Ձեր վստահելի աղբյուրը

Լեռնային Ղարաբաղում պատերազմի արդյունքում Թաղավարդ գյուղը բաժանվեց երկու մասի. հայերը մնացին ապրելու դրա մի մասում, որն անվանում են Կալլեր Թաղավարդ, իսկ ադրբեջանական զորքերը գրավեցին մեկ այլ հատված և կանգնեցվեցին: Թաղավարդի մասին ռեպորտաժ է ներկայացրել Euronews-ը։ Նշվում է, որ հայ բնակչությունը՝ շուրջ 400 մարդ, լքեց իրենց տները և դարձավ փախստական: Սուսաննա Շահրամանյանը նրանցից մեկն է:

«Մենք մեզ հետ ոչինչ չենք տարել։ Արթնացանք, լսեցինք, որ գյուղի վրա կրակում են, հագնվեցինք ու տնից դուրս եկանք», - ասում է Սուսաննան ու հավելում, որ հիմա փորձում են ինչ-որ կերպ հարմարվել. «Միգուցե հիմա մնանք այստեղ ապրելու համար»:

Բայց Կալլեր Թաղավարդում մնացածների համար կյանքը արմատապես փոխվել է. հայկական և ադրբեջանական անցակետերը միմյանցից ընդամենը մի քանի տասնյակ մետր հեռավորության վրա են:

Սամվել Աթայանն առաջիններից մեկն էր, ով կնոջ ու երեխաների հետ վերադարձավ հայրենի գյուղ։

«Պատերազմից առաջ մենք մեզ 98 տոկոսով ապահով էինք զգում, իսկ հիմա` առնվազն 30 տոկոս: Ես, ասենք, չեմ վախենում, ես այդքան շատ բան եմ տեսել: Բայց իմ երեխաները վախենում են: Մենք անզեն ենք, գյուղը բաժանված է: Չգիտեմ, հավանաբար, անհնար կլինի ապրել նման պայմաններում»,-ասում է Սամվել Աթայանը։

Նշվում է, որ Հայաստանի և Ադրբեջանի դիրքերի միջև գտնվում է Ռուսաստանի դրոշը:

Պատերազմի տարիներին գյուղացիներն էին պաշտպանում իրենց տները, բայց այժմ նրանց փոխարինել է հայկական բանակը:

Գյուղի գերեզմանատունը մնացել է սահմանի այն կողմում, և Թաղավարդի հայերն այլևս չեն կարողանա այցելել իրենց հարազատների ու ընկերների գերեզմանները։