Ձեր վստահելի աղբյուրը

20։01

Քիչ առաջ գերիների, անհետ կորածների հարազատները բացեցին Բաղրամյան պողոտան: Նրանք ասացին՝ վարչապետը խոստացել է, որ դեկտեմբերի 25-ին, ժամը 10։00-ին բաց հանդիպում կկազմակերպի իրենց հետ։ «Մենք ծնողներն ենք, որոնք ունեն պահանջներ։ Պահանջել ենք բաց հանդիպում, որը վարչապետը խոստացել է։ Այն կլինի վաղը՝ ժամը 10։00-ին»,- ասաց անհետ կորած զինծառայողներից մեկի հարազատը։ 

19:45

Գերիների, անհետ կորածների հարազատները ևս մասնակցում են բողոքի ակցիաներին։
Անհետ կորած զինծառայողներից մեկի մայրը դիմելով ոստիկաններին՝ ասաց, թե ինչ անեն, որ իրենց բարձրացրած հարցերը լուծում ստանան։

«Ո՞ւր է իմ երեխան, ցույց տվեք ճանապարհը, ոնց հասնենք մեր երեխուն։ Ինչ ուզում է տա, գոնե երեխեքին հետ բերի։ Օրական մենակ լսում ենք մի բան տալիս է, բայց ո՞ւր են էրեխեքը։ Ինքը (վարչապետը՝ խմբ) իմ հետ միասին թող Աստծուն խնդրի, որ իմ երեխեն տուն գա, թե չէ խոստանում եմ, որ աչքերը կհանեմ իմ մատներով»,- ասաց նա։ 

19:35

«Մեկը եղե՞լ է Կառավարությունից Ղարաբաղ մեր կողքը կանգնած։ Նստել են աթոռներին, գնացել իրանց տները տաք քնել են: IIսկ մենք ընտեղ չէինք գնացել քնելու, մի կտոր բան լափելու։ Ուրեմն ասեմ, ներկայիս լափողներ, քայլեր ձեռնարկեք, ես անգամ ասել եմ, կարամ գամ որպես ծնող հանձնվեմ, իմ երեխուն տվեք»,- ասաց բողոքի մասնակիցներից մեկը։

19:15

«Երբ դու պարտվում ես, այն էլ խայտառակ ձևով, թշնամու ախորժակը բացվում է և նա շարունակում է իր նվաճողական քաղաքականությունը, որքան որ հնարավոր է, մինչև վերջ, մինչև Հայաստանի վերացումը»,- այս մասին Բաղրամյան պողոտայում անցկացվող ակցիայի ժամանակ ասաց իրավապաշտպան Ավետիք Իշխանյանը։

Նրա խոսքով, այսօր մեր երկիրը գտնվոմ է այդ իրավիճակում։ «Եվ այն անձը, որը պատասխանատու է այս ամեն ինչի համար և նույնիսկ կասկածվում է դավաճանության մեջ շարունակում է կառչած մնալ աթոռին։ Փաստորեն, կարող է պատահել, որ մի օր էլ արթնանանք, ինչպես նոյեմբերի 9-ի լույս 10-ի գիշերը, իմանանք հերթական կապիտուլացիայի մասին»,- նշեց նա։

19:05

«Բողոքի գործողությունները կլինեն այնքան ժամանակ, քանի դեռ Նիկոլ Փաշինյանը շարունակում է մնալ վարչապետ»,- այս մասին հայտնեց ՀՅԴ Երիտասարդական միության պատասխանատու Քրիստինե Վարդանյանը։

Նա նշեց, որ նույն պահանջով Երևանում փակ են մի քանի փողոցներ։ «Ոստիկաններն անհամաչափ ուժ կիրառեցին։ Վնասվածք է ստացել բաժին տեղափոխված մասնակիցներից մեկը։ Բերման ենթարկվածների թիվը ճշտվում է։ Մենք էլ միացել ենք այստեղ շուրջօրյա ակցիա իրականացնողներին»,- ասաց նա։ 

18:58

«Մարդկանց խփելու հրամանն ո՞վ է տվել»,- ոստիկաններին դիմեց ակցիայի մասնակիցներից մեկն ու հավելեց․

«Ես վստահ եմ, որ ոստիկանություն չկա այստեղ։ էս մարդկանց կամ դեղ են սրսկել կամ ինչ-որ մի բան են արել, ախրանիկներ են ուղարկել ստեղ։ Աղջիկներին անգամ խփում են, շպրտում էն կողմ։ Մենք ոստիկանության հետ մի ամիս է շփվում ենք ,շատ լավ հասկանում էինք իրար, վստահ եմ, որ այստեղ ոստիկան չկա:

Եթե այս հողն էլ է հանձնած, թող ասեն, մենք էթանք։ Հա, հասկացա տղերք, էսօր Ալիևի ծնունդն ա, երևի գալու են Մարիոթ Ալիևի ծնունդը նշելու»,- հավելեց մասնակիցը։

18․50

Նշենք, որ Նիկոլ Փաշինյանի հրաժարականի պահանջով ակցիաներն ե իրականացվում մայրաքաղաքի տարբեր փողոցներում։ Քիչ առաջ Հանրապետության հրապարակից ոստիկանները քաղաքացիներին բերման ենթարկեցին։ Նրանցից մեկի դեմքն արյունոտ էր։

18:47

Վարչապետի հրաժարականի կոչին միացել են երկրի ապագայով բոլոր մտահոգ մարդիկ։ Այս մասին Բաղրամյան պողոտայում ընթացող անհնազանդության ակցիայի ընթացքում լրագրողներին ասաց Զարե քահանա Աշուրյանը։

«Կոչ էր արվում, որ եկեղեցին խառնվում է քաղաքական պրոցեսներին։ Երբ 2,5 տարի անընդհատ ասվում էր, որ եկեղեցին առանձին է պետությունից, եկեղեցուն ուզում էին հեռու պահել այս պրոցեսներից։ Մտահոգված էին, քանի որ պիտի եկեղեցու վճռորոշ ձայնը հնչեր։ Չմոռանանք, որ եկեղեցին 700 տարի պահել է պետություն առանց բանակի և ժառանգել է այսօրվա իշխանություններին։ Թող բարի լինեն իրենց պարտքը կատարել բարեխիղճ ձևով, որ եկեղեցին ստիպված չլինի միջամտել»,- ընդգծեց քահանան։