունից որոշակի հարցեր կառաջանան, կառավարությունը լիարժեքորեն, համարժեք փոխհատուցումներով հանդես կգա, և մեր քաղաքացիների շահերը լիարժեքորեն կլինեն պաշտպանված»,- վստահեցրեց Նիկոլ Փաշինյանը:

Փաշինյանը կարևորեց այդ թեմայով ճիշտ տեղեկատվության տրամադրումը, քանի որ, ըստ նրա՝ մամուլում մի դեպքի վերաբերյալ հարյուրավոր հրապարակումներ կարող են լինել, և դրանցից կարող է մասշտաբային տպավորություն ստեղծվել:

Նա հայտնեց,  որ այս պրոցեսները չի կարելի համարել սահմանների դեմարկացիա և դելիմիտացիա, այլ տեղի է ունենում սահմանային կետերի տեղորոշում, որի նպատակը անվտանգության ապահովումն է: Փաշինյանը տեղեկացրեց, որ առավոտյան քննարկում է ունեցել Հայաստանի սահմանապահ զորքերի հրամանատարի հետ, տվել է կոնկրետ հանձնարարականներ: